Kev ncaim ntawm Vajtswv thiab Nws lub hwj huam; tuag ntawm tej uas ntsig txog kev ncaj ncees. Luxifaws thiab ib feem peb ntawm tsoom neeg saum ntuj raug kev tuag ntawm sab ntsuj plig thaum lawv raug ntiab tawm ntawm ntuj ceeb tsheej mus (Q&K 29:36–37).
Adas txoj Kev Poob yog qhov uas qhib kev rau kev tuag ntawm sab ntsuj plig nyob hauv lub ntiaj teb (Mauxes 6:48). Cov neeg uas xav, hais lus, thiab ua tej hauj lwm phem twb tuag ntawm sab ntsuj plig thaum lawv tseem ua neej nyob hauv lub ntiaj teb (1Â Tim. 5:6). Los ntawm Yexus Khetos txoj Kev Theej Txhoj thiab los ntawm kev ua raws li cov ntsiab cai thiab cov kab ke ntawm txoj moo zoo, cov txiv neej thiab cov poj niam yuav muaj peev xwm hloov tau los ua neeg huv uas tsis muaj kev txhaum thiab kov yeej kev tuag ntawm sab ntsuj plig.
Kev tuag ntawm sab ntsuj plig kuj muaj tom qab kev tuag ntawm lub cev nqaij daim tawv. Cov neeg uas sawv rov los lawm thiab tus dab phem thiab cov tim tswv yeej yuav raug txiav txim. Cov uas txhob txwm ntxeev siab tawm tsam txoj kev kaj thiab qhov tseeb ntawm txoj moo zoo yuav raug kev tuag ntawm sab ntsuj plig. Kev tuag no lawv hu ua kev tuag zaum ob (Amas 12:16; Hlm. 14:16–19; Q&K 76:36–38).