Lus Qhuab Qhia thiab Kev Khi Lus

Ib phau uas muaj tej kev tshwm sim thiab tej lus qhia uas los saum ntuj los nyob hauv hnub nyoog kawg. Tus Tswv muab cov lus no rau Joseph Smith thiab rau ob peb tug ntawm cov uas los hloov nws chaw rau txoj kev txhim tsa thiab txoj kev coj Vajtswv lub nceeg vaj nyob hauv lub ntiaj teb hauv hnub nyoog kawg. Phau Lus Qhuab Qhia thiab Kev Khi Lus yog ib phau ntawm cov txhooj vaj lug kub hauv Yexus Khetos lub Koom Txoos ntawm Tsoom Haiv Neeg Ntseeg hauv Hnub Nyoog Kawg, nrog rau phau Npaivnpaum, Phau Ntawv Maumoos, thiab phau Lub Hlaws uas Muaj Nqis Heev. Phau Lus Qhuab Qhia thiab Kev Khi Lus txawv lwm phau tag nrho, vim phau no tsis yog muab cov ntaub ntawv thaum ub coj los txhais; tus Tswv muab tej kev tshwm sim no rau cov yaj saub uas Nws tau xaiv rau lub caij nyoog no xwv kom txum tim tau Nws lub nceeg vaj rov qab los. Nyob hauv tej kev tshwm sim no yus hnov tau tus Tswv Yexus Khetos lub suab hais lus mos thiab hais lus ruaj nrees (Q&K 18:35–36).

Joseph Smith zaj keeb kwm hais tias Phau Lus Qhuab Qhia thiab Kev Khi Lus yog lub hauv paus rau lub Koom Txoos hauv hnub nyoog kawg thiab yuav pab tau lub ntiaj teb (D&C 70 cov lus piav lub ntsiab). Tej kev tshwm sim nyob hauv phau no qhib kev rau txoj hauj lwm los npaj tus Tswv txoj Kev Los Zaum Ob, kom thiaj muaj raws li cov yaj saub twb hais los lawm txij thaum lub ntiaj teb chiv keeb los.