Ixayees
Tus Tswv tau tis lub npe Ixayees rau Yakhauj, Ixaj tus tub thiab Anplaham tus tub xeeb ntxwv nyob hauv Phau Qub (Chk. 32:28; 35:10). Lub npe Ixayees hais txog Yakhauj, nws cov xeeb leej xeeb ntxwv, los sis lub nceeg vaj uas cov xeeb leej xeeb ntxwv ntawd nyob hauv Phau Qub (2 Xam. 1:24; 23:3). Tom qab Mauxes coj Ixayees cov me nyuam tawm ntawm txoj kev ua qhev rau cov neeg Iyiv (Khd. 3–14), cov tub txiav txim kav lawv tshaj peb puas xyoo. Txij thaum Vaj Ntxwv Xa-ules, cov vaj ntxwv kav Ixayees mus txog thaum Xalumoos tas sim neej, thaum kaum xeem neeg ntxeev siab khiav ntawm Lehaunpau-as mus tsa lawv ib haiv neeg. Thaum lub nceeg vaj Ixayees raug muab faib, cov xeem neeg nyob sab qaum teb, uas muaj neeg coob zog, tseem tuav lub npe Ixayees, tiam sis lub nceeg vaj sab qab teb hu ua Yudas. Thaj av Kana-as kuj hu ua Ixayees niaj hnub no thiab. Ib lub ntsiab ntxiv, Ixayees txhais hais tias yog ib tug ntseeg Khetos tiag (Loos 10:1; 11:7; Kal. 6:16; Efe. 2:12).
Kaum ob xeem neeg Ixayees
Anplaham tus tub xeeb ntxwv Yakhauj, uas lub npe tshiab hu ua Ixayees, tau muaj kaum ob tug tub. Lawv tej xeeb leej xeeb ntxwv yog kaum ob xeem neeg Ixayees los sis Ixayees cov me nyuam. Nov yog kaum ob xeem neeg: Lunpees, Xime-oos, Levis, Yudas, Ixakhas, thiab Xenpuloos (Yakhauj thiab Le-as cov tub); Das thiab Nathalis (Yakhauj thiab Npilehas cov tub); Khas thiab Aseles (Yakhauj thiab Xilepas cov tub); Yauxej thiab Npeyamis (Yakhauj thiab Laxees cov tub) (Chk. 29:32–30:24; 35:16–18).
Yakhauj tau foom koob hmoov rau txhua xeem neeg tus thawj coj ua ntej nws tuag (Chk. 49:1–28). Yog xav kawm ntxiv, saib txhua lub npe ntawm Yakhauj cov tub.
Lunpees, yog Yakhauj thawj tus poj niam, Le-as, tus tub hlob, es nws tsis tau txoj koob hmoov ntawm txoj cai ua tus hlob thiab poob cov qub txeeg qub teg ob npaug vim yog txoj kev tsis ua ncaj ncees (Chk. 49:3–4). Ces txoj cai ua tus hlob mus rau Yauxej, uas yog Yakhauj tus poj niam thib ob, Laxees, tus tub hlob (1 Xvn. 5:1–2). Levis, uas yog xeem neeg uas tus Tswv tau xaiv los ua cov uas txhawb pab ntawm Nws lub pov thawj hwj, tsis tau txais lawv qub txeeg qub teg vim rau qhov lawv muaj txoj hauj lwm tshwj xeeb kom pab txhua xeem neeg. Yog li ntawd Yauxej qub txeeg qub teg los muaj ob npaug faib rau Yauxej ob tug tub, Efala-is thiab Manaxes (1 Xvn. 5:1; Yel. 31:9), uas suav tias yog ob xeem neeg Ixayees tsis yog tib pab (JST, Chk. 48:5–6 [Cov Ntawv Ntxiv Tom Kawg]).
Cov mej zeej hauv xeem neeg Yudas yuav tsum kav teb kav chaw kom txog thaum tus Mexiyas los (Chk. 49:10; JST, Chk. 50:24 [Cov Ntawv Ntxiv Tom Kawg]). Thaum hnub nyoog kawg xeem neeg Efala-is yuav muaj lub cib fim nqa tsab xov ntawm txoj Kev Muab Txoj Moo Zoo Txum Tim Rov Qab Los mus rau lub ntiaj teb thiab sau Ixayees uas tau tawg khiav ri niab los ua ke (2 Kev. 33:13–17). Lub sij hawm twb yuav los uas, los ntawm Yexus Khetos txoj moo zoo, Efala-is yuav muaj txoj hauj lwm ua thawj coj muab txhua xeem neeg Ixayees sau los ua ke (Yay. 11:12–13; Q&K 133:26–34).
Ixayees txoj kev tawg khiav ri niab
Tus Tswv ua rau kaum ob xeem neeg Ixayees tawg khiav ri niab thiab txom nyem vim lawv txoj kev ua tsis ncaj ncees thiab kev ntxeev siab. Txawm li ntawd los, tus Tswv kuj siv txoj kev tawg khiav ri niab mus nyob thoob plaws ntiaj teb ntawm Nws cov neeg uas Nws tau xaiv no los foom koob hmoov rau tej haiv neeg ntawd.
Txoj kev sau Ixayees los ua ke
Tus Tswv yuav muab tsev neeg Ixayees sau los ua ke hauv hnub nyoog kawg ua ntej Khetos los (TNKN 1:10). Tus Tswv sau Nws cov neeg Ixayees thaum lawv txais Nws thiab ua raws li Nws tej lus txib.
Kaum xeem neeg Ixayees uas tau ploj lawm
Kaum xeem neeg Ixayees yog cov neeg uas nyob hauv lub nceeg vaj Ixayees sab qaum teb thiab raug txhom cab mus rau hauv Axilias 721 xyoos ua ntej Yexus yug los. Thaum lub sij hawm ntawd lawv mus rau tej “teb chaws qaum teb” thiab luag tej tsis paub tias lawv nyob qhov twg. Nyob hauv hnub nyoog kawg lawv yuav rov qab los.