1 Hnub no ib pawg sab laj ntawm nees nkaum plaub tug pov thawj hlob tau txoos nyob hauv Joseph Smith, tus Hluas lub tsev, los ntawm kev tshwm sim, thiab tau tsim pawg sab laj hlob ntawm Khetos lub koom txoos, uas muaj kaum ob tug pov thawj hlob, thiab ib tug los sis peb tug thawj tswj hwm li tej zaum yuav tsum muaj.

2 Tus Tswv tau muab pawg sab laj hlob tsa los ntawm kev tshwm sim rau lub hom phiaj los daws tej kev cov nyom tseem ceeb uas tej zaum yuav muaj nyob hauv lub koom txoos, uas daws tsis tau los ntawm lub koom txoos los sis tus npisov pawg sab laj kom zoo ob tog siab.

3 Pawg sab laj tau hais lus pom zoo rau Joseph Smith, tus Hluas, Sidney Rigdon thiab Frederick G. Williams ua pawg thawj tswj hwm; thiab tag nrho pawg sab laj hais lus pom zoo xaiv Joseph Smith, tus Laus, John Smith, Joseph Coe, John Johnson, Martin Harris, John S. Carter, Jared Carter, Oliver Cowdery, Samuel H. Smith, Orson Hyde, Sylvester Smith, thiab Luke Johnson, uas yog pov thawj hlob, los ua pawg sab laj nyob mus li rau lub koom txoos.

4 Pawg sab laj tau nug cov neeg sab laj uas tau hais npe saum toj no tom qab ntawd saib lawv puas txais lawv tej hauj lwm tsa, thiab saib lawv puas yuav ua lub luag hauj lwm ntawd raws li txoj kev cai saum ntuj, rau qhov ntawd lawv sawv daws tau teb hais tias lawv txais lawv tej hauj lwm tsa, thiab yuav ua lawv tej hauj lwm raws li Vajtswv lub hwj chim tau muab rau lawv.

5 Sawv daws cov koom ua pawg sab laj, cov uas tau pov suab los ntawm lub koom txoos lub npe thiab rau lub koom txoos ntawm kev tsa cov sab laj tau hais npe saum toj no yog muaj plaub caug peb leeg, raws li no: cuaj tug pov thawj hlob, kaum xya tus txwj laug, plaub tug pov thawj, thiab kaum peb tug mej zeej.

6 Tau pov suab: hais tias tsis pub pawg sab laj hlob muaj hwj chim ua dab tsi yog tsis muaj xya leej ntawm cov sab laj hais npe saum toj no, los yog cov tau tsa raws cai los sawv lawv chaw.

7 Xya tus no yuav muaj hwj chim tsa lwm cov pov thawj hlob, cov uas lawv pom tias tsim nyog thiab muaj peev xwm ua hauj lwm sawv cev rau cov sab laj tsis tuaj.

8 Tau pov suab: hais tias yog thaum twg muaj chaw seem vim yog kev tuag, kev rho tawm lub luag hauj lwm vim kev ua txhaum, los sis tsiv tawm ntawm pawg ntseeg no tej ciaj ciam av kev tswj hwm mus, ntawm tus sab laj twg los xij uas tau hais npe saum toj no, ces tus thawj tswj hwm los sis cov thawj tswj hwm yuav tsum xaiv ib tug los txum qhov chaw ntawd, thiab pawg sab laj ntawm cov pov thawj hlob lub suab yuav tsum pom zoo, sib txoos rau lub hom phiaj ntawd, los ua hauj lwm los ntawm lub koom txoos lub npe.

9 Tus thawj tswj hwm ntawm lub koom txoos, tus uas kuj yog thawj tswj hwm ntawm pawg sab laj, yog tsa los ntawm kev tshwm sim, thiab cov ntseeg lub suab tau pom zoo nws txoj kev tswj hwm.

10 Thiab yog raws li nws lub luag hauj lwm tseem ceeb uas nws yuav tsum tswj pawg sab laj ntawm lub koom txoos; thiab yog nws lub cib fim kom muaj dua ob tug thawj tswj hwm pab nws thiab, uas muab tsa los raws li tib tug txheej txheem uas siv kom tsa nws tus kheej.

11 Thiab yog zaum uas nkawd ib tug los yog nkawd ob leeg uas tau muab tsa los pab nws ho tsis nyob lawm, nws muaj hwj chim tswj hwm pawg sab laj txawm tias tsis muaj ib tug pab cuam; thiab yog nws tus kheej ho tsis nyob lawm, ob tug thawj tswj hwm ntawd muaj hwj chim tswj hwm sawv nws cev, nkawd ob leeg tib si los sis nkawd ib tug.

12 Thaum twg uas sib sau tau ib pawg sab laj hlob ntawm Khetos lub koom txoos raws li tau npaj, raws li tus txheej txheem hais tas los, ces yog kaum ob tug sab laj tej dej num los mus rho ntawv raws cov zauv, thiab los ntawm qhov no thiaj paub meej saib leej twg ntawm lawv kaum ob leeg yuav hais lus ua ntej, pib ntawm tus thib ib thiab sib lawv mus li no kom txog tus thib kaum ob.

13 Thaum twg los xij uas pawg sab laj no pib sib tham txog ib txub dab tsi, kaum ob tug sab laj yuav tsum xav saib yog ib txub nyuaj los tsis nyuaj; yog hais tias tsis nyuaj, ces ob leeg ntawm cov sab laj los hais lus txog xwb, raws li tus txheej txheem tau sau tseg saum toj no.

14 Tiam sis yog xav hais tias yuav nyuaj, ces yuav tsum xaiv plaub leeg los hais; thiab yog hais tias nyuaj tshaj, ces rau leej; tiam sis yuav tsum tsis txhob muaj ib zaug twg uas xaiv tshaj li rau tus los hais lus.

15 Tus raug liam, nyob rau txhua txub, muaj cai tau ib nrab ntawm pawg sab laj, kom txhob muaj kev hais lus saib tsis taus los yog kev tsis txim lij.

16 Thiab cov sab laj uas muab tsa los hais lus rau pawg sab laj yuav tsum piav txub ntawd, tom qab ntsuam xyuas tej lus pov thawj, los ntawm qhov tseeb rau pawg sab laj; thiab txhua tus neeg yuav tsum hais lus raws li txoj kev ncaj thiab txim lij.

17 Cov sab laj uas rho tau cov zauv txooj, uas yog 2, 4, 6, 8, 10, thiab 12, ces yog cov yuav tsum sawv ntsug sawv cev rau tus raug liam, thiab kom txhob muaj kev hais lus saib tsis taus los yog kev tsis txim lij.

18 Nyob rau txhua txub tus liam thiab tus raug liam yuav muaj cib fim hais lus lawv tus kheej rau pawg sab laj, tom qab tau hnov tej lus pov thawj thiab cov sab laj uas muab tsa los hais lus txog txub ntawd tau hais lawv tej lus tas lawm.

19 Tom qab tau hnov tej lus pov thawj, cov sab laj, tus liam thiab tus raug liam tau hais lus, ces tus thawj tswj hwm yuav txiav txim raws li nws txoj kev to taub txub ntawd, thiab hais rau kaum ob leeg sab laj kom pov lawv lub suab pom zoo rau nws txoj kev txiav txim.

20 Tiam sis yog hais tias cov sab laj uas tseem tshuav, uas tsis tau hais lus, los yog lawv leej twg los xij, tom qab mloog tej lus pov thawj thiab tej lus hais uas ncaj tag, yog nrhiav tau qhov uas tus thawj tswj hwm txiav txim ua yuam kev, lawv muaj peev xwm qhia txog qhov ntawd, thiab txub ntawd yuav muaj kev rov sib hais mloog dua.

21 Thiab yog hais tias, tom qab kev ua tib zoo rov sib hais mloog dua, yog leej twg qhia tej yam tseeb ntxiv txog txub ntawd, ces yuav tsum muab txoj kev txiav txim hloov kom raws li qhov ntawd.

22 Tiam sis yog tsis muaj leej twg qhia tej yam tseeb ntxiv, ces yuav ua raws li thawj txoj kev txiav txim, feem coob ntawm pawg sab laj muaj hwj chim txiav txim ib yam li ntawd.

23 Yog muaj kev cov nyom ntsig txog lus qhuab qhia los sis ntsiab cai, yog hais tias tsis muaj tej ntaub ntawv sau txaus los hais kom txub ntawd meej rau pawg sab laj lub siab, tus thawj tswj hwm yuav nug thiab txais tus Tswv lub siab xav los ntawm kev tshwm sim.

24 Cov pov thawj hlob, thaum nyob deb, lawv muaj hwj chim los hu thiab tsim ib pawg sab laj raws li tus txheej txheem tau hais los, los daws tej kev cov nyom, thaum ob tog neeg los yog lawv ib tog tau thov kom muaj li ntawd.

25 Thiab pawg sab laj ntawm cov pov thawj hlob tau hais no yuav muaj hwj chim tsa ib tug ntawm lawv pawg ntawd los tswj hwm pawg sab laj rau lub sij hawm ntawd.

26 Yog pawg sab laj uas hais no tej dej num kom xa ib daim ntawv, tam sim ntawd, hais txog tej lawv ua, nrog ib zaj lus tim khawv txhij txhua muab zwm nrog lawv txoj kev txiav txim, xa mus rau pawg sab laj hlob nyob nrog Thawj Pawg Thawj Tswj Hwm ntawm lub Koom Txoos.

27 Yog hais tias ob tog neeg los yog lawv ib tog ho tsis txaus siab rau txoj kev txiav txim ntawm pawg sab laj hais ntawd, ces lawv muaj peev xwm hais thov rau pawg sab laj hlob nyob nrog Thawj Pawg Thawj Tswj Hwm ntawm lub Koom Txoos, thiab muaj ib lub rooj sib hais dua, txub uas yuav coj raws li tus txheej txheem muab sau cia ua ntej, ib yam li tsis tau muaj kev txiav txim zoo li ntawd dua.

28 Pawg sab laj ntawm cov pov thawj hlob nyob deb no tsuas yog tsa los hais tej txub nyuaj tshaj plaws ntawm lub koom txoos tej teeb meem xwb; thiab tej txub uas niaj hnub muaj los yog dog dig xwb ces tsis txaus yuav tsa tej pawg sab laj li ntawd.

29 Cov pov thawj hlob uas ncig mus ua hauj lwm los yog nyob rau tid muaj hwj chim hais saib puas yuav tsum tsa ib pawg sab laj los tsis tsa.

30 Muaj kev sib txawv nyob rau ntawm pawg sab laj hlob los yog cov pov thawj hlob uas ncig mus ua hauj lwm, thiab pawg sab laj hlob uas ncig mus ua hauj lwm uas yog kaum ob tug thwj tim, thaum lawv tej kev txiav txim.

31 Kev txiav txim los ntawm pawg xub hais muaj peev xwm thov hais dua tau; tiam sis kev txiav txim los ntawm pawg hais tom qab yuav tsis tau.

32 Pawg hais tom qab txoj kev txiav txim tsuas yog cov tuam thawj coj ntawm lub koom txoos thiaj muaj peev xwm hais kom tshab dua xwb rau txub uas yog kev ua txhaum.

33 Pom zoo: hais tias tus thawj tswj hwm los yog cov thawj tswj hwm uas nyob nrog Thawj Pawg Thawj Tswj Hwm ntawm lub Koom Txoos yuav muaj hwj chim txiav txim siab saib tej txub zoo li ntawd, uas yuav thov hais dua, saib puas tsim nyog ncaj ncees rov sib hais mloog dua, tom qab ntsuam xyuas cov lus thov hais dua thiab tej pov thawj thiab zaj lus uas muab zwm nrog tuaj.

34 Ces tom qab ntawd kaum ob tug sab laj tau mus pov suab los yog pov ntawv, saib leej twg yuav hais lus ua ntej, thiab tau muaj raws li no: 1, Oliver Cowdery; 2, Joseph Coe; 3, Samuel H. Smith; 4, Luke Johnson; 5, John S. Carter; 6, Sylvester Smith; 7, John Johnson; 8, Orson Hyde; 9, Jared Carter; 10, Joseph Smith, tus Laus; 11, John Smith; 12, Martin Harris.Tom qab thov Vajtswv tag ces lub rooj sab laj tau xaus.