Tshooj 16
Kev tshwm sim uas tus Yaj Saub Joseph Smith tau txais kom qhia Peter Whitmer tus Hluas, nyob hauv Fayette, New York, lub Rau Hli Ntuj xyoo 1829 (saib cov lus piav lub ntsiab ntawm tshooj 14). Peter Whitmer tus Hluas yav tom qab no tau los ua ib tug ntawm Yim Tus Tim Khawv txog Phau Ntawv Maumoos.
1–2, Tus Tswv txhais npab kav tag nrho lub ntiaj teb; 3–6, Txoj kev mus tshaj tawm txoj moo zoo thiab cawm neeg txoj sia yog yam muaj nqis tshaj plaws.
1 Cia li mloog, kuv tus tub qhe Peter, thiab mloog Yexus Khetos, koj tus Tswv thiab tus Txhiv Dim tej lus.
2 Vim saib seb, kuv hais lus meej meej thiab muaj hwj chim rau koj, vim kuv txhais npab kav tag nrho lub ntiaj teb.
3 Thiab kuv yuav qhia rau koj txog qhov uas tsis muaj ib tug neeg paub tsuas yog kuv thiab koj nkaus xwb—
4 Vim muaj ntau zaus koj thov kuv kom paub saib qhov dab tsi thiaj yog qhov muaj nqis tshaj plaws rau koj.
5 Saib seb, koj tau koob hmoov rau qhov no, thiab rau qhov uas koj tshaj tawm kuv tej lus uas kuv tau muab rau koj raws li kuv tej lus txib.
6 Thiab nim no, saib seb, kuv hais rau koj tias, qhov uas yuav muaj nqis tshaj plaws rau koj yog mus tshaj tawm txoj kev hloov siab lees txim mus rau cov neeg no, kom koj yuav coj tau neeg los cuag kuv, kom koj yuav tau so nrog lawv nyob hauv kuv Txiv lub nceeg vaj. Amees.