1 Txoj lus thiab lub Siab Nyiam ntawm tus Tswv ntsig txog lub Yeej Ixayees ntawm lawv txoj kev mus rau Sab Hnub Poob:

2 Cia tag nrho cov neeg ntawm Yexus Khetos lub Koom Txoos ntawm Tsoom Haiv Neeg Ntseeg hauv Hnub Nyoog Kawg, thiab cov uas mus nrog lawv, cia li tsa ua tej pwb pawg neeg, nrog ib txoj kev khi lus thiab kev cog lus kom ua raws li tag nrho tej lus txib thiab tej kev cai ntawm tus Tswv peb tus Vajtswv.

3 Cia li tsa tej pawg neeg muaj tus coj pawg ib puas leej, tus coj pawg tsib caug leej, thiab tus coj pawg kaum leej, nrog ib tug thawj tswj hwm thiab nws ob tug pab cuam nyob pem lawv hau, los ntawm txoj kev qhia ntawm Kaum Ob tug Thwj Tim.

4 Thiab peb txoj kev khi lus yuav zoo li no—hais tias peb yuav taug kev ua raws li tag nrho tej kab ke ntawm tus Tswv.

5 Cia txhua pawg neeg npaj tej nyuj nees, tej laub, tej khoom siv, tej khaub ncaws, thiab lwm yam khoom uas yuav tsum muaj rau thaum lawv tsiv, kom txhij txhua rau lawv tus kheej raws li lawv ua tau.

6 Thaum tsa tau pawg neeg lawm cia lawv muab tag nrho lawv lub zog mus, mus npaj rau cov uas tseem yuav nyob.

7 Cia txhua pawg neeg, nrog rau lawv cov thawj coj thiab thawj tswj hwm, txiav txim siab saib pes tsawg leej yuav muaj peev xwm mus rau lub caij nplooj ntoo hlav uas yuav los; tom qab ntawd xaiv cov neeg muaj zog thiab muaj peev xwm kom txaus, es coj tej nyuj nees, tej noob qoob noob loo, thiab tej cuab yeej ua teb, yog cov mus ua ntej mus npaj rau thaum cog qoob loo caij nplooj ntoo hlav.

8 Cia txhua pawg neeg nqa khoom sib npaug, raws li tej feem ntawm lawv tej teej tug, ntawm kev coj cov pluag, cov poj ntsuam, cov me nyuam ntsuag, thiab tsev neeg ntawm cov uas tau mus ua tub rog lawm, xwv kom lub suab quaj ntawm cov poj ntsuam thiab cov me nyuam ntsuag tsis txhob nce tuaj txog ntawm tus Tswv lub pob ntseg tawm tsam cov neeg no.

9 Cia txhua pawg neeg npaj tsev nyob, thiab tej liaj teb cog qoob loo, rau cov uas yuav nyob tom qab rau lub caij ntuj ziag no; thiab qhov no yog tus Tswv lub siab nyiam rau nws cov neeg.

10 Cia txhua tus neeg siv tag nrho nws lub hwj chim thiab teej tug tshem cov neeg no mus rau qhov chaw tus Tswv yuav tsa ib ceg txheem ntseeg ntawm Xi-oos.

11 Thiab yog nej ua qhov no nrog lub siab dawb, nrog tag nrho kev rau siab ntso, ces nej yuav tau koob hmoov; nej yuav tau koob hmoov los ntawm nej tej qaib npua, thiab nyuj nees, thiab ntawm nej tej liaj teb, thiab ntawm nej tej vaj tse, thiab ntawm nej cov tsev neeg.

12 Cia kuv ob tug tub qhe Ezra T. Benson thiab Erastus Snow tsa ib pawg neeg.

13 Thiab cia kuv ob tug tub qhe Orson Pratt thiab Wilford Woodruff tsa ib pawg neeg.

14 Thiab, cia kuv ob tug tub qhe Amasa Lyman thiab George A. Smith tsa ib pawg neeg.

15 Thiab tsa cov thawj tswj hwm, thiab tus coj pawg ib puas, thiab tus coj pawg tsib caug, thiab tus coj pawg kaum.

16 Thiab cia kuv cov tub qhe uas tus Tswv tsa lawm mus thiab qhia qhov no, uas yog kuv lub siab nyiam, rau cov ntseeg, xwv kom lawv yuav npaj txhij mus rau ib thaj av thaj yeeb.

17 Nej cia li mus thiab ua li kuv tau hais nej, thiab tsis txhob ntshai nej cov yeeb ncuab; vim lawv yuav tsis muaj hwj chim ua kom kuv txoj hauj lwm nres.

18 Yuav txhiv Xi-oos dim thaum txog lub sij hawm kuv pom zoo.

19 Thiab yog leej twg yuav nrhiav kev txhawb nws tus kheej, thiab tsis ua raws kuv tej lus ntuas, nws yuav tsis muaj hwj chim, thiab yuav muab nws txoj kev ruam qhia tawm los.

20 Nej cia li nrhiav; thiab ua raws li tag nrho nej tej kev cog lus ntawm ib tug nrog lwm tus; thiab tsis txhob ntshaw tej uas yog nej tus kwv tij li.

21 Ceev nej tus kheej tsis ua kev phem uas yog muab tus Tswv lub npe hais ua dog ua dig, vim kuv yog tus Tswv nej tus Vajtswv, uas twb yog nej poj koob yawm txwv tus Vajtswv, uas yog Anplaham thiab Ixaj thiab Yakhauj lawv tus Vajtswv.

22 Kuv yog tus uas tau coj cov neeg Ixayees tawm hauv thaj av Iyiv los; thiab kuv txhais npab twb xyab tawm nyob hauv hnub nyoog kawg, los cawm kuv cov neeg Ixayees.

23 Tsis txhob sib cav sib ceg ntxiv; tsis txhob hais lus phem ib leeg txog ib leeg ntxiv.

24 Tsis txhob qaug cawv ntxiv; thiab cia nej ib leeg tej lus txhawb nqa ib leeg.

25 Yog hais tias nej qiv dab tsi ntawm nej tus neeg zej zog, nej yuav tsum muab qhov uas nej tau qiv rov qab; thiab yog hais tias nej them rov qab tsis taus ces cia li ncaj nraim mus thiab qhia rau nej tus neeg zej zog paub, tsam nws rau txim rau nej.

26 Yog hais tias nej pom yam uas nej tus neeg zej zog tau ua poob lawm, nej yuav tsum rau siab nrhiav kom txog thaum nej rov qab muab rau nws tso.

27 Nej yuav tsum rau siab khaws tej uas nej muaj, kom nej yuav ua neeg saib xyuas uas muaj tswv yim; vim tej uas nej muaj yog lub txiaj ntsim uas tus Tswv nej tus Vajtswv pub dawb, thiab nej yog nws cov neeg saib xyuas.

28 Yog nej zoo siab, cia li qhuas tus Tswv nrog kev hu nkauj, nrog tej suab nkauj, nrog kev seev cev, thiab nrog kev thov qhuas thiab ua Vajtswv tsaug.

29 Yog nej muaj kev tu siab, cia li thov rau tus Tswv nej tus Vajtswv, kom nej tus ntsuj plig thiaj yuav xyiv fab.

30 Tsis txhob ntshai nej cov yeeb ncuab, vim lawv twb nyob hauv kuv txhais tes thiab kuv yuav ua raws li kuv lub siab xav rau lawv.

31 Kuv cov neeg yuav tsum raug txhua yam kev sim siab, kom lawv yuav npaj txhij los txais lub yeeb koob uas kuv muaj rau lawv, uas twb yog lub yeeb koob ntawm Xi-oos; thiab tus uas tsis kam ris kev qhuab ntuas ces tsis tsim nyog tau kuv lub nceeg vaj.

32 Cia tus uas tsis paub kawm laj lim tswv yim los ntawm kev txo nws lub hwj chim thiab thov tus Tswv nws tus Vajtswv, kom nws ob lub qhov muag yuav qhib kom nws yuav pom kev, thiab kom nws ob lub pob ntseg yuav cuab kom nws yuav hnov;

33 Vim twb tau xa kuv tus Ntsuj Plig mus rau hauv ntiaj teb mus ua rau cov neeg txo hwj chim thiab muaj siab xav ua zoo thiaj to taub, thiab mus rau txim rau cov tsis mloog Vajtswv lus.

34 Nej cov kwv tij tau xyeej nej thiab nej tej lus tim khawv, uas twb yog haiv neeg uas tau ntiab nej tawm;

35 Thiab nim no hnub ntawm lawv tej kev txom nyem twb los txog lawm, uas twb yog lub sij hawm tu siab, zoo li tus poj niam uas tab tom yuav yug me nyuam; thiab lawv tej kev tu siab yuav loj heev yog hais tias lawv tsis hloov siab lees txim nrawm nroos, muaj tseeb tiag, nrawm heev li.

36 Vim lawv tua cov yaj saub, thiab cov neeg uas tau xa mus rau lawv; thiab lawv tau ua rau tus tsis muaj kev txhaum nqaij ntuag ntshav nrog, uas quaj hauv av tuaj mus tawm tsam lawv.

37 Yog li ntawd, tsis txhob xav tsis thoob txog tej yam no, vim nej tseem tsis tau dawb huv; nej tseem ris tsis taus kuv lub yeeb koob; tiam sis nej yuav pom kuv lub yeeb koob yog hais tias nej rau siab ua raws li tag nrho kuv tej lus uas kuv tau muab rau nej, txij Adas lub caij nyoog los txog rau Anplaham, txij Anplaham los txog Mauxes, txij Mauxes los txog Yexus thiab nws cov thwj tim, thiab txij Yexus thiab nws cov thwj tim los txog Joseph Smith, tus uas kuv tau txuas lus nrog los ntawm kuv cov tim tswv, kuv cov tub qhe los txhawb pab, thiab los ntawm kuv tus kheej lub suab tawm saum ntuj los, kom nws coj kuv txoj hauj lwm los;

38 Lub hauv paus uas nws tau muab teeb, thiab nws rau siab ntseeg; thiab kuv coj nws los nyob nrog kuv tus kheej.

39 Ntau leej tau xav tsis thoob vim nws txoj kev tuag; tiam sis nws yeej yuav tsum muab nws cov ntshav los ntaus cim rau nws cov lus tim khawv, kom nws yuav tau lub sam xeeb thiab kom cov neeg phem yuav raug txim.

40 Puas yog kuv tsis tau cawm nej dim ntawm nej cov yeeb ncuab, puas yog ua li ntawd xwv kom kuv thiaj tseg tau kev ua tim khawv txog kuv lub npe?

41 Nim no, yog li ntawd, cia li mloog, auj nej uas yog neeg ntawm kuv lub koom txoos; thiab nej uas yog cov txwj laug cia li mloog ua ke; nej tau txais kuv lub nceeg vaj lawm.

42 Rau siab ntso ua raws li tag nrho kuv cov lus txib, tsam kev txiav txim los rau nej, thiab nej txoj kev ntseeg tso nej tseg, thiab nej cov yeeb ncuab kov yeej nej. Yog li ntawd ziag no tsis muaj dab tsi hais ntxiv. Amees thiab Amees.