Tshooj 105
Kev tshwm sim uas tus Yaj Saub Joseph Smith tau txais, ntawm tus Dej Fishing, Missouri, lub Rau Hli Ntuj hnub tim 22, xyoo 1834. Los ntawm tus Yaj Saub txoj kev coj, Tsoom Haiv Neeg Ntseeg nyob hauv Ohio thiab lwm qhov chaw tau taug kev los rau hauv Missouri uas tom qab no muab hu ua lub Yeej Xi-oos. Lawv lub hom phiaj yog coj Tsoom Haiv Neeg Ntseeg uas raug ntiab tawm ntawm Missouri rov qab mus rau lawv tej av nyob hauv Ciaj Ciam Av Jackson. Cov neeg Missouri uas tau tsim txom Tsoom Haiv Neeg Ntseeg ntawd ntshai tsam lub Yeej Xi-oos yuav ua pauj, lawv thiaj xub tawm tsam ib Tsoom Haiv Neeg Ntseeg uas nyob hauv Ciaj Ciam Av Clay, Missouri ua ntej. Tom qab tus tswv xeev Missouri thim nws txoj kev cog lus tias nws yuav pab cov Neeg Ntseeg, Joseph Smith tau txais txoj kev tshwm sim no.
1–5, Yuav txhim tsa Xi-oos los ntawm kev ua raws txoj kev cai xilethi-aus; 6–13, Tus Tswv muab Xi-oos txoj kev txhiv dim ncua ib nyuag ntus; 14–19, Tus Tswv yuav ntaus Xi-oos tej npluav rog; 20–26, Haiv Neeg Ntseeg yuav tsum muaj tswv yim thiab txhob khav txog tej hauj lwm muaj hwj chim thaum lawv sib sau ua ke; 27–30, Yuav tsum muas tej av nyob hauv Jackson thiab tej ciaj ciam av uas nyob sib ze; 31–34, Cov txwj laug yuav tsum mus txais vaj txiaj ntsim nyob hauv tus Tswv lub tsev hauv Kirtland; 35–37, Yuav muab Haiv Neeg Ntseeg cov uas tus Tswv hu thiab xaiv yuav hloov ua dawb huv; 38–41, Haiv Neeg Ntseeg yuav tsum tsa ib tug chij ntawm kev thaj yeeb mus rau neeg ntiaj teb.
1 Kuv hais tseeb rau nej cov uas tau tuaj txoos nej tus kheej ua ke kom nej yuav kawm kuv lub siab nyiam ntsig txog txoj kev txhiv dim ntawm kuv cov neeg raug tsim txom—
2 Saib seb, kuv hais rau nej, yog tsis muaj kuv cov neeg tej kev ua txhaum, hais txog cov ntseeg thiab tsis yog hais ib tug twg, ces tej zaum lawv twb tau kev txhiv dim ziag no lawm.
3 Tiam sis saib seb, lawv tsis tau kawm coj raws li tej yam uas kuv kom lawv yuav tsum ua, tiam sis muaj tag nrho txhua yam kev phem puv npo, thiab tsis muab lawv tej khoom faib rau cov neeg pluag thiab txom nyem uas nyob hauv lawv, zoo li cov neeg ntseeg yuav tsum ua;
4 Thiab tsis sib koom siab raws li kev koom siab uas txoj kev cai ntawm lub nceeg vaj xilethi-aus qhia tias yuav tsum muaj;
5 Thiab yuav txhim tsa tsis tau Xi-oos yog hais tias tsis yog los ntawm txoj kev cai ntawm lub nceeg vaj xilethi-aus tej ntsiab cai; yog tsis li ces kuv txais tsis tau nws rau kuv tus kheej.
6 Thiab kuv cov neeg yeej yuav tsum raug qhuab ntuas kom txog thaum lawv kawm tau txoj kev mloog lus, yog hais tias yuav tsum ua li ntawd, los ntawm tej yam uas lawv raug txom nyem.
7 Kuv tsis yog hais ntsig txog cov uas tus Tswv tsa los coj kuv cov neeg, cov uas yog cov thawj txwj laug ntawm kuv lub koom txoos, vim tsis yog lawv txhua tus nyob hauv txoj kev raug txim no;
8 Tiam sis kuv hais ntsig txog kuv tej pawg ntseeg nyob lwm qhov—muaj coob tus uas yuav hais tias: Lawv tus Vajtswv nyob qhov twg? Saib seb, nws yuav tso lawv dim thaum lub sij hawm muaj teeb meem, tsis li ces peb yuav tsis mus lawm pem Xi-oos, thiab peb yuav ceev peb cov nyiaj.
9 Yog li ntawd, vim los ntawm kuv cov neeg tej kev ua txhaum, kuv xav tias tsim nyog uas kuv cov txwj laug yuav tsum tos ib nyuag ntus rau txoj kev txhiv Xi-oos dim—
10 Xwv kom lawv tus kheej yuav npaj txhij, thiab xwv kom kuv cov txwj laug yuav qhia tau kuv cov neeg zoo zog, thiab muaj sij hawm xyaum, thiab paub zoo zog ntsig txog lawv tej dej num, thiab tej yam uas kuv kom lawv yuav tsum ua.
11 Thiab yuav ua tsis tau qhov no kom txog thaum kuv cov txwj laug tau txais vaj txiaj ntsim hwj chim los saum ntuj los tso.
12 Vim saib seb, kuv tau npaj ib vaj txiaj ntsim thiab txoj koob hmoov tseem ceeb uas yuav muab nplua mias los rau lawv, npaum li uas lawv rau siab ntseeg thiab txo hwj chim rau kuv mus ntxiv.
13 Yog li ntawd kuv xav tias tsim nyog uas kuv cov txwj laug yuav tsum tos ib nyuag ntus, rau txoj kev txhiv Xi-oos dim.
14 Vim saib seb, kuv tsis kom lawv mus ntaus Xi-oos tej npluav rog; vim, ib yam li kuv tau hais nyob hauv ib lo lus txib yav tas los, kuv yuav ua kom muaj raws li ntawd—kuv yuav ntaus nej tej npluav rog.
15 Saib seb, kuv tau xa tus uas ua kev puas tsuaj mus ua kom kuv cov yeeb ncuab puas tsuaj thiab puas ntsoog; thiab tsis ntev yav tom ntej lawv yuav tsis nyob kom ua rau kuv li teej tug qias neeg, thiab hais lus saib tsis taus kuv lub npe nyob hauv tej thaj av uas kuv tau muab fij tseg rau txoj kev sau kuv haiv neeg ntseeg los ua ke.
16 Saib seb, kuv tau txib kuv tus tub qhe Joseph Smith, tus Hluas, kom hais rau kuv tsev neeg cov tub dag tub zog, uas twb yog kuv cov tub rog, kuv cov tub hluas, thiab cov muaj ib nrab xyoo, kom sib sau los ua ke rau txoj kev txhiv kuv cov neeg dim, thiab muab tej pej thuam ntawm kuv cov yeeb ncuab ua kom vau, thiab ua kom lawv cov neeg zov nyas tawg khiav ri niab;
17 Tiam sis kuv tsev neeg cov tub dag tub zog twb tsis mloog kuv tej lus.
18 Tiam sis npaum li uas muaj cov uas tau mloog kuv tej lus, kuv tau npaj ib txoj koob hmoov thiab vaj txiaj ntsim rau lawv, yog hais tias lawv rau siab ntseeg mus ntxiv.
19 Kuv tau hnov lawv tej lus thov, thiab kuv yuav txais lawv txoj kev tiam; thiab kuv xav tias tsim nyog uas yuav tsum coj lawv los deb npaum li no los sim lawv txoj kev ntseeg.
20 Thiab nim no, kuv hais tseeb rau nej tias, kuv muab ib lo lus txib rau nej, hais tias tag nrho cov uas tau tuaj ntawm no, uas muaj peev xwm nyob ib thaj tsam puag ncig, ces cia lawv nyob;
21 Thiab cov uas tsis muaj peev xwm nyob, uas muaj tsev neeg nyob tim sab hnub tuaj, ces cia lawv nyob ib nyuag ntus, ntev npaum li uas kuv tus tub qhe Joseph yuav qhia lawv;
22 Vim kuv yuav ntuas nws ntsig txog qhov no, thiab txhua tsav txhua yam uas nws yuav qhia lawv yeej yuav muaj raws li ntawd.
23 Thiab cia tag nrho kuv cov neeg uas nyob tej thaj tsam ib puag ncig rau siab ntseeg heev, thiab thov Vajtswv tas mus li, thiab txo hwj chim rau kuv, thiab tsis txhob muab tej yam uas kuv tau qhia rau lawv ua tshwm sim, kom txog thaum yog kuv lub tswv yim hais tias yuav tsum muab tej ntawd ua tshwm sim tso.
24 Txhob hais lus txog tej kev txiav txim, thiab txhob khav txog kev ntseeg los yog tej hauj lwm tseem ceeb, tiam sis ua tib zoo sib sau los ua ke, coob npaum li nyob tau hauv ib thaj tsam, kom raws li cov neeg tej kev xav;
25 Thiab saib seb, kuv yuav ua kom lawv nyiam thiab ntseeg nej, kom nej yuav tau so nrog kev thaj yeeb thiab kev nyab xeeb, thaum nej tab tom hais rau cov neeg tias: Muab kev txiav txim thiab kev txim lij los phua peb rau peb raws li txoj kev cai, thiab kho tej yam uas tau ua txhaum rau peb.
26 Nim no, saib seb, kuv hais rau nej, kuv cov phooj ywg, li no cov neeg thiaj yuav pom zoo rau nej, kom txog thaum pab tub rog ntawm Ixayees hloov los muaj coob heev tso.
27 Thiab kuv yuav ua kom cov neeg lub siab mos muag, ib yam li kuv ua rau Falaus lub siab, tej lub sij hawm, kom txog thaum kuv tus tub qhe Joseph Smith, tus Hluas, thiab kuv cov txwj laug, cov uas kuv tau tsa, yuav muaj sij hawm muab kuv tsev neeg cov tub dag tub zog sau los ua ke tso,
28 Thiab xa tej neeg txawj ntse, mus ua qhov uas kuv tau txib kom tiav ntsig txog txoj kev muas tag nrho tej av hauv Jackson ciaj ciam av li uas muaj peev xwm muas tau, thiab hauv tej ciaj ciam av ib puag ncig uas nyob sib ze.
29 Vim yog kuv lub siab nyiam uas yuav tsum muas tej av no; thiab tom qab muas tau tej av kom kuv haiv neeg ntseeg yuav tsum nyob hauv tej av no raws li tej kev cai fij siab uas kuv tau muab.
30 Thiab tom qab muas tau tej av no, kuv yuav tsis suav txim rau cov tub rog ntawm Ixayees rau txoj kev nyob hauv lawv tus kheej tej av, uas lawv tau muab lawv nyiaj muas ua ntej, thiab ntawm kev muab kuv cov yeeb ncuab uas tuaj tsim txom lawv tej pej thuam ua vau, thiab ua rau lawv cov neeg zov nyas tawg khiav ri niab, thiab pauj ntawm kuv cov yeeb ncuab rau kuv, mus txog rau tiam neeg thib peb thiab thib plaub ntawm cov uas ntxub kuv.
31 Tiam sis qhov ua ntej cia kuv pab tub rog loj tuaj kom coob heev tso, thiab ua kom kuv pom tias pab no hloov ua dawb huv, kom pab no ci li lub hnub, thiab kaj li lub hli, thiab kom pab tub rog no tej chij yuav txaus ntshai heev rau txhua lub teb chaws;
32 Kom tej nceeg vaj ntawm lub ntiaj teb no yuav raug txhib kom lees hais tias lub nceeg vaj ntawm Xi-oos yeej yog peb tus Vajtswv thiab nws tus Khetos lub nceeg vaj tiag tiag; yog li ntawd, cia peb ua raws li Xi-oos tej kev cai.
33 Kuv hais tseeb rau nej tias, kuv xav tias tsim nyog kom cov thawj txwj laug ntawm kuv lub koom txoos yuav tsum txais lawv vaj txiaj ntsim los saum ntuj los nyob hauv kuv lub tsev, uas kuv tau txib kom txhim tsa rau kuv lub npe nyob hauv thaj av Kirtland.
34 Thiab yuav tsum coj thiab ua kom muaj raws li tej lus txib uas kuv tau muab ntsig txog Xi-oos thiab nws txoj kev cai, tom qab nws txoj kev txhiv dim.
35 Tau muaj ib hnub hu neeg, tiam sis twb txog lub sij hawm rau hnub xaiv neeg; thiab yuav tsum xaiv cov tsim nyog.
36 Thiab yuav qhia rau kuv tus tub qhe, los ntawm tus Ntsuj Plig lub suab, txog cov uas tus Tswv tau xaiv; thiab tus Tswv yuav ua rau lawv hloov ua dawb huv;
37 Thiab npaum li uas lawv coj raws li tej lus ntuas uas lawv txais tau, ces tom qab ntau hnub lawv yuav muaj hwj chim ua kom txhua yam ntsig txog Xi-oos tiav.
38 Thiab kuv hais rau nej ntxiv tias, nrhiav txoj kev thaj yeeb, tsis yog nrog rau cov neeg uas tau tawm tsam nej xwb, tiam sis nrog rau txhua tus neeg;
39 Thiab tsa ib tug chij ntawm kev thaj yeeb, thiab xa ib zaj lus tshaj tawm txog txoj kev thaj yeeb kom mus thoob plaws lub ntiaj teb;
40 Thiab muab tswv yim kev thaj yeeb rau cov uas tau tawm tsam nej, raws li tus Ntsuj Plig lub suab uas nyob hauv nej, thiab txhua yam yuav ua hauj lwm ua ke kom zoo rau nej.
41 Yog li ntawd, cia li rau siab ntseeg; thiab saib seb, thiab xyuas seb, kuv twb yuav nrog nej nyob kom txog thaum kawg. Twb yog li ntawd. Amees.