Tshooj 70
Kev tshwm sim uas tus Yaj Saub Joseph Smith tau txais, nyob hauv Hiram, Ohio, lub Kaum Ib Hlis Ntuj hnub tim 12, xyoo 1831. Tus Yaj Saub zaj keeb kwm hais tias tau muaj plaub lub rooj sab laj tshwj xeeb pib thaum hnub tim 1 mus txog hnub tim 12 ntawm lub Kaum Ib Hlis Ntuj. Nyob hauv kev sib txoos kawg no, lawv tau tham txog qhov tseem ceeb heev ntawm tej kev tshwm sim uas tom qab ntawd yuav muab luam tawm nyob hauv phau Book of Commandments (Phau Ntawv Lus Txib) thiab phau Doctrine and Covenants (Lus Qhuab Qhia thiab Kev Khi Lus). Tau txais txoj kev tshwm sim no tom qab tsa tes pom zoo nyob hauv lub rooj sab laj hais tias tej kev tshwm sim no “muaj nqis rau lub Koom Txoos tshaj li tej kev nplua nuj ntawm tag nrho lub Ntiaj Teb.” Joseph Smith zaj keeb kwm hais tias tej kev tshwm sim no yog “lub hauv paus ntawm lub Koom Txoos nyob hauv hnub nyoog kawg no, thiab yog tej uas pab neeg ntiaj teb, qhia hais tias tus Tswv tso siab muab cov yawm sij ntawm tej txuj ci uas neeg tsis paub txog peb tus Cawm Seej lub nceeg vaj rau neeg dua ib zaug ntxiv.”
1–5, Tus Tswv tsa cov saib xyuas los muab tej kev tshwm sim luam ua ntawv nyeem; 6–13, Cov uas ua hauj lwm rau tej yam ntawm sab ntsuj plig tsim nyog tau lawv nqi zog; 14–18, Haiv Neeg Ntseeg yuav tsum muaj sib npaug rau tej yam ntawm sab cev nqaij daim tawv.
1 Saib seb, thiab mloog, auj nej cov uas nyob hauv Xi-oos, thiab tag nrho nej uas yog cov neeg ntawm kuv lub koom txoos uas nyob deb ntawm kuv, thiab cia li hnov tus Tswv txoj lus uas kuv muab rau kuv tus tub qhe Joseph Smith, tus Hluas, thiab kuj rau kuv tus tub qhe Martin Harris, thiab kuj rau kuv tus tub qhe Oliver Cowdery, thiab kuj rau kuv tus tub qhe John Whitmer, thiab kuj rau kuv tus tub qhe Sidney Rigdon, thiab kuj rau kuv tus tub qhe William W. Phelps, los ntawm txoj kev txib lawv.
2 Vim kuv muab ib lo lus txib rau lawv; yog li ntawd cia li mloog thiab hnov, vim tus Tswv hais li no rau lawv—
3 Kuv, tus uas yog tus Tswv, tau hu lawv, thiab tau tsa lawv los ua cov saib xyuas tej kev tshwm sim thiab tej lus txib uas kuv tau muab rau lawv, thiab tej uas kuv yuav muab rau lawv tom qab no mus;
4 Thiab kuv yuav kom lawv piav txog txoj hauj lwm saib xyuas no los nyob rau hnub txiav txim.
5 Yog li ntawd, kuv tau muab txoj hauj lwm rau lawv, thiab qhov no yog lawv txoj hauj lwm nyob hauv Vajtswv lub koom txoos, los saib xyuas tej no thiab tej yam ntsig txog tej no, muaj tseeb tiag, tej yam zoo uas los ntawm tej kev tshwm sim thiab tej lus txib no.
6 Yog li ntawd, ib lo lus txib kuv muab rau lawv, kom lawv tsis txhob muab tej no rau cov ntseeg, los yog rau neeg ntiaj teb;
7 Txawm li ntawd los, npaum li uas lawv tau txais ntau tshaj qhov uas tsim nyog rau qhov lawv noj haus thiab qhov uas lawv xav tau, ces yuav tsum muab coj mus cia rau hauv kuv lub tsev rau khoom;
8 Thiab yuav tsum muab tej yam zoo ntawd fij rau cov neeg ntawm Xi-oos, thiab rau lawv tej xeeb leej xeeb ntxwv, npaum li uas lawv los ua cov uas txais lawv tug raws li tej kev cai ntawm lub nceeg vaj.
9 Saib seb, tus Tswv kom txhua tus neeg yuav tsum ua li no nyob hauv nws txoj hauj lwm saib xyuas, ib yam li kuv, tus uas yog tus Tswv, tau muab tsa rau ib tug neeg twg los yog yuav muab tsa tom qab no mus.
10 Thiab saib seb, cov uas zwm rau lub koom txoos ntawm tus Vajtswv muaj sia zees nyob tsis muaj ib tug twg yuav dim ntawm txoj kev cai no;
11 Muaj tseeb tiag, tus npisov los tsis dim, tus sawv cev uas ceev tus Tswv lub tsev rau khoom los tsis dim, tus uas tau tsa rau txoj hauj lwm saib xyuas tej yam ntawm sab nqaij daim tawv los tsis dim.
12 Tus uas tau tsa los saib xyuas tej yam ntawm sab ntsuj plig, tus ntawd yeej tsim nyog tau nws nqi zog, ib yam li cov uas tau tsa muaj ib txoj hauj lwm saib xyuas tej yam ntawm sab nqaij daim tawv;
13 Muaj tseeb tiag, tseem muaj ntau tshaj, qhov ntau tshaj uas huaj vam rau lawv los ntawm tus Ntsuj Plig txoj kev qhia.
14 Txawm li ntawd los, nej yuav tsum muaj sib npaug ntawm sab cev nqaij daim tawv, thiab txhob ua yam li tsis txaus siab, tsam tus Ntsuj Plig cheem txoj kev tshwm sim uas ntau nplua mias.
15 Nim no, kuv muab lo lus txib no rau kuv cov tub qhe ua kev pab rau lawv thaum lawv tseem nyob, ua kev tshwm sim txog kuv tej koob hmoov rau saum lawv lub taub hau, thiab ua lawv nqi zog rau lawv txoj kev rau siab thiab ua rau lawv txoj kev nyab xeeb;
16 Ua khoom noj thiab ua khaub ncaws hnav; ua qub txeeg qub teg; ua tej vaj tsev thiab ua tej thaj av, txawm yog tej xwm txheej dab tsi los xij uas kuv, tus uas yog tus Tswv, yuav muab lawv tso rau, thiab txawm yog qhov twg los xij uas kuv, tus uas yog tus Tswv, yuav xa lawv mus.
17 Vim lawv rau siab saib xyuas ntau yam, thiab ua tau zoo yog hais tias lawv tsis tau ua txhaum.
18 Saib seb, kuv, tus uas yog tus Tswv, yeej hlub tshua thiab yuav foom koob hmoov rau lawv, thiab lawv yuav tau kev xyiv fab los ntawm tej yam no. Twb yog li ntawd. Amees.