Povlauj tej Tsab Ntawv

Povlauj sau tej tsab ntawv rau cov Neeg Thexalaunikes los ntawm Kauleethaus thaum nws ua tub txib zaum thib ob. Tau sau txog nws txoj hauj lwm nyob hauv lub nroog Thexalaunikes nyob hauv tshooj 17 ntawm Tes Hauj Lwm. Nws xav rov qab los rau Thexalaunikes, tiam sis nws los tsis tau (1 The. 2:18). Vim li ntawd nws xa Timautes mus ua kom cov neeg hloov siab los ntseeg muaj kev zoo siab thiab rov qab los qhia nws seb lawv nyob li cas. Thawj tsab ntawv yog qhov uas tshwm sim vim nws muaj kev ua tsaug puv npo thaum Timautes rov qab los. Tau sau tsab ntawv thib ob tsis ntev tom qab ntawd.

Povlauj sau tej tsab ntawv rau cov Neeg Kauleethaus thaum nws ua tub txib zaum thib peb kom teb cov lus nug thiab kho tej kev kub ntxhov uas Haiv Neeg Ntseeg muaj nyob hauv Kauleethaus.

Tej zaum tau sau tsab ntawv rau cov Neeg Kalatias rau ntau pawg ntseeg hauv lub Koom Txoos nyob thoob plaws Kalatias. Ib txhia mej zeej ntawm lub Koom Txoos tau tso txoj moo zoo tseg vim lawv xav coj txoj kev cai Yudais. Nyob hauv tsab ntawv no, Povlauj piav txog lub ntsiab ntawm Mauxes txoj kev cai thiab qhov nuj nqis ntawm ib txoj kev teev ntuj sab ntsuj plig.

Povlauj sau tsab ntawv rau cov Neeg Loos los ntawm Kauleethaus, kom npaj Haiv Neeg Ntseeg Loos rau thaum nws mus xyuas lawv li nws tau cia siab. Tsab ntawv no kuj rov qab qhia tias cov lus qhuab qhia uas ib txhia Neeg Yudais uas tau hloov siab los ntseeg Khetos tsis ntseeg yeej muaj tseeb.

Povlauj sau tej tsab ntawv no thawj zaus uas nws nyob hauv lub tsev kaw hauv Loos.

Feem ntau Povlauj sau tsab ntawv rau cov Neeg Filipis kom qhia nws kev zoo siab ua tsaug thiab kev hlub tshua rau Haiv Neeg Ntseeg Filipis thiab kom ua lawv zoo siab tsis txhob poob siab vim nws tau raug kaw ntev heev.

Povlauj sau tsab ntawv rau cov Neeg Kaulauxais vim nws tau hnov xov xwm tias Haiv Neeg Ntseeg Kaulauxais tab tom ua yuam kev loj. Lawv ntseeg tias yus ua tau neeg zoo tag nrho thaum yus tib zoo ua tej kab ke uas ua nyob sab nraud tsis yog thaum yus coj raws li Khetos tej cwj pwm kom muaj ntxiv.

Tsab ntawv rau cov Neeg Efexus tseem ceeb heev, vim tab ntawv no muaj Povlauj tej kev qhia txog Khetos lub Koom Txoos.

Tsab ntawv rau Filemaus yog ib tsab ntawv rau ib tug neeg xwb uas hais txog Auneximus, ib tug qhev uas tau nyiag ntawm nws tus tswv, Filemaus, thiab khiav mus rau Loos. Povlauj xa Auneximus rov qab mus rau nws tus tswv nrog tsab ntawv uas thov kom zam txim rau Auneximus.

Povlauj sau tsab ntawv rau cov Neeg Henplais rau lub Koom Txoos cov mej zeej Yudais kom yaum lawv tias Khetos ua kom muaj raws li Mauxes txoj kev cai tiav lawm thiab Khetos txoj kev cai ntawm txoj moo zoo tau pauv Mauxes txoj kev cai chaw lawm.

Povlauj sau tej tsab ntawv no tom qab lawv muab nws tso tawm ntawm lub tsev kaw hauv Loos.

Povlauj mus rau Efexus, qhov chaw uas nws cia Timautes nyob kom txwv ib txhia ntawm tej kev tsis ntseeg uas tab tom loj tuaj, thiab Povlauj xav tias tom qab ntawd nws mam li rov qab los rau Efexus. Nws sau nws thawj tsab ntawv rau Timautes, tej zaum los ntawm Makedaunias, kom ntuas thiab txhawb nqa nws kom ua nws qhov dej num tiav.

Povlauj sau tsab ntawv rau Titus thaum ib lub caij uas nws tsis nyob hauv lub tsev kaw. Tej zaum nws mus xyuas Keletes, qhov chaw uas Titus ua hauj lwm pab. Feem ntau tsab ntawv hais txog txoj kev ua neej ncaj ncees thiab txoj kev cob qhia nyob hauv lub Koom Txoos.

Povlauj sau nws tsab ntawv thib ob rau Timautes thaum nws nyob hauv lub tsev kaw zaum thib ob, tsis ntev ua ntej luag muab Povlauj tua vim txoj kev ntseeg. Tsab ntawv no muaj Povlauj cov lus kawg thiab qhia txog nws txoj kev ua siab loj thiab kev tso siab uas nws muaj thaum nws yuav tuag.