Tshooj 73
Kev tshwm sim uas tus Yaj Saub Joseph Smith thiab Sidney Rigdon tau txais, nyob hauv Hiram, Ohio, lub Ib Hlis Ntuj hnub tim 10, xyoo 1832. Txij thaum ntxov ntawm lub Kaum Ob Hlis Ntuj uas nyuam qhuav dhau mus, tus Yaj Saub thiab Sidney tau raus tes tshaj tawm txoj moo zoo, thiab los ntawm qhov no tau daws ntau yam kev tsis sib raug zoo uas tau hlav tuaj tawm tsam lub Koom Txoos (saib cov lus piav lub ntsiab ntawm tshooj 71).
1–2, Cov txwj laug yuav tsum tshaj tawm txoj moo zoo mus ntxiv; 3–6, Joseph Smith thiab Sidney Rigdon yuav tsum txhais phau Npaivnpaum mus ntxiv kom txog thaum ua txoj hauj lwm ntawd tiav.
1 Vim tseeb tiag, tus Tswv hais li no tias, kuv xav tias tsim nyog kom lawv tshaj tawm txoj moo zoo mus ntxiv, thiab qhuab ntuas rau tej pawg ntseeg uas nyob rau tej thaj tsam puag ncig, kom txog thaum lub rooj sab laj;
2 Ces tom qab ntawd, saib seb, yuav ua rau lawv paub, los ntawm lub rooj sab laj lub suab, txog lawv ntiag tug hauj lwm.
3 Nim no, tus Tswv hais tias, kuv hais tseeb rau neb uas yog kuv ob tug tub qhe, Joseph Smith, tus Hluas, thiab Sidney Rigdon, tsim nyog kom neb txhais lus dua;
4 Thiab, npaum li uas muaj peev xwm ua tau, mus tshaj tawm txoj moo zoo rau tej thaj tsam puag ncig kom txog thaum lub rooj sab laj; thiab tom qab ntawd tsim nyog ua txoj hauj lwm txhais lus mus ntxiv kom txog thaum ua txoj hauj lwm ntawd tiav.
5 Thiab cia li muab qhov no ua ib tug txheej txheem rau cov txwj laug kom txog thaum txais tau tej kev txawj ntse tshiab tso, raws li tau muaj sau cia.
6 Nim no lub sij hawm no kuv tsis muab ntxiv rau nej. Muab nej tej siv sia thiab ua tiag tiag. Twb yog li ntawd. Amees.