Tshooj 63
Kev tshwm sim uas tus Yaj Saub Joseph Smith tau txais, nyob hauv Kirtland, Ohio, lub Yim Hli Ntuj hnub tim 30, xyoo 1831. Tus Yaj Saub, Sidney Rigdon, thiab Oliver Cowdery tau los txog rau hauv Kirtland thaum lub Yim Hli Ntuj hnub tim 27 tom qab lawv mus xyuas Missouri. Joseph Smith zaj keeb kwm piav txog txoj kev tshwm sim no hais tias: “Nyob rau lub caij thaum nyuam qhuav muaj lub Koom Txoos, tau muaj kev kub siab lug xav tau tus Tswv txoj lus txog txhua yam uas muaj ntiag tug rau peb txoj kev cawm seej; thiab xws li ziag no pom tias thaj av Xi-oos yog qhov uas tseem ceeb tshaj plaws ntawm sab cev nqaij daim tawv, kuv tau nug tus Tswv kom qhia ntxiv txog Haiv Neeg ntseeg txoj kev sib sau ua ke, thiab kev muas thaj av, thiab lwm yam.”
1–6, Ib hnub ntawm txoj kev npau taws yuav los rau cov neeg phem; 7–12, Tej cim yog muaj los ntawm kev ntseeg; 13–19, Cov muaj lub siab xav deev luag poj luag txiv yuav xyeej txoj kev ntseeg thiab raug muab pov rau hauv lub pas hluav taws; 20, Cov uas rau siab ntseeg yuav tau txais qub txeeg qub teg nyob hauv lub ntiaj teb uas hloov hlo; 21, Ib zaj qhia tag nrho tej uas muaj nyob rau saum lub Roob Hloov Hlo los tseem tsis tau qhia; 22–23, Cov uas mloog lus txais tej txuj ci uas neeg tsis paub txog lub nceeg vaj; 24–31, Yuav tsum muas tej qub txeeg qub teg hauv Xi-oos; 32–35, Tus Tswv tshaj tawm tej kev ua rog, thiab cov neeg phem tua cov neeg phem; 36–48, Haiv Neeg Ntseeg yuav tsum sib sau nyob rau hauv Xi-oos thiab nrhiav nyiaj mus txhim tsa Xi-oos; 49–54, Tus Tswv cog lus tias yuav muab koob hmoov rau cov uas rau siab ntseeg thaum txoj Kev Los Zaum Ob, thaum txoj Kev Sawv Rov Los, thiab thaum lub caij Milenias; 55–58, Hnub no yog ib hnub ceeb toom; 59–66, Cov uas tsis muaj cai muab tus Tswv lub npe hais ua dog ua dig.
1 Cia li mloog, auj nej cov neeg, thiab qhib nej lub siab thiab cov nyob deb los cuab pob ntseg; thiab nej cov uas hu nej tus kheej ua tus Tswv cov neeg cia li mloog, thiab hnov tus Tswv txoj lus thiab nws lub siab nyiam ntsig txog nej.
2 Muaj tseeb tiag, kuv hais tseeb tias, cia li mloog txoj lus ntawm tus uas nws txoj kev chim siab twb npau tawm tsam cov neeg phem thiab cov neeg ntxeev siab;
3 Tus uas yuav tshem txoj sia ntawm cov uas nws xav tshem, thiab tsom kwm txoj sia ntawm cov uas nws xav tsom kwm;
4 Tus uas txhim tsa raws li nws lub siab nyiam thiab siab ntshaw; thiab ua kom puas tsuaj thaum nws xav ua, thiab muaj peev xwm ntiab tus ntsuj plig mus rau hauv ntuj txiag teb tsaus.
5 Saib seb, kuv, tus uas yog tus Tswv, muab kuv lub suab hais, thiab cov neeg yuav tsum ua raws li kuv hais.
6 Yog li ntawd, kuv hais tseeb tias, kom cov neeg phem cia li ceev faj, thiab kom cov ntxeev siab ntshai thiab tshee hnyo; thiab kom cov tsis ntseeg kaw lawv di ncauj, vim hnub ntawm txoj kev npau taws yuav los rau lawv li khaub zig cua, thiab txhua tus tib neeg yuav paub hais tias kuv yog Vajtswv.
7 Thiab tus uas nrhiav tej cim yuav pom tej cim, tiam sis tsis yog rau txoj kev cawm seej.
8 Kuv hais tseeb rau nej tias, muaj cov nyob hauv nej uas nrhiav tej cim, thiab twb yeej muaj cov neeg zoo li ntawd txij puag thaum chiv keeb los lawm;
9 Tiam sis, saib seb, kev ntseeg tsis yog muaj los ntawm tej cim, tiam sis muaj tej cim los nrog cov uas ntseeg.
10 Muaj tseeb tiag, tej cim muaj los ntawm txoj kev ntseeg, tsis yog los ntawm neeg lub siab nyiam, los yog raws li lawv siab xav, tiam sis yog raws li Vajtswv lub siab nyiam.
11 Muaj tseeb tiag, tej cim muaj los ntawm txoj kev ntseeg, mus ua tej yam zoo kawg nkaus, yog tsis muaj txoj kev ntseeg ces tsis muaj neeg ua haum Vajtswv siab; thiab yog Vajtswv chim rau leej twg ces nws twb tsis txaus siab rau tus ntawd; yog li ntawd, nws tsis ua tej cim rau cov zoo li ntawd pom, tsuas yog ua nrog txoj kev npau taws kom lawv raug txim xwb.
12 Yog li ntawd, kuv, tus uas yog tus Tswv, tsis zoo siab rau cov nyob hauv nej uas tau nrhiav tej cim thiab tej txuj ci uas xav tsis thoob rau txoj kev ntseeg, thiab tsis yog rau txoj kev pab tib neeg kom kuv tau yeeb koob.
13 Txawm li ntawd los, kuv muab tej lus txib, thiab coob tus tau tig khiav deb ntawm kuv tej lus txib thiab tsis ua raws li tej ntawd.
14 Tau muaj ib co hauv nej uas yog neeg deev luag poj thiab neeg deev luag txiv; ib txhia uas tau tig khiav deb ntawm nej, thiab ib txhia tseem nyob nrog nej es yuav ua kom tshwm sim tom qab no mus.
15 Cia cov zoo li ntawd ceev faj thiab hloov siab lees txim sai sai, tsam kev txiav txim yuav los rau lawv li ib rab ntxiab, thiab yuav qhia txog lawv txoj kev ruam, thiab tej yam lawv ua yeej nrog lawv mus rau cov neeg qhov muag pom.
16 Thiab kuv hais tseeb rau nej tias, ib yam li kuv tau hais yav tas los, tus uas ntsia ib tug poj niam thiab xav nrog nws pw, los sis yog leej twg deev luag poj luag txiv nyob hauv nws lub siab, tus ntawd yuav tsis muaj tus Ntsuj Plig, tiam sis yuav xyeej txoj kev ntseeg thiab yuav ntshai.
17 Yog li ntawd, kuv, tus uas yog tus Tswv, tau hais tias cov uas ntshai, thiab cov tsis ntseeg, thiab tag nrho cov neeg dag, thiab cov uas nyiam thiab pheej dag, thiab cov neeg deev nkauj deev nraug, thiab cov ua khawv koob, yuav txais lawv feem nyob hauv lub pas uas kub hluav taws thiab leej faj, uas yog txoj kev tuag zaum ob.
18 Kuv hais tseeb tias, lawv yuav tsis muaj feem nyob hauv thawj txoj kev sawv rov los.
19 Thiab nim no saib seb, kuv, tus uas yog tus Tswv, hais rau nej tias nej tsis tau hloov kom tsis muaj txim, vim tseem muaj tej yam no nyob hauv nej.
20 Txawm li ntawd los, tus uas muaj kev ntseeg nyiaj mus thiab ua raws li kuv lub siab nyiam, tus ntawd yuav kov yeej, thiab yuav txais ib qho qub txeeg qub teg nyob hauv lub ntiaj teb ua nws tug thaum hnub hloov hlo los txog;
21 Thaum lub ntiaj teb yuav hloov hlo, raws li tus txheej txheem uas tau muab qhia rau kuv cov thwj tim nyob saum lub roob; nej tseem tsis tau paub tag nrho txog zaj no.
22 Thiab nim no, kuv hais tseeb rau nej tias, ib yam li kuv tau hais tias kuv yuav muab kuv lub siab nyiam qhia rau nej paub, saib seb kuv yuav muab qhia rau nej paub, tsis yog los ntawm txoj kev txib, vim muaj coob tus uas tsis sib zog ua raws li kuv tej lus txib.
23 Tiam sis rau tus uas ua raws li kuv tej lus txib los kuv yuav muab tej txuj ci uas neeg tsis paub txog kuv lub nceeg vaj rau tus ntawd, thiab tus ntawd yuav muaj cov dej uas muaj sia nyob hauv nws, txhawv tuaj mus rau txoj sia uas kav ib txhis.
24 Thiab nim no, saib seb, qhov no yog tus Tswv nej tus Vajtswv lub siab nyiam ntsig txog nws haiv neeg ntseeg, hais tias lawv yuav tsum mus txoos lawv tus kheej ua ke rau hauv thaj av Xi-oos, tsis txhob maj maj, nyob tsam muaj kev xav yuam kev, es yuav coj tej kab mob phem los.
25 Saib seb, thaj av Xi-oos—kuv, tus uas yog tus Tswv, tuav Xi-oos rau hauv kuv tus kheej ob txhais tes;
26 Txawm li ntawd los, kuv, tus uas yog tus Tswv, muab rau Xixas tej yam uas yog Xixas li.
27 Yog li ntawd, kuv uas yog tus Tswv xav kom nej muas tej av, kom nej yuav muaj qhov zoo tshaj neeg ntiaj teb, kom nej yuav muaj cai rau neeg ntiaj teb, kom lawv yuav tsis raug txhaub kom chim siab.
28 Vim Dab Ntxwg Nyoog muab tso rau hauv lawv lub siab kom chim siab tawm tsam nej, thiab ua kom nqaij ntuag ntshav nrog.
29 Yog li ntawd, yuav tsis tau thaj av Xi-oos tsuas yog muas los sis los ntawm ntshav nrog, tsis li ces yuav tsis muaj qub txeeg qub teg rau nej.
30 Thiab yog los ntawm txoj kev muas, saib seb nej tau koob hmoov.
31 Thiab yog hais tias los ntawm ntshav nrog, vim tus Tswv twb txwv tsis pub nej ua nqaij ntuag ntshav nrog, xyuas seb, nej cov yeeb ncuab yuav tawm tsam nej, thiab nej yuav raug nplawm nyob ib lub nroog mus rau ib lub, thiab ntawm ib lub tsev teev ntuj mus rau ib lub, thiab tsuas tshuav tsawg leej thiaj yuav txais ib qho qub txeeg qub teg.
32 Kuv, tus uas yog tus Tswv, yeej chim siab rau cov neeg phem; kuv cheem tus Ntsuj Plig tsis pub rau tej neeg hauv lub ntiaj teb.
33 Kuv npau taws kuv thiaj tau cog lus, thiab tau tshaj tawm tej kev ua rog nyob rau hauv lub ntiaj teb, thiab cov neeg phem yuav tua cov neeg phem, thiab kev ntshai yuav los rau txhua tus neeg.
34 Thiab haiv neeg ntseeg los kuj yuav luag tsis dim thiab; txawm li ntawd los, kuv, tus uas yog tus Tswv, nrog lawv nyob, thiab yuav los ntawm kuv Txiv xub ntiag saum ntuj ceeb tsheej los thiab yuav muab cov hluav taws uas tsis txawj tuag hlawv cov neeg phem.
35 Thiab saib seb, qhov no tseem tsis tau muaj, tiam sis tshuav tsis ntev.
36 Yog li ntawd, vim pom hais tias kuv, tus uas yog tus Tswv, tau tshaj tawm tag nrho tej yam no los rau hauv lub ntiaj teb, kuv xav kom kuv haiv neeg ntseeg yuav tsum mus sib txoos rau hauv thaj av Xi-oos;
37 Thiab kom txhua tus neeg yuav tsum tuav txoj kev ncaj ncees rau hauv nws ob txhais tes thiab coj txoj kev rau siab ntseeg rau ntawm nws duav, thiab tsa ib lub suab ceeb toom mus rau tej neeg hauv lub ntiaj teb; thiab tshaj tawm los ntawm kev hais lus thiab los ntawm kev khiav hais tias kev puas ntsoog yuav los rau cov neeg phem.
38 Yog li ntawd, cia kuv cov thwj tim nyob hauv Kirtland txheeb xyuas lawv tej khoom ntawm lub ntiaj teb no, cov uas nyob hauv thaj teb no.
39 Cia kuv tus tub qhe Titus Billings, tus uas saib xyuas thaj teb, muab thaj teb muag, kom nws yuav npaj rau lub caij nplooj ntoo hlav uas yuav los es nws yuav mus lawm pem thaj av Xi-oos, nrog cov nyob hauv thaj teb no, tsuas tseg cov uas kuv yuav tshwj tseg rau kuv tus kheej xwb, kom tsis txhob mus txog thaum kuv txib lawv tso.
40 Thiab muab tag nrho cov nyiaj uas muaj peev xwm tseg tau, nws tsis ua cas rau kuv txawm yog ntau los tsawg, muab xa mus rau pem thaj av Xi-oos, coj mus rau cov uas kuv tau xaiv kom los txais.
41 Saib seb, kuv, tus uas yog tus Tswv, yuav muab hwj chim rau kuv tus tub qhe Joseph Smith, tus Hluas, kom nws yuav muaj peev xwm paub tau los ntawm tus Ntsuj Plig hais tias cov twg yuav tsum mus lawm pem thaj av Xi-oos, thiab kuv cov thwj tim ntawd leej twg yuav tsum nyob.
42 Cia kuv tus tub qhe Newel K. Whitney tuav nws lub tsev muag khoom twj ywm, los yog hais tias, lub tsev muag khoom, rau ib nyuag ntus tso.
43 Txawm li ntawd los, cia nws muab tag nrho cov nyiaj uas nws muab tau, xa mus lawm pem thaj av Xi-oos.
44 Saib seb, tej yam no nyob ntawm nws tus kheej txhais tes, cia nws ua raws li laj lim tswv yim.
45 Kuv hais tseeb tias, cia li muab nws tsa ua ib tug sawv cev rau cov thwj tim uas yuav nyob, thiab cia li muab nws tsa rau lub hwj chim no;
46 Thiab nim no cia li mus xyuas cov pawg ntseeg tsuag tsuag, piav tej yam no rau lawv, nrog rau kuv tus tub qhe Oliver Cowdery. Saib seb, nov yog kuv lub siab nyiam, kom tau nyiaj raws li kuv tau qhia.
47 Tus uas rau siab ntseeg thiab nyiaj mus ces yuav kov yeej tej yam ntawm lub ntiaj teb.
48 Tus uas xa nyiaj txiag mus rau hauv thaj av Xi-oos yuav txais ib qho qub txeeg qub teg nyob hauv lub neej no, thiab tej yam nws ua yuav nrog nws mus, thiab kuj muaj nqi zog nyob hauv lub neej yuav los thiab.
49 Muaj tseeb tiag, thiab cov neeg tuag uas tuag rau tus Tswv tau koob hmoov, txij no mus txog thaum tus Tswv los, thiab tej yam qub yuav dhau mus, thiab txhua yam yuav tshiab tuaj, lawv yuav sawv hauv qhov tuag rov qab los thiab tom qab ntawd yuav tsis tuag, thiab yuav txais ib qho qub txeeg qub teg rau tus Tswv pom, nyob hauv lub nroog dawb huv.
50 Thiab tus uas tseem nyob thaum tus Tswv los, thiab tau ua raws nraim li txoj kev ntseeg, tus ntawd tau koob hmoov; txawm li ntawd los, twb tau teem kom nws tuag thaum muaj hnub nyoog.
51 Yog li ntawd, cov me nyuam yuav loj hlob kom txog thaum lawv laus; cov neeg laus yuav tuag; tiam sis lawv yuav tsis mus pw hauv av, tiam sis ib ntsais muag xwb lawv yuav hloov hlo.
52 Yog li ntawd, rau qhov no cov thwj tim thiaj tau tshaj tawm rau neeg ntiaj teb ntsig txog txoj kev sawv rov los ntawm cov neeg tuag.
53 Tej yam no yog tej yam uas nej yuav tsum nrhiav; thiab hais lus raws li tus Tswv hais, nim no twb yuav txog lub sij hawm rau tej yam no lawm, thiab nyob rau ib lub sij hawm yuav los, twb yog nyob rau hnub Neeg Leej Tub los.
54 Thiab ua ntej teev sij hawm ntawd yuav muaj cov hluas nkauj tsis muaj tswv yim nyob nrog cov uas muaj tswv yim; thiab nyob rau lub sij hawm ntawd yuav muaj ib txoj kev sib faib tag nrho ntawm cov neeg ncaj ncees thiab cov neeg phem; thiab nyob rau hnub ntawd kuv yuav xa kuv cov tim tswv los rho tshem tej neeg phem thiab muab lawv pov rau hauv hluav taws uas tsis txawj tuag.
55 Thiab nim no saib seb, kuv hais tseeb rau nej tias, kuv, tus uas yog tus Tswv, tsis zoo siab rau kuv tus tub qhe Sidney Rigdon; nws tau tsa nws tus kheej kom siab nyob hauv nws lub siab, thiab tsis kam mloog lus ntuas, tiam sis ua txhaum rau tus Ntsuj Plig;
56 Yog li ntawd tej uas nws sau twb tsis tsim nyog rau tus Tswv, thiab nws yuav tsum sau dua; thiab yog hais tias tus Tswv tsis txais, saib seb nws yuav tsis ua lub luag hauj lwm uas kuv tau tsa rau nws ua lawm.
57 Thiab ntxiv, kuv hais tseeb rau nej tias, cov uas muaj siab xav, nrog lub siab mos siab muag, xav mus ceeb toom cov neeg uas ua txhaum kom hloov siab lees txim, cia li muab lawv tsa rau lub hwj chim no.
58 Vim nov yog hnub ceeb toom, thiab tsis yog hnub yuav hais lus ntau. Vim kuv, tus uas yog tus Tswv, yeej yuav tsis pub luag thuam hauv hnub nyoog kawg.
59 Saib seb, kuv los saum ntuj los, thiab kuv lub hwj chim kav qab ntuj. Kuv twb kav txhua yam, thiab nyob hauv txhua yam, thiab tswj txhua yam, thiab xyuas txhua yam, thiab hnub ntawd yuav los uas kuv yuav tswj txhua yam.
60 Saib seb, kuv yog Alafas thiab Aumenkas, uas twb yog Yexus Khetos.
61 Yog li ntawd, cia txhua tus neeg ceev faj saib lawv siv kuv lub npe li cas los ntawm lawv di ncauj—
62 Vim saib seb, kuv hais tseeb tias, muaj ntau tus uas raug txim li no, cov uas siv tus Tswv lub npe, thiab muab nws lub npe siv ua dog ua dig, vim lawv tsis muaj cai.
63 Yog li ntawd, cia cov ntseeg hloov siab lees txim rau lawv tej kev txhaum, thiab kuv, tus uas yog tus Tswv, thiaj li yuav lawv; tsis li ces lawv yuav raug muab txiav tawm.
64 Nco ntsoov hais tias tej yam uas los saum ntuj los yeej dawb ceev, thiab yuav tsum ua tib zoo hais lus txog tej ntawd, thiab hais raws li tus Ntsuj Plig tej kev yaum; thiab yog ua li no ces twb tsis raug txim, thiab nej txais tus Ntsuj Plig los ntawm kev thov Vajtswv; yog li ntawd, yog tsis ua li no ces tseem muaj kev raug txim.
65 Cia kuv ob tug tub qhe, Joseph Smith, tus Hluas, thiab Sidney Rigdon, nrhiav ib lub tsev rau nkawd nyob, thaum nkawd txais kev qhia los ntawm kev thov Vajtswv los ntawm tus Ntsuj Plig.
66 Tseem tshuav tej yam no kom kov yeej tej yam no los ntawm kev ua siab ntev, kom lawv yuav txais tau yeeb koob puv npo uas ntau dua thiab nyob mus ib txhis, tsis li ces, yuav tau kev raug txim loj dua. Amees.