Tshooj 36
Kev tshwm sim uas tus Yaj Saub Joseph Smith tau txais kom qhia Edward Partridge, ze Fayette, New York, lub Kaum Ob Hlis Ntuj hnub tim 9, xyoo 1830 (saib cov lus piav lub ntsiab ntawm tshooj 35). Joseph Smith zaj keeb kwm hais tias Edward Partridge “coj yam ntxwv dawb huv, thiab yog ib tug ntawm tus Tswv cov neeg zoo.”
1–3, Tus Tswv tso Nws txhais tes rau saum Edward Partridge los ntawm Sidney Rigdon txhais tes; 4–8, Tus Tswv hu txhua tus txiv neej uas txais yuav txoj moo zoo thiab lub pov thawj hwj kom lawv mus thiab tshaj tawm txoj moo zoo.
1 Tus Tswv uas yog Vajtswv, Ixayees tus Muaj Hwj Chim hais li no: Saib seb, kuv hais rau koj, kuv tus tub qhe Edward tias, koj tau koob hmoov, thiab kuv zam txim rau koj tej kev txhaum lawm, thiab kuv hu koj mus tshaj tawm kuv txoj moo zoo yam li lub suab raj hlau nrov;
2 Thiab kuv yuav tso kuv txhais tes rau saum koj los ntawm kuv tus tub qhe Sidney Rigdon txhais tes, thiab koj yuav tau txais kuv tus Ntsuj Plig, uas yog tus Vaj Ntsuj Plig Dawb Huv, uas twb yog tus Nplij Siab, uas yuav qhia tej yam kaj siab lug ntawm lub nceeg vaj rau koj;
3 Thiab koj yuav tsum muab txoj moo zoo tshaj tawm nrog lub suab nrov nrov, hais tias: Hauxanas, cia li qhuas tus Vajtswv uas siab tshaj plaws lub npe.
4 Thiab nim no kuv hu koj thiab muab lo lus txib no rau koj ntsig txog txhua tus neeg—
5 Hais tias tag nrho cov uas yuav los rau ntawm kuv ob tug tub qhe Sidney Rigdon thiab Joseph Smith, tus Hluas, los txais hlo txoj kev hu thiab lus txib no, ces yuav muab lawv tsa thiab xa mus tshaj tawm txoj moo zoo uas kav ib txhis rau tej haiv neeg—
6 Tshaj loo kev hloov siab lees txim, hais tias: Cawm nej tus kheej tawm ntawm tiam neeg qias no, thiab khiav tawm hauv lub cub tawg, cia li ntxub tej khaub ncaws uas ceb los ntawm sab cev nqaij daim tawv.
7 Thiab yuav tsum muab txoj lus txib no rau cov txwj laug ntawm kuv lub koom txoos, thiaj li tsa tau thiab xa txhua tus neeg uas ua ib lub siab txais txoj lus txib no mus, ib yam li kuv tau hais.
8 Kuv yog Yexus Khetos, Vajtswv Leej Tub; yog li ntawd, muab nej tej siv sia thiab kuv yuav los nrawm nroos rau hauv kuv lub tuam tsev. Twb yog li ntawd. Amees.