Tshooj 117
Kev tshwm sim uas tus Yaj Saub Joseph Smith tau txais, nyob hauv Far West, Missouri, lub Xya Hli Ntuj hnub tim 8, xyoo 1838, ntsig txog William Marks, Newel K. Whitney, thiab Oliver Granger lawv tej dej num thaum lub sij hawm ntawd.
1–9, Tus Tswv cov tub qhe yuav tsum txhob ntshaw tej khoom ntawm sab cev nqaij daim tawv, vim “tej khoom muaj nqis dab tsi rau tus Tswv?”; 10–16, Lawv yuav tsum tso txoj kev siab me pov tseg, thiab lawv tej kev txi yuav dawb ceev rau tus Tswv.
1 Tus Tswv hais tseeb li no rau kuv tus tub qhe William Marks, thiab kuj yog rau kuv tus tub qhe Newel K. Whitney thiab tias, cia nkawd ua nkawd tej hauj lwm kom tiav sai sai thiab mus ntawm thaj av Kirtland mus, ua ntej kuv, tus uas yog tus Tswv, yuav rov qab xa daus los rau hauv lub ntiaj teb dua.
2 Cia nkawd tsim los, thiab sawv, thiab tawm tuaj, thiab txhob nyob, vim kuv, tus uas yog tus Tswv, txib li ntawd.
3 Yog li ntawd, yog hais tias nkawd nyob tos ces yuav tsis zoo rau nkawd.
4 Cia nkawd hloov siab lees txim rau tag nrho nkawd tej kev txhaum, thiab rau tag nrho nkawd tej kev siab ntshaw luag tug, rau kuv pom, tus Tswv hais li; vim tej khoom muaj nqis dab tsi rau kuv? tus Tswv hais li.
5 Cia li muab tej khoom hauv Kirtland pauv mus them tej nuj nqis, tus Tswv hais li. Cia tej ntawd mus, tus Tswv hais li, thiab txhua yam uas tseem tshuav, khaws cia rau hauv neb txhais tes, tus Tswv hais li.
6 Es kuv tsis tau tsim tej noog saum ntuj, thiab tej ntses hauv dej hiav txwv, thiab tej tsiaj saum cov roob los? Kuv tsis tau tsim lub ntiaj teb los? Kuv tsis kav txoj hmoov ntawm tag nrho tej haiv neeg hauv lub ntiaj teb cov tub rog los?
7 Yog li ntawd, kuv yuav tsis ua kom tej chaw twm zeej hlav kaus thiab tawg paj, thiab kom txi nplua mias los? tus Tswv hais li.
8 Puas yog tsis muaj chaw txaus nyob saum tej roob Adas-oodais-Omas, thiab nyob tom tej tiaj nrag chaw Aulahas Sinehas, uas yog thaj av Adas tau nyob, es neb thiaj yuav ntshaw tej uas twb tsis tsim nqi, thiab tsis quav ntsej txog tej yam uas raug nqi ntau tshaj?
9 Yog li ntawd, tuaj pem no rau thaj av ntawm kuv cov neeg, uas twb yog Xi-oos.
10 Cia kuv tus tub qhe William Marks rau siab ntso rau ob peb yam, ces nws yuav ua tus kav ntau yam. Cia nws tswj hwm nyob hauv kuv cov neeg nyob hauv lub nroog Far West, thiab cia nws tau koob hmoov los ntawm kuv cov neeg tej koob hmoov.
11 Cia kuv tus tub qhe Newel K. Whitney poob ntsej muag rau Nicolaitane pab neeg thiab rau tag nrho lawv tej kev qias ua ntsiag to, thiab rau tag nrho nws lub siab me me rau kuv pom, tus Tswv hais li, thiab tuaj rau pem thaj av Adas-oodais-Omas, thiab ua ib tug npisov rau kuv cov neeg, tus Tswv hais li, tsis yog los ntawm lub npe tiam sis los ntawm tej num, tus Tswv hais li.
12 Thiab ntxiv, kuv hais rau nej tias, kuv nco ntsoov kuv tus tub qhe Oliver Granger; saib seb, kuv hais tseeb rau nws hais tias yuav nco qab dawb ceev txog nws lub npe ntawm ib tiam neeg mus rau ib tiam neeg, mus ib txhiab thiab ib txhis, tus Tswv hais li.
13 Yog li ntawd, cia kom nws mob siab ua hauj lwm rau txoj kev txhiv Thawj Pawg Thawj Tswj Hwm ntawm kuv lub Koom Txoos dim, tus Tswv hais li; thiab thaum nws qaug nws yuav rov qab sawv dua, vim nws txoj kev txi yuav dawb ceev rau kuv dua li nws tej kev vam meej, tus Tswv hais li.
14 Yog li ntawd, cia nws tuaj pem no nrawm nroos, tuaj rau thaj av Xi-oos; thiab thaum txog lub sij hawm uas pom zoo lawm yuav muab nws ua ib tug tub lag luam rau kuv lub npe, tus Tswv hais li, rau txoj kev muaj nuj nqis rau kuv cov neeg.
15 Yog li ntawd tsis txhob cia leej twg saib tsis taus kuv tus tub qhe Oliver Granger, tiam sis cia tej koob hmoov ntawm kuv cov neeg los rau nws mus ib txhiab thiab ib txhis.
16 Thiab ntxiv, kuv hais tseeb rau nej tias, cia tag nrho kuv cov tub qhe nyob hauv thaj av Kirtland nco ntsoov tus Tswv lawv tus Vajtswv, thiab kuv lub tsev thiab, kom ceev thiab tshwj dawb huv, thiab muab tej neeg pauv nyiaj ntiab tawm thaum txog lub sij hawm kuv pom zoo, tus Tswv hais li. Twb yog li ntawd. Amees.