Tshooj 111
Kev tshwm sim uas tus Yaj Saub Joseph Smith tau txais, nyob hauv Salem, Massachusetts, lub Yim Hli Ntuj hnub tim 6, xyoo 1836. Lub sij hawm no cov thawj coj ntawm lub Koom Txoos tshuav nuj nqi ntau heev vim yog lawv txoj hauj lwm qhuab qhia. Thaum hnov hais tias muaj ib pob nyiaj ntau yuav muab tau rau lawv siv nyob tim Salem, tus Yaj Saub Joseph Smith, Sidney Rigdon, Hyrum Smith, thiab Oliver Cowdery txawm mus ntawm Kirtland, Ohio rau tid, mus soj xyuas txog qhov no, thiab tshaj tawm txoj moo zoo. Cov kwv tij tau ua ob peb yam hauj lwm ntawm lub Koom Txoos thiab tau tshaj tawm txoj moo zoo me ntsis. Thaum pom meej hais tias tsis muaj nyiaj raws li hais, lawv tau rov qab mus rau Kirtland. Ob peb yam uas nto moo nyob rau lub sij hawm no pom tau nyob hauv cov lus hais ntawm zaj tshwm sim no.
1–5, Tus Tswv saib xyuas txog tej yam uas Nws cov tub qhe yuav tsum muaj ntawm sab cev nqaij daim tawv; 6–11, Nws yuav hlub tshua Xi-oos thiab ua txhua yam rau qhov zoo rau Nws cov tub qhe.
1 Kuv, tus Tswv nej tus Vajtswv, twb muaj kev zoo siab rau nej txoj kev tuaj mus no, txawm yog muaj nej tej kev ua ruam ntsuav.
2 Kuv muaj ntau yam muaj nqis nyob hauv lub nroog no rau nej, uas yuav zoo rau Xi-oos, thiab ntau tus neeg nyob hauv lub nroog no, cov uas kuv yuav muab sau los ua ke kom yuav zoo rau Xi-oos thaum txog lub sij hawm uas tau pom zoo, los ntawm tej yam nej ua.
3 Yog li ntawd, tsim nyog kom nej sib fim nrog cov neeg nyob hauv lub nroog no, raws li uas yuav coj nej, thiab raws li tej uas yuav muab rau nej.
4 Thiab yuav muaj tias thaum txog lub sij hawm uas tau pom zoo lawm kuv yuav muab lub nroog no cob rau nej tes, kom nej yuav muaj hwj chim kav lub nroog no, lawv thiaj yuav tsis paub txog tej nej yuav ua; thiab lub nroog no tej kev nplua nuj ntawm nyiaj thiab kub yuav yog nej li.
5 Nej tsis txhob txhawj txog nej tej nuj nqis, vim kuv yuav muab hwj chim rau nej kom them taus.
6 Nej tsis txhob txhawj txog Xi-oos, vim kuv yuav hlub tshua nws.
7 Cia li nyob ntawm qhov chaw no, thiab ntawm tej thaj tsam ib puag ncig;
8 Thiab kuv tus Ntsuj Plig txoj kev kaj siab thiab lub hwj chim, uas yuav ntws los rau nej, yuav qhia qhov chaw uas kuv lub siab nyiam kom nej nyob, feem ntau.
9 Qhov chaw no nej yuav tau los ntawm kev them nyiaj. Thiab ua zoo nug ntsig txog cov neeg uas tau nyob thiab tau tsim lub nroog no ntxov puag thaum ub.
10 Vim muaj tej kev nplua nuj ntau tshaj ib yam rau nej nyob hauv lub nroog no.
11 Yog li ntawd, nej yuav tsum ntse li tej nab tiam sis txhob muaj kev txhaum; thiab kuv yuav txib txhua yam ua kom zoo rau nej, sai npaum li uas nej yuav muaj peev xwm txais tau tej ntawd. Amees.