Tshooj 129
Tej lus qhia uas tus Yaj Saub Joseph Smith muab, nyob hauv Nauvoo, Illinois, lub Ob Hlis Ntuj hnub tim 9, xyoo 1843, qhia txog peb yam yawm sij tseem ceeb kom paub tau saib cov tim tswv uas los muab kev txhawb pab thiab cov ntsuj plig sib txawv zoo li cas tiag.
1–3, Muaj cov neeg sawv rov los lawm thiab cov neeg ntsuj plig nyob saum ntuj ceeb tsheej; 4–9, Qhia txog tej ntsiab cai kom paub tau cov tub xa xov uas los sab tom daim ntaub thaiv los.
1 Muaj ob yam neeg nyob saum ntuj ceeb tsheej, uas yog: Cov tim tswv, uas yog cov neeg tau sawv rov los lawm, uas muaj lub cev muaj nqaij thiab muaj txha—
2 Piv txwv, Yexus hais tias: Cia li cev tes los kov kuv thiab saib, rau qhov tus ntsuj plig tsis muaj nqaij thiab tsis muaj txha li nej pom kuv muaj no.
3 Yam ob: cov ntsuj plig ntawm cov neeg ncaj ncees uas zoo tag nrho, cov uas tseem tsis tau sawv rov los, tiam sis tau lub yeeb koob zoo ib yam ua lawv tug.
4 Thaum ib tug tub xa xov los thiab hais tias nws muaj ib tsab xov los ntawm Vajtswv, cev koj txhais tes rau nws thiab hais kom nws tuav koj tes.
5 Yog hais tias nws yog ib tug tim tswv ces nws yuav tuav koj tes, thiab koj yuav tuav tau nws txhais tes.
6 Yog hais tias nws yog tus ntsuj plig ntawm ib tug neeg ncaj ncees uas zoo tag nrho ces nws yuav los nrog nws lub yeeb koob, vim qhov ntawd yog tib txoj kev xwb uas nws thiaj tshwm sim tau los—
7 Hais kom nws kom tuav koj tes, tiam sis nws yuav tsis txav, vim qhov uas ib tug neeg ncaj ncees yuav dag ntxias lwm tus tsis yog raws li tus txheej txheem saum ntuj ceeb tsheej; tiam sis nws yeej tseem yuav hais nws tsab xov.
8 Yog hais tias nws yog tus dab phem ua zoo li ib tug tim tswv ci ntsa iab, thaum koj caw nws kom tuav tes nws yuav cev nws txhais tes los rau koj, tiam sis koj yuav tuav tsis tau dab tsi li; yog li ntawd koj yuav paub tau nws.
9 Cov no yog peb yam ntsiab cai tseem ceeb uas koj yuav paub tau saib tej kev pab zoo li no puas yog los ntawm Vajtswv los.