Ntoo Khaub Lig, Ntsia Saum

Ib qho uas cov neeg Loos siv muab neeg tua pov tseg, uas lawv ua ntau thaum lub caij nyoog hauv Phau Tshiab, thaum ua li no lawv khi los sis ntsia pas hlau rau hauv tus neeg uas muab tua ntawd txhais tes thiab txhais taw rau saum ib tug ntoo khaub lig. Feem ntau tsuas ua li no rau cov tub qhev thiab cov neeg uas txhaum kev cai loj tshaj plaws. Feem ntau ua ntej muab neeg ntsia saum ntoo khaub lig yuav muab lawv nplawm los sis tsim txom (Mak. 15:15). Feem ntau lawv yuam tus neeg uas yuav muab ntsia saum ntoo khaub lig ntawd ev nws tus ntoo khaub lig mus rau qhov chaw uas yuav muab nws tua pov tseg ntawd (Yhs. 19:16–17). Feem ntau cov tub rog uas ua raws li txoj kev tsub txim ntawd tau yuav nws cov khaub ncaws (Mat. 27:35). Tau txhom tus ntoo khaub lig hauv av xwv kom tus neeg ntawd ob txhais ko taw nyob li ib ob fiv sab saum daim av. Cov tub rog tau zov tus ntoo khaub lig txog thaum tus neeg ntawd tuag, tej thaum yuav ntev npaum li peb hnub diam (Yhs. 19:31–37).

Yexus Khetos raug ntsia saum ntoo khaub lig vim rau qhov ib co neeg uas tsis ntseeg liam cuav hais tias Nws tawm tsam Xixas thiab hais lus saib tsis taus Vajtswv vim Nws hais tias Nws yog Vajtswv Leej Tub. Tau muab ib lub tsho ntev tsam xem (Yhs. 19:2), thiab hmab pos ua kauj looj rau Yexus, thiab hais lus thuam Yexus (Mat. 26:67; Mak. 14:65).