Tshooj 85
Kev tshwm sim uas tus Yaj Saub Joseph Smith tau txais, nyob hauv Kirtland, Ohio, lub Kaum Ib Hlis Ntuj hnub tim 27, xyoo 1832. Tshooj no yog ib zaj lus muab los ntawm ib tsab ntawv uas tus Yaj Saub sau mus rau William W. Phelps, tus uas nyob hauv Independence, Missouri. Nws teb cov lus nug ntsig txog cov Ntseeg uas tau tsiv mus rau Xi-oos tiam sis lawv tsis tau ua raws li lo lus txib kom fij siab muab lawv tej teej tug lawv thiaj tsis tau txais lawv tej qub txeeg qub teg raws li tus txheej txheem uas tau tsa muaj nyob hauv lub Koom Txoos.
1–5, Tej qub txeeg qub teg hauv Xi-oos yuav tsum txais los ntawm kev fij siab; 6–12, Ib tug muaj hwj chim thiab muaj zog yuav muab Haiv Neeg Ntseeg qub txeeg qub teg rau lawv nyob hauv Xi-oos.
1 Yog tus Tswv tus neeg khaws ntaub ntawv txoj hauj lwm, tus uas nws tau tsa, kom ceev ib zaj keeb kwm, thiab ceev xwm txheej txog lub koom txoos sau txhua yam uas muaj nyob hauv Xi-oos, thiab txog tag nrho cov neeg uas fij siab muab tej teej tug, thiab txais qub txeeg qub teg raws cai los ntawm tus npisov;
2 Thiab txog lawv tus yam ntxwv ua neej, lawv txoj kev ntseeg, thiab tej yam lawv ua; thiab txog cov neeg uas tso qhov tseeb tseg tom qab tau txais lawv tej qub txeeg qub teg.
3 Cov uas tsis yog txais lawv qub txeeg qub teg los ntawm kev fij siab, raws li nws txoj kev cai, uas nws tau muab, kom nws ua rau nws cov neeg them ib feem kaum, muab los npaj lawv rau hnub muab kev pauj thiab kub hnyiab, yeej tsis yog raws li Vajtswv lub siab nyiam thiab lus txib hais tias, lawv yuav muab lub npe sau cia nrog Vajtswv haiv neeg.
4 Thiab kom tsis txhob ceev los sis tsis txhob muaj lawv tej kev nrhiav caj ceg, es tsam ho pom nyob hauv tej ceev xwm txheej los yog keeb kwm ib qho twg ntawm lub koom txoos.
5 Yuav tsum tsis muaj lawv lub npe, tsis muaj cov uas yog txiv lub npe, tsis muaj cov me nyuam lub npe sau cia rau hauv phau ntawv muaj Vajtswv txoj kev cai, Ib Tsoom Tub Rog tus Tswv hais li.
6 Muaj tseeb tiag, lub suab yau yau hais li, uas ntxhi dhau thiab tshab txhua yam, thiab ntau zaus lub suab ua rau kuv tej pob txha tshee thaum nws tshwm sim, hais tias:
7 Thiab yuav muaj tias, kuv, tus Tswv uas yog Vajtswv, yuav xa ib tug uas muaj hwj chim thiab muaj zog los, tuav rawv tus pas muaj hwj chim nyob hauv nws txhais tes, hnav txoj kev kaj ua ib ce khaub ncaws, nws lub qhov ncauj yuav hais lus, tej lus nyob mus ib txhis; nws lub siab yuav yog lub hauv paus txhawv kev tseeb, los teeb kom Vajtswv lub tsev muaj chaw txawb chaw rau, thiab muab haiv neeg ntseeg uas muaj npe tej qub txeeg qub teg faib ua tej kwb kem, thiab lawv txiv tej npe, thiab lawv tej me nyuam npe, muab sau cia rau hauv phau ntawv muaj Vajtswv txoj cai;
8 Tiam sis tus neeg uas Vajtswv tau hu thiab tsa, yog tus neeg ntawd muab nws txhais tes cev mus tuav Vajtswv lub phij xab kom txhob co, nws yuav vau los ntawm txoj kev tuag tus xib xub, zoo ib yam li ib tug ntoo uas raug tus nplaim xob laim ci lug tua.
9 Thiab tag nrho cov uas tsis pom muaj npe sau cia hauv phau ntawv nco txog ces yuav tsis tau qub txeeg qub teg thaum hnub ntawd, tiam sis lawv yuav raug muab hlais ua tej dwb daim, thiab yuav muab lawv nqi zog rau lawv nyob xyaw tej neeg tsis ntseeg, rau qhov chaw uas quaj thiab tom hniav qees.
10 Tej yam no tsis yog kuv hais kuv; yog li ntawd, ib yam li tus Tswv tau hais, nws kuj yuav ua kom muaj raws li ntawd thiab.
11 Thiab lawv cov uas tuav lub Pov Thawj Hwj Hlob, cov uas npe tsis muaj sau cia rau hauv phau ntawv kev cai, los yog lawv cov uas tau tso qhov tseeb tseg lawm, los yog tau raug muab txiav tawm ntawm lub koom txoos lawm, tsis hais cov muaj lub pov thawj hwj yau zog, los yog cov mej zeej, nyob rau hnub ntawd cov ntawd yuav tsis tau qub txeeg qub teg nyob hauv haiv neeg ntseeg ntawm tus Siab Tshaj Plaws;
12 Yog li ntawd, yuav ua rau lawv zoo ib yam li ua rau tus pov thawj cov me nyuam, uas yuav pom sau cia nyob hauv tshooj ob thiab nqe rau caum ib thiab ob ntawm Exalas.