Phau Ntawv Maumoos

Ib phau ntawm plaub phau vaj lug kub uas Yexus Khetos lub Koom Txoos ntawm Tsoom Haiv Neeg Ntseeg hauv Hnub Nyoog Kawg lees txais. Yog ib tug yaj saub thaum ub hu ua Maumoos sau tej zaj ntsiab lus ntawm cov neeg nyob hauv Amelikas puag thaum ub cov ceev xwm txheej. Tau sau phau no kom ua tim khawv tias Yexus yog tus Khetos. Tus Yaj Saub Joseph Smith, uas yog tus uas txhais phau no los ntawm Vajtswv lub txiaj ntsim thiab lub hwj chim, tau hais txog phau ceev xwm txheej no hais tias, “Kuv tau hais rau cov kwv tij tias Phau Ntawv Maumoos yog phau uas raug tshaj txhua phau ntawv nyob hauv ntiaj teb no, thiab yog lub plawv zeb ntawm peb txoj kev teev ntuj, thiab tus neeg uas ua raws li phau ntawv no tej lus ntsiab cai yuav txav tau los ze rau Vajtswv dua lwm phau ntawv.” (saib zaj qhia tus uas nyeem hauv Phau Ntawv Maumoos).

Phau Ntawv Maumoos yog ib phau ceev xwm txheej txog kev teev ntuj ntawm peb pawg neeg uas tsiv teb tsaws chaw tawm ntawm Sab Ntuj Qub mus rau sab ntuj Amelikas. Cov yaj saub uas sau lawv tej keeb kwm txog kev teev ntuj thiab kev ua ub ua no hauv cov phiaj hlau yog cov uas coj peb pawg neeg no. Phau Ntawv Maumoos qhia txog lub sib hawm uas Yexus Khetos tuaj xyuas cov neeg hauv Amelikas tom qab Nws txoj Kev Sawv Rov Los. Tom qab Khetos tuaj xyuas lawv, cov neeg no muaj kev thaj yeeb tau ob puas xyoo.

Maulaunais, cov Neeg Nifais tus yaj saub thiab tus kws sau keeb kwm kawg, muab cov ntsiab lus ntawm cov ceev xwm txheej txog cov neeg no foob thiab tau muab zais ze rau xyoo 421 tom qab Yexus yug los. Xyoo 1823, Maulaunais uas sawv rov los lawm los xyuas Joseph Smith thiab tau muab cov ceev xwm txheej thaum ub uas dawb ceev rau nws kom nws muab txhais thiab coj mus rau neeg ntiaj teb los ua ib zaj lus tim khawv ntxiv txog Yexus Khetos.