Tshooj 103
Kev tshwm sim uas tus Yaj Saub Joseph Smith tau txais, nyob hauv Kirtland, Ohio, lub Ob Hlis Ntuj hnub tim 24, xyoo 1834. Tau txais txoj kev tshwm sim no tom qab Parley P. Pratt thiab Lyman Wight nkawd tuaj txog rau hauv Kirtland, Ohio, nkawd tau tuaj tim Missouri tuaj tawm tswv yim nrog tus Yaj Saub ntsig txog tej khoom pab thiab kev txum tim Haiv Neeg Ntseeg rov rau lawv tej av nyob hauv Ciaj Ciam Av Jackson.
1–4, Vim li cas tus Tswv tau cia Haiv Neeg Ntseeg hauv Ciaj Ciam Av Jackson raug tsim txom; 5–10, Haiv Neeg Ntseeg yuav kov yeej yog hais tias lawv ua raws li tej lus txib; 11–20, Txoj kev txhiv dim ntawm Xi-oos yuav muaj los ntawm hwj chim, thiab tus Tswv yuav mus ua Nws cov neeg ntej; 21–28, Haiv Neeg Ntseeg yuav tsum sib sau rau hauv Xi-oos, thiab cov uas muab lawv txoj sia txi yuav rov muaj sia dua; 29–40, Tus Tswv hu ib co kwv tij los tsim lub Yeej Xi-oos thiab mus lawm nram Xi-oos; tau cog lus rau lawv hais tias lawv yuav yeej yog hais tias lawv rau siab ntseeg.
1 Kuv hais tseeb rau nej, kuv cov phooj ywg, saib seb, kuv yuav muab ib txoj kev tshwm sim thiab ib lo lus txib rau nej, kom nej yuav paub ua li cas thiaj ua tiav nej tej dej num ntsig txog txoj kev cawm seej thiab kev txhiv dim ntawm nej cov kwv tij, cov uas tawg khiav ri niab nyob hauv thaj av Xi-oos;
2 Raug raws khiav thiab raug ntaus los ntawm kuv cov yeeb ncuab txhais tes, cov uas kuv yuav nchuav kuv txoj kev npau taws uas tsis paub tag los thaum txog lub sij hawm kuv pom zoo.
3 Vim kuv tau cia lawv ua li ntawd txog txij no, kom lawv yuav ua kawg nkaus lawv tej kev ua phem, kom lawv lub khob yuav puv;
4 Thiab kom cov uas hu lawv tus kheej raws li kuv lub npe yuav raug qhuab ntuas ib nyuag ntus nrog ib txoj kev rau txim mob thiab sab heev, vim yog lawv tsis mloog tag nrho rau tej kev qhia thiab tej lus txib uas kuv muab rau lawv.
5 Tiam sis kuv hais tseeb rau nej tias, kuv tau tshaj ib txoj kev tshaj tawm uas kuv cov neeg yuav paub, npaum li uas yog txij kiag lub sij hawm no mus lawv yuav mloog tej lus ntuas uas kuv, tus Tswv uas yog lawv tus Vajtswv, yuav muab rau lawv.
6 Saib seb, vim kuv tau tshaj tawm, lawv yuav pib kov yeej kuv cov yeeb ncuab txij lub sij hawm no kiag mus.
7 Thiab los ntawm kev mloog zoo ua raws li tag nrho tej lus uas kuv, tus Tswv uas yog lawv tus Vajtswv, yuav hais rau lawv, ces lawv yeej yuav muaj yeej tsis tu tsis tseg kom txog thaum tej nceeg vaj ntawm lub ntiaj teb yuav raug muab tsuj rau hauv kuv qab xib taws, thiab txog thaum yuav muab lub ntiaj teb rau haiv neeg ntseeg, los nyob mus ib txhiab thiab ib txhis li.
8 Tiam sis npaum li uas lawv tsis ua raws li kuv tej lus txib, thiab tsis ua tib zoo mloog ua raws li tag nrho kuv tej lus, ces tej nceeg vaj ntawm lub ntiaj teb yuav kov yeej lawv.
9 Vim tus Tswv txib lawv kom ua ib lub teeb rau neeg ntiaj teb, thiab los ua cov cawm seej rau neeg;
10 Thiab npaum li uas lawv tsis ua cov cawm seej rau neeg, ces lawv zoo li cov ntsev uas tsuag lawm, thiab txij ntawd mus tsis zoo rau dab tsi tiam sis tsuas yog muab pov tseg thiab muab tsuj rau hauv neeg qab xib taws xwb.
11 Tiam sis kuv hais tseeb rau nej tias, kuv tau tshaj tawm kom nej cov kwv tij uas tawg khiav ri niab yuav tsum rov qab los rau tej thaj av ntawm lawv qub txeeg qub teg, thiab yuav tsum txhim tsa tej chaw uas puas tsuaj puas ntsoog lawm ntawm Xi-oos.
12 Vim tom qab dhau tej kev txom nyem ntau, ib yam li kuv tau hais rau nej nyob hauv ib lo lus txib ua ntej lawm, tej koob hmoov yuav los.
13 Saib seb, qhov no yog txoj koob hmoov uas kuv tau cog lus yuav muaj tom qab nej tej kev txom nyem, thiab tej kev txom nyem ntawm nej cov kwv tij—txoj kev txhiv nej dim, thiab txoj kev txhiv nej cov kwv tij dim, uas twb yog txoj kev txum tim lawv mus rau thaj av Xi-oos, mus tsa nyob ruaj, yuav tsis raug muab ntxeev pov tseg ntxiv.
14 Txawm li ntawd los, yog hais tias lawv ua rau lawv tej qub txeeg qub teg tsis huv lawv yuav raug muab pov tseg; vim kuv yuav tsis tseg lawv yog hais tias lawv ua rau lawv tej qub txeeg qub teg tsis huv.
15 Saib seb, kuv hais rau nej tias, txoj kev txhiv Xi-oos dim yeej yuav tsum muaj los ntawm hwj chim;
16 Yog li ntawd, kuv yuav tsa ib tug neeg sawv los mus rau kuv cov neeg, tus uas yuav coj lawv ib yam li Mauxes coj cov neeg Ixayees.
17 Vim nej yog cov neeg Ixayees, thiab yog Anplaham cov tub ki, thiab yeej yuav tsum coj nej tawm ntawm kev ua cev qhev los ntawm hwj chim, thiab nrog txhais caj npab uas xyab tawm.
18 Thiab ib yam li tau xub coj nej cov yawg koob tawm los, txoj kev txhiv dim ntawm Xi-oos yuav zoo ib yam li ntawd.
19 Yog li ntawd, tsis txhob pub nej lub siab poob, vim kuv tsis hais rau nej ib yam li kuv hais rau nej cov yawg koob: Kuv cov tim tswv yuav mus ua nej ntej, tiam sis kuv lub yeeb haum tsis mus.
20 Tiam sis kuv hais rau nej tias: Kuv cov tim tswv yuav mus ua nej ntej, thiab kuv lub yeeb haum thiab, thiab thaum txog sij hawm nej yuav nyob hauv thaj av zoo.
21 Kuv hais tseeb tseeb rau nej, hais tias kuv tus tub qhe Joseph Smith, tus Hluas, yog tus neeg uas kuv tau muab piv rau tus tub qhe, tus uas tus Tswv ntawm lub vaj txiv ntoo roj tau hais txog nyob hauv zaj lus piv txwv uas kuv tau muab rau nej.
22 Yog li ntawd cia kuv tus tub qhe Joseph Smith, tus Hluas, hais rau kuv tsev neeg cov tub dag tub zog, kuv cov tub hluas thiab cov laus ib nrab xyoo tias—Cia li sau nej tus kheej los ua ke rau hauv thaj av Xi-oos, rau hauv thaj av uas kuv tau muas nrog cov nyiaj uas tau muab fij tseg rau kuv.
23 Thiab cia txhua pawg ntseeg xa ib co txiv neej txawj ntse mus nrog lawv cov nyiaj txiag, thiab muas tej av ib yam li kuv tau txib lawv.
24 Thiab npaum li uas kuv cov yeeb ncuab tuaj tawm tsam nej raws nej khiav ntawm kuv thaj av zoo, uas kuv tau muab fij tseg ua thaj av Xi-oos, ntawm nej tej av los ntawm tej lus tim khawv no, uas nej tau coj tuaj rau kuv tawm tsam lawv, nej yuav tsum foom tsis zoo rau lawv;
25 Thiab tus uas nej foom tsis zoo, kuv yuav foom tsis zoo rau tus ntawd, thiab nej yuav ua pauj kuv cov yeeb ncuab rau kuv.
26 Thiab kuv lub yeeb haum yuav nrog nej thaum nej pauj kuv cov yeeb ncuab rau kuv, mus txog rau tiam neeg thib peb thiab thib plaub ntawm cov uas ntxub kuv.
27 Cia neeg tsis txhob ntshai muab nws txoj sia txi pub rau kuv; vim tus uas muab nws txoj sia txi pub rau kuv tus ntawd yuav nrhiav tau txoj sia dua.
28 Thiab tus uas tsis txaus siab muab nws txoj sia txi pub rau kuv ces tus ntawd tsis yog kuv tus thwj tim.
29 Yog kuv lub siab nyiam uas kuv tus tub qhe Sidney Rigdon yuav tsum tsa nws lub suab nyob hauv tej pawg neeg tim tej teb chaws sab hnub tuaj, kom npaj tej pawg ntseeg ua raws li tej lus txib uas kuv tau muab rau lawv ntsig txog txoj kev txum tim thiab kev txhiv dim ntawm Xi-oos.
30 Yog kuv lub siab nyiam uas kuv tus tub qhe Parley P. Pratt thiab kuv tus tub qhe Lyman Wight yuav tsis txhob rov qab mus rau thaj av ntawm nkawd cov kwv tij, kom txog thaum nkawd tau ib pab neeg mus lawm pem thaj av Xi-oos, uas muaj tej pawg kaum leej, los yog tej pawg nees nkaum leej, los yog tej pawg tsib caug leej, los yog tej pawg ib puas leej, kom txog thaum nkawd nrhiav tau txog tsib puas leej tub dag tub zog ntawm kuv tsev neeg tso.
31 Saib seb qhov no yog kuv lub siab nyiam; thov ces nej yuav tau txais; tiam sis neeg tsis ua raws kuv lub siab nyiam tas mus li.
32 Yog li ntawd, yog hais tias nej nrhiav tsis tau tsib puas leej, mob siab nrhiav kom tej zaum nej ho nrhiav tau li peb puas leej.
33 Thiab yog hais tias nej nrhiav tsis tau peb puas leej, mob siab nrhiav kom tej zaum nej ho nrhiav tau li ib puas leej.
34 Tiam sis kuv hais tseeb rau nej tias, kuv muab ib lo lus txib rau nej tias, kom nej tsis txhob mus lawm pem thaj av Xi-oos kom txog thaum nej nrhiav tau ib puas leej ntawm kuv tsev neeg tej tub dag tub zog, nrog nej mus lawm pem thaj av Xi-oos.
35 Yog li ntawd, ib yam li kuv tau hais rau nej, thov ces nej yuav tau txais; mob siab thov Vajtswv saib tej zaum kuv tus tub qhe Joseph Smith, tus Hluas, puas yuav mus nrog nej, thiab mus tswj hwm nyob hauv kuv cov neeg, thiab tsim kuv lub nceeg vaj rau hauv thaj av uas muab fij tseg lawm, thiab tsa cov neeg Xi-oos raws tej kev cai thiab tej lus txib uas tau muab thiab tseem yuav muab los rau nej.
36 Tag nrho kev muaj yeej thiab yeeb koob muaj los rau nej los ntawm nej txoj kev mob siab, kev rau siab ntseeg, thiab kev thov Vajtswv uas muaj kev ntseeg.
37 Cia kuv tus tub qhe Parley P. Pratt nrog kuv tus tub qhe Joseph Smith, tus Hluas, mus.
38 Cia kuv tus tub qhe Lyman Wight nrog kuv tus tub qhe Sidney Rigdon mus.
39 Cia kuv tus tub qhe Hyrum Smith nrog kuv tus tub qhe Frederick G. Williams mus.
40 Cia kuv tus tub qhe Orson Hyde nrog kuv tus tub qhe Orson Pratt mus, qhov twg los xij uas kuv tus tub qhe Joseph Smith, tus Hluas, yuav ntuas nkawd, kom ua raws li tej lus txib uas kuv tau muab rau nej lawm, thiab tso tej seem tshuav cia rau hauv kuv txhais tes. Twb yog li ntawd. Amees.