Tshooj 97
Kev tshwm sim uas tus Yaj Saub Joseph Smith tau txais, nyob hauv Kirtland, Ohio, lub Yim Hli Ntuj hnub tim 2, xyoo 1833. Txoj kev tshwm sim no hais ncaj nraim txog tej xwm ntawm Haiv Neeg Ntseeg hauv Xi-oos, Ciaj Ciam Av Jackson, Missouri, teb rau tus Yaj Saub txoj kev thov kom tus Tswv qhia nws. Cov mej zeej ntawm lub Koom Txoos nyob hauv Missouri lub sij hawm no raug kev tsim txom heev, thiab lub Xya Hli Ntuj hnub tim 23, xyoo 1833, lawv raug yuam kom sau npe rau ib daim ntawv cog lus tias lawv yuav tawm hauv Ciaj Ciam Av Jackson khiav mus.
1–2, Ntau tus ntawm Haiv Neeg Ntseeg nyob hauv Xi-oos (Ciaj Ciam Av Jackson, Missouri) tau koob hmoov vim lawv rau siab ntseeg; 3–5, Tus Tswv qhuas Parley P. Pratt rau nws tej hauj lwm nyob hauv lub tsev kawm ntawv hauv Xi-oos; 6–9, Tus Tswv txais yuav cov uas coj raws li lawv tej kev khi lus; 10–17, Yuav tsum ua ib lub tsev nyob hauv Xi-oos kom cov muaj lub siab dawb yuav pom Vajtswv; 18–21, Xi-oos yog cov muaj lub siab dawb; 22–28, Xi-oos yuav dim tus Tswv txoj kev nplawm yog hais tias Xi-oos rau siab ntseeg.
1 Kuv hais tseeb rau nej kuv cov phooj ywg, kuv hais lus rau nej nrog kuv lub suab, uas twb yog kuv tus Ntsuj Plig lub suab, kom kuv yuav muab kuv lub siab nyiam ntsig txog nej cov kwv tij nyob hauv thaj av Xi-oos qhia los rau nej, muaj ntau tus uas txo hwj chim tiag tiag thiab mob siab nrhiav kev kawm tswv yim thiab nrhiav qhov tseeb.
2 Kuv hais tseeb tseeb rau nej tias, cov zoo li ntawd tau koob hmoov, vim lawv yuav tau; vim, kuv, tus uas yog tus Tswv, qhia txoj kev hlub tshua los rau txhua tus muaj siab mos siab muag; thiab rau txhua leej txhua tus uas kuv xav, kom kuv yuav tsis muaj txim thaum kuv coj lawv los mus raug txiav txim.
3 Saib seb, kuv hais rau nej, ntsig txog lub tsev kawm ntawv nyob hauv Xi-oos, kuv, tus uas yog tus Tswv, txaus siab hais tias yuav muaj ib lub tsev kawm ntawv nyob hauv Xi-oos, thiab kuj zoo siab rau kuv tus tub qhe Parley P. Pratt, vim nws nrog nraim kuv.
4 Thiab npaum li uas nws nrog kuv nyob mus ntxiv nws yuav tswj hwm lub tsev kawm ntawv mus ntxiv nyob hauv thaj av Xi-oos kom txog thaum kuv muab dua lwm cov lus txib rau nws tso.
5 Thiab kuv yuav foom koob hmoov rau nws nrog ntau yam koob hmoov, kom txawj piav tag nrho tej vaj lug kub thiab tej txuj ci uas neeg paub tsis txog kom txhawb nqa lub tsev kawm ntawv, thiab lub koom txoos nyob hauv Xi-oos.
6 Thiab rau cov neeg kawm ntawv seem tshuav, kuv, tus uas yog tus Tswv, txaus siab hlub tshua lawv; txawm li ntawd los, muaj cov uas yeej yuav tsum raug qhuab ntuas, thiab yuav ua rau neeg paub txog lawv tej hauj lwm.
7 Twb muab rab taus tso rau ntawm tej hauv paus ntoo; thiab txhua tsob ntoo uas tsis txi txiv zoo yuav raug muab ntov thiab muab pov rau hauv hluav taws. Kuv, tus uas yog tus Tswv, tau hais li.
8 Kuv hais tseeb rau nej tias, tag nrho cov nyob hauv Xi-oos lub tsev kawm ntawv uas paub hais tias lawv lub siab ncaj, thiab muaj siab mob, thiab lawv muaj siab xav ua zoo, thiab txaus siab coj raws li lawv tej kev khi lus los ntawm kev txi—muaj tseeb tiag, txhua txoj kev txi uas kuv, tus uas yog tus Tswv, yuav txib—kuv txais yuav lawv.
9 Vim kuv, tus uas yog tus Tswv, yuav ua kom lawv txi txiv zoo li tsob ntoo muaj txiv ntau heev uas cog rau hauv thaj av zoo, nyob rau ntawm ib tug dej ntshiab, uas txi tau cov txiv ntoo muaj nqis ntau.
10 Kuv hais tseeb rau nej tias, yog kuv lub siab nyiam uas yuav ua ib lub tsev rau kuv nyob hauv thaj av Xi-oos, raws li tus qauv uas kuv tau muab rau nej.
11 Muaj tseeb tiag, yuav tsum ua lub tsev no nrawm nroos, los ntawm kev them nyiaj ib feem kaum ntawm kuv cov neeg.
12 Saib seb, nov yog txoj kev them ib feem kaum thiab txoj kev txi uas kuv, tus uas yog tus Tswv, kom lawv yuav tsum ua, kom yuav ua ib lub tsev rau kuv rau txoj kev cawm seej ntawm Xi-oos—
13 Kom muaj ib qho chaw ua Vajtswv tsaug rau tag nrho haiv neeg ntseeg, thiab kom muaj ib qho chaw muab kev qhia rau tag nrho cov uas tus Tswv hu los ua hauj lwm qhuab qhia raws li tag nrho tej uas Vajtswv hu lawv ua thiab tej luag hauj lwm;
14 Kom lawv yuav ua neeg zoo tag nrho ntsig txog kev to taub lawv tej hauj lwm qhuab qhia, txog ntsiab lus, txog ntsiab cai, thiab txog lus qhuab qhia, txog txhua yam hais txog Vajtswv lub nceeg vaj nyob hauv lub ntiaj teb, tej yawm sij ntawm lub nceeg vaj uas tau muab tso rau nej tuav.
15 Thiab npaum li uas kuv cov neeg yuav ua ib lub tsev los rau kuv los ntawm tus Tswv lub npe, thiab tsis txhob pub ib yam dab tsi tsis huv los mus rau haud, kom lub tsev tsis txhob qias, ces kuv lub yeeb koob yuav nyob rau haud;
16 Muaj tseeb tiag, thiab kuv lub yeeb haum yuav nyob ntawd, vim kuv yuav los rau haud, thiab tag nrho cov muaj lub siab dawb uas tuaj rau hauv yuav pom Vajtswv.
17 Tiam sis yog hais tias ua rau lub tsev qias ces kuv yuav tsis los rau haud, thiab kuv lub yeeb koob yuav tsis muaj nyob ntawd; vim kuv yuav tsis los rau hauv tej tuam tsev tsis dawb huv.
18 Thiab nim no, saib seb, yog hais tias Xi-oos ua tej yam no nws yuav vam meej, thiab yuav loj tuaj thiab muaj yeeb koob heev, muaj hwj chim heev, thiab txaus ntshai heev.
19 Thiab tej haiv neeg hauv ntiaj teb no yuav hwm nws, thiab yuav hais tias: Tseeb tiag Xi-oos yeej yog peb tus Vajtswv lub nroog, thiab tseeb tiag Xi-oos vau tsis taus, thiab yeej tshem tsis tau nws tawm ntawm nws qhov chaw mus, vim muaj Vajtswv nyob ntawd, thiab tus Tswv txhais tes twb nyob ntawd;
20 Thiab Vajtswv tau cog lus los ntawm lub hwj chim ntawm nws lub zog hais tias nws yuav ua tus cawm Xi-oos thiab ua Xi-oos tus pej thuam siab.
21 Yog li ntawd, tus Tswv hais tseeb li no tias, kom Xi-oos cia li xyiv fab, vim nov yog Xi-oos—cov muaj lub siab dawb; yog li ntawd, kom Xi-oos cia li xyiv fab, thaum tag nrho cov neeg phem quaj ntsuag.
22 Vim saib seb, thiab xyuas seb, kev pauj los sai sai rau cov tsis mloog Vajtswv lus ib yam li khaub zig cua; thiab leej twg thiaj yuav khiav dim?
23 Tus Tswv txoj kev nplawm yuav los thaum hmo ntuj thiab nruab hnub, thiab txoj moo ntawd yuav tsim txom neeg sawv daws; muaj tseeb tiag, qhov no yuav tsis tsum kom txog thaum tus Tswv los tso;
24 Vim tus Tswv txoj kev npau taws twb npau tawm tsam lawv tej kev qias thiab tag nrho lawv tej hauj lwm phem.
25 Txawm li ntawd los, Xi-oos yuav dim yog hais tias nws ua tib zoo ua txhua yam uas kuv tau txib nws.
26 Tiam sis yog nws tsis ua tib zoo ua txhua yam uas kuv tau txib nws, kuv yuav los xyuas nws raws li tag nrho nws tej hauj lwm, nrog tej kev txom nyem heev, nrog tej kab mob phem, nrog kev mob nkeeg, nrog ntaj, nrog kev pauj, nrog hluav taws hlawv.
27 Txawm li ntawd los, muab nyeem tib zaug no rau nws ob lub pob ntseg, hais tias kuv, tus uas yog tus Tswv, tau txais yuav nws txoj kev tiam lawm; thiab yog hais tias nws tsis ua txhaum ntxiv ces yuav tsis muaj ib yam no los raug nws;
28 Thiab kuv yuav foom tej koob hmoov rau Xi-oos, thiab ntxiv ntau yam koob hmoov rau nws, thiab rau nws tej tiam neeg nyob mus ib txhiab thiab ib txhis li, tus Tswv nej tus Vajtswv hais li. Amees.