Tshooj 71
Kev tshwm sim uas tus Yaj Saub Joseph Smith thiab Sidney Rigdon tau txais, nyob hauv Hiram, Ohio, lub Kaum Ob Hlis Ntuj hnub tim 1, xyoo 1831. Tus Yaj Saub tau txhais phau Npaivnpaum mus ntxiv nrog Sidney Rigdon, tus uas ua nws tus teev ntawv txog thaum tau txais txoj kev tshwm sim no, es nyob rau lub sij hawm ntawd, nkawd tau tso txoj kev txhais phau Npaivnpaum tseg ib ntus xwv kom nkawd thiaj muaj peev xwm ua tau raws li cov lus qhia nyob hauv txoj kev tshwm sim no. Cov kwv tij yuav tsum mus tshaj tawm txoj moo zoo es thiaj yuav daws tau tej kev tsis sib raug zoo uas tau hlav tuaj tawm tsam lub Koom Txoos vim yog Ezra Booth, tus uas tau tso qhov tseeb tseg, tau muab nws tej tsab ntawv luam tawm.
1–4, Tus Tswv xa Joseph Smith thiab Sidney Rigdon mus tshaj tawm txoj moo zoo; 5–11, Tus Tswv yuav ua kom Haiv Neeg Ntseeg cov yeeb ncuab tsis paub hais.
1 Saib seb, tus Tswv hais li no rau kuv ob tug tub qhe Joseph Smith, tus Hluas, thiab Sidney Rigdon tias, lub sij hawm tau los txog lawm tiag uas kuv xav tias tsim nyog thiab tseem ceeb kom neb yuav tsum qhib neb ob lub qhov ncauj mus tshaj tawm kuv txoj moo zoo, tej yam ntawm lub nceeg vaj, piav txog tej txuj ci uas neeg paub tsis txog ntawd hauv vaj lug kub los, raws li feem ntawm tus Ntsuj Plig thiab hwj chim uas yuav muab rau neb, raws li kuv xav.
2 Kuv hais tseeb rau neb tias, tshaj tawm rau cov neeg nyob hauv tej thaj tsam puag ncig, thiab nyob hauv lub koom txoos thiab, rau lub caij nyoog ib ntus, kom txog thaum lub sij hawm uas yuav qhia rau neb paub.
3 Tseeb tiag qhov no yog ntiag tug hauj lwm rau ib lub caij nyoog, uas kuv muab rau neb.
4 Yog li ntawd, neb cia li ua hauj lwm nyob hauv kuv lub vaj txiv hmab. Hais rau cov neeg nyob hauv lub ntiaj teb, thiab ua pov thawj, thiab npaj txoj kev rau tej lus txib thiab tej kev tshwm sim uas yuav los.
5 Nim no, saib seb qhov no yog laj lim tswv yim; tus uas nyeem, cia tus ntawd to taub thiab txais yuav thiab;
6 Vim tus uas txais yuav tej no ces yuav muab ntau tshaj ntxiv rau tus ntawd, twb yuav muab hwj chim.
7 Yog li ntawd, cia li ua rau neb cov yeeb ncuab tsis paub hais; hu kom lawv tuaj ntsib neb qhib tshav lug thiab ntsiag to; thiab npaum li uas neb rau siab ntseeg ces yuav muab lawv tej kev txaj muag tshwm sim.
8 Yog li ntawd, cia lawv hais tawm lawv tej lus muaj zog tawm tsam tus Tswv.
9 Tseeb tiag, tus Tswv hais li no rau neb tias—tsis muaj ib yam riam phom twg uas yog tsim los tawm tsam neb es yuav vam meej;
10 Thiab yog muaj ib tug neeg tsa nws lub suab tawm tsam neb ces yuav ua kom nws tsis paub hais thaum txog lub sij hawm kuv pom zoo.
11 Yog li ntawd, ua raws li kuv tej lus txib; tej lus txib no muaj tseeb thiab ncaj. Twb yog li ntawd. Amees.