Tshooj 13
Yog muab los ntawm Joseph Smith zaj keeb kwm uas hais txog qhov uas tau muab tus Yaj Saub thiab Oliver Cowdery nkawd tsa rau lub Pov Thawj Hwj Aloos nyob ze Harmony, Pennsylvania, lub Tsib Hlis Ntuj hnub tim 15, xyoo 1829. Qhov muab nkawd tsa no yog ib tug tim tswv ob txhais tes ua, tus tim tswv uas tshaj tawm hais tias nws yog Yauhas, uas hu ua Yauhas tus uas Muab Neeg Ua Kev Cai Raus Dej nyob hauv Phau Tshiab. Tus tim tswv piav tias nws ua hauj lwm raws li Petus, Yakaunpaus, thiab Yauhas txoj kev coj, lawv yog cov Thwj Tim puag thaum ub, cov uas tuav cov yawm sij rau lub pov thawj hwj siab zog, uas hu ua lub Pov Thawj Hwj Mekhixedes. Tau muab lo lus cog tseg rau Joseph thiab Oliver nkawd hais tias thaum txog sij hawm uas tau pom zoo mam muab lub pov thawj hwj siab no los rau nkawd. (Saib tshooj 27:7–8, 12.)
Yauhas qhia txog cov yawm sij thiab tej hwj chim ntawm lub Pov Thawj Hwj Aloos.
1 Rau neb kuv ob tug kwv luag tub qhe, los ntawm Mexiyas lub npe, kuv muab lub Pov Thawj Hwj Aloos rau neb, uas tuav cov yawm sij ntawm cov tim tswv tej kev los txhawb pab, thiab ntawm txoj moo zoo ntawm kev hloov siab lees txim, thiab ntawm kev cai raus dej uas ua rau neeg txais kev zam txim rau tej kev txhaum; thiab yuav tsis muab qhov no tshem tawm hauv lub ntiaj teb no mus dua ib zaug ntxiv, kom txog thaum Levis cov tub coj ncaj ncees tiam dua kev tiam rau tus Tswv.