Tshooj 17
Kev tshwm sim uas tus Yaj Saub Joseph Smith tau txais kom qhia Oliver Cowdery, David Whitmer, thiab Martin Harris, nyob hauv Fayette, New York, lub Rau Hli Ntuj xyoo 1829, ua ntej lawv pom cov phiaj uas sau ntawv rau saud uas ntim Phau Ntawv Maumoos cov ceev xwm txheej. Joseph thiab nws tus teev ntawv, uas yog Oliver Cowdery, tau kawm los ntawm cov lus txhais uas nyob hauv Phau Ntawv Maumoos cov phiaj hais tias yuav tsa muaj peb tug tim khawv tshwj xeeb (saib Ethaws 5:2–4; 2 Nifais 11:3; 27:12). Oliver Cowdery, David Whitmer, thiab Martin Harris lawv txais kev tshoov siab kom lawv xav tau los ua peb tug tim khawv tshwj xeeb. Tus Yaj Saub tau nug tus Tswv, thiab los ntawm lub Ulees thiab Thumees tus Tswv muab txoj kev tshwm sim no los teb rau nws.
1–4, Los ntawm txoj kev ntseeg Peb tug Tim Khawv yuav pom cov phiaj thiab lwm cov khoom dawb ceev; 5–9, Khetos ua tim khawv tias Phau Ntawv Maumoos yog los ntawm Vajtswv los.
1 Saib seb, kuv hais rau nej tias, nej yuav tsum vam khom rau kuv txoj lus, qhov uas yog hais tias nej ua li ntawd kawg siab kawg ntsws, nej yuav pom cov phiaj, thiab kuj yuav pom daim thaiv hauv siab, Lanpas rab ntaj, lub Ulees thiab Thumees, qhov uas tau muab rau Yales tus tij laug nyob saum lub roob, thaum nws sib tham nrog tus Tswv tim ntsej tim muag, thiab lub taw kev muaj txuj ci tseem ceeb uas tau muab rau Lihais thaum tseem nyob tom roob moj sab qhua, nyob ntawm ntug Dej Hiav Txwv Liab.
2 Thiab twb yog los ntawm nej txoj kev ntseeg nej thiaj yuav tau pom tej ntawd, twb yog los ntawm txoj kev ntseeg uas cov yaj saub thaum ub tau muaj.
3 Thiab tom qab uas nej muaj kev ntseeg, thiab nej lub qhov muag tau pom tej ntawd, nej yuav ua tim khawv txog tej ntawd, los ntawm Vajtswv lub hwj chim;
4 Thiab nej yuav ua li no xwv kom kuv tus tub qhe Joseph Smith, tus Hluas, thiaj tsis raug puas tsuaj, xwv kom kuv coj tau kuv lub hom phiaj ncaj ncees los mus rau noob neej los ntawm phau ntawv no.
5 Thiab nej yuav ua tim khawv hais tias nej tau pom tej ntawd lawm, twb zoo ib yam li kuv tus tub qhe Joseph Smith, tus Hluas, pom tej ntawd; vim yog los ntawm kuv lub hwj chim es nws thiaj tau pom tej ntawd, thiab twb yog vim nws muaj kev ntseeg.
6 Thiab nws tau txhais phau ntawv ntawd, twb yog feem uas kuv tau txib nws, thiab ib yam li nej tus Tswv thiab nej tus Vajtswv muaj sia zees nyob, phau ntawv ntawd yeej tseeb tiag.
7 Yog li ntawd, nej tau txais tib lub hwj chim, thiab tib txoj kev ntseeg, thiab tib lub txiaj ntsim zoo li nws.
8 Thiab yog nej ua raws li kuv tej lus txib kawg no, tej uas kuv tau muab rau nej, qhov rooj ntawm ntuj txiag teb tsaus yuav kov tsis yeej nej; vim kuv lub hwj chim yeej txaus rau nej, thiab yuav tsa nej sawv thaum txog hnub kawg.
9 Thiab kuv, Yexus Khetos, nej tus Tswv thiab nej tus Vajtswv, tau hais li rau nej, kom kuv yuav coj tau kuv lub hom phiaj ncaj ncees los mus rau noob neej. Amees.