Tshooj 54
Kev tshwm sim uas tus Yaj Saub Joseph Smith tau txais kom qhia Newel Knight, hauv Kirtland, Ohio, lub Rau Hli Ntuj hnub tim 10, xyoo 1831. Cov mej zeej ntawm lub Koom Txoos nyob hauv Thompson, Ohio, tsis sib haum vim muaj tej lus nug ntsig txog kev fij siab muab tej teej tug. Pom muaj kev cuaj khaum thiab kev ntshaw. Tom qab nws ua tub txib rau cov neeg Shaker (saib cov lus piav lub ntsiab ntawm tshooj 49), Leman Copley tau rhuav nws txoj kev khi lus uas hais tias yuav muab nws thaj teb loj loj fij tseg pub ua ib thaj chaw qub txeeg qub teg rau Haiv Neeg Ntseeg uas los tim Colesville, New York los. Yog li ntawd, Newel Knight (thawj coj ntawm cov mej zeej nyob hauv Thompson) thiab lwm cov txwj laug tau tuaj cuag tus Yaj Saub nug saib yuav ua li cas. Tus Yaj Saub nug tus Tswv thiab tau txais txoj kev tshwm sim no, uas txib cov mej zeej nyob hauv Thompson kom lawv tawm ntawm Leman Copley daim teb thiab khiav mus rau Missouri.
1–6, Haiv Neeg Ntseeg yuav tsum ua raws li txoj moo zoo tej kev khi lus thiaj tau txais kev hlub tshua; 7–10, Lawv yuav tsum ua siab ntev thaum raug kev txom nyem.
1 Saib seb, tus Tswv, tus uas twb yog Alafas thiab Aumenkas, qhov chiv keeb thiab qhov kawg, twb yog tus uas raug ntsia rau saum ntoo khaub lig rau neeg ntiaj teb tej kev txhaum, hais li no—
2 Saib seb, kuv hais tseeb tseeb rau koj, kuv tus tub qhe Newel Knight, koj yuav tsum nyob khov kho ua lub luag hauj lwm uas kuv tau muab tsa rau koj.
3 Thiab yog koj cov kwv tij xav khiav kom dim lawv cov yeeb ncuab, cia lawv hloov siab lees txim rau tag nrho lawv tej kev txhaum, thiab hloov los ua neeg uas txo hwj chim tiag tiag rau kuv thiab muaj siab xav ua zoo.
4 Thiab vim twb tau muab txoj kev khi lus uas lawv khi rau kuv rhuav lawm, ces tib yam li ntawd txoj kev khi lus no tsis muaj qab hau thiab tsis tij lim lawm.
5 Thiab kev txom nyem raug tus uas ua kev txhaum li no, vim ntshe yuav zoo dua rau nws yog hais tias nws tau poob dej nyob hauv dej hiav txwv.
6 Tiam sis cov uas tau ua raws li txoj kev khi lus thiab tau coj raws li lo lus txib tau koob hmoov, vim lawv yuav tau txoj kev hlub tshua.
7 Yog li ntawd, nim no cia li mus thiab khiav ntawm thaj av mus, tsam nej cov yeeb ncuab tuaj tawm tsam nej; ces cia li mus, thiab tsa ib tug uas nej nyiam los ua nej tus thawj coj, thiab kom mus them nyiaj rau nej.
8 Thiab li no nej yuav tsum mus lawm tim tej thaj tsam sab hnub poob, mus rau thaj av Missouri, kom txog ntawm cov Neeg Lamas tej ciam teb.
9 Thiab tom qab nej tau mus tag lawm, saib seb, kuv hais rau nej tias, cia li nrhiav ua ib lub neej li luag tej, kom txog thaum kuv npaj ib qho chaw rau nej tso.
10 Thiab ntxiv, ua siab ntev thaum raug kev txom nyem kom txog thaum kuv los; thiab, saib seb, kuv los sai sai no, thiab kuv nqi zog twb nrog kuv, thiab cov uas tau nrhiav kuv ntxov yuav tau kev so rau lawv tus ntsuj plig. Twb yog li ntawd. Amees.