Tshooj 23
Tsib zag kev tshwm sim uas tus Yaj Saub Joseph Smith tau txais kom qhiahais rau Oliver Cowdery, Hyrum Smith, Samuel H. Smith, Joseph Smith tus Laus, thiab Joseph Knight tus Laus, hauv Manchester, New York, lub Plaub Hlis Ntuj xyoo 1830. Vim muaj tsib tug neeg uas muaj npe saum no xav paub heev txog lawv qhov dej num, tus Yaj Saub thiaj tau nug tus Tswv thiab tau txais ib txoj kev tshwm sim rau txhua tus.
1–7, Tus Tswv hu cov thwj tim nyob lub caij ntxov no mus tshaj tawm txoj moo zoo, mus ntuas, thiab mus txhawb cov ntseeg.
1 Saib seb, kuv hais ob peb lo lus rau koj, Oliver. Saib seb, koj tau koob hmoov, thiab koj twb tsis muaj kev raug txim. Tiam sis ceev faj rau txoj kev muab hlob, nyob tsam koj yuav pib ua raws li kev haub ntxias.
2 Ua kom cov ntseeg paub txog qhov uas Vajtswv hu koj ua, thiab ua rau neeg ntiaj teb thiab, thiab koj lub siab yuav qhib mus tshaj tawm qhov tseeb txij no mus thiab mus ib txhis li. Amees.
3 Saib seb, kuv hais ob peb lo lus rau koj, Hyrum; vim koj los kuj tsis muaj kev raug txim thiab, thiab koj lub siab twb qhib, thiab koj nplaig twb npliag; thiab Vajtswv hu koj mus ntuas, thiab mus txhawb cov ntseeg kom tsis tu ncua. Yog li ntawd koj tej dej num yog ua rau lub koom txoos mus ib txhis li, thiab qhov no los yog vim koj tsev neeg. Amees.
4 Saib seb, kuv hais ob peb lo lus rau koj, Samuel; vim koj los kuj tsis muaj kev raug txim thiab, thiab Vajtswv hu koj mus ntuas, thiab mus txhawb cov ntseeg lub zog; thiab kuv tseem tsis tau hu koj mus tshaj tawm txoj moo zoo rau neeg ntiaj teb. Amees.
5 Saib seb, kuv hais ob peb lo lus rau koj, Joseph; vim koj los kuj tsis muaj kev raug txim, thiab Vajtswv kuj hu koj mus ntuas, thiab mus txhawb cov ntseeg lub zog; thiab qhov no yog koj tej dej num txij no mus thiab mus ib txhis li. Amees.
6 Saib seb, kuv qhia rau koj paub los ntawm tej lus no, Joseph Knight, hais tias koj yuav tsum kwv koj tus ntoo khaub lig, ntawm qhov uas koj yuav tsum thov Vajtswv nrov nrov rau ntawm neeg ntiaj teb thiab thov ntsiag to, nyob hauv koj tsev neeg, thiab thaum nrog koj tej phooj ywg, thiab nyob txhua qhov chaw.
7 Thiab, saib seb, koj tej dej num yog los koom nrog lub koom txoos tseeb, thiab muab koj tej lus coj los ntuas kom cuag ncua, kom koj tau txais nqi zog ntawm tus neeg ua hauj lwm. Amees.