Tshooj 7
Kev tshwm sim uas tus Yaj Saub Joseph Smith thiab Oliver Cowdery tau txais, nyob hauv Harmony, Pennsylvania, lub Plaub Hlis Ntuj xyoo 1829, thaum nkawd nug Vajtswv los ntawm lub Ulees thiab Thumees saib Yauhas, tus thwj tim uas Yexus hlub, puas tseem muaj sia ntawm sab cev nqaij daim tawv los sis tuag lawm. Txoj kev tshwm sim no yog ib zaj lus txhais los ntawm cov ceev xwm txheej uas Yauhas muab sau rau saum daim tawv tsiaj thiab nws tus kheej tau muab zais cia.
1–3, Yauhas tus uas Yexus hlub yuav nyob kom txog thaum tus Tswv los; 4–8, Petus, Yakaunpaus, thiab Yauhas tuav cov yawm sij ntawm txoj moo zoo.
1 Thiab tus Tswv tau hais rau kuv tias: Yauhas, tus kuv hlub, koj xav tau dab tsi? Vim yog koj yuav thov kom tau qhov koj xav tau, ces yuav muab qhov ntawd pub rau koj.
2 Thiab kuv hais rau nws tias: Tus Tswv, thov muab lub hwj chim yeej kev tuag rau kuv, xwv kom kuv yuav tau nyob thiab coj neeg los cuag koj.
3 Thiab tus Tswv hais rau kuv tias: Kuv hais tseeb tseeb rau koj tias, vim koj xav tau qhov no ces koj yuav tau nyob kom txog thaum kuv los nrog kuv lub yeeb koob, thiab koj yuav qhia tej yuav muaj los yav tom ntej rau tej haiv neeg, tej xeem neeg, tej yam lus thiab tej yam neeg.
4 Thiab vim yog rau lub hom phiaj no tus Tswv thiaj tau hais rau Petus tias: Yog hais tias kuv cia nws nyob kom txog thaum kuv los, qhov ntawd ho ua li cas rau koj? Vim nws thov kuv kom nws yuav coj tau neeg los cuag kuv, tiam sis koj ho thov kom koj yuav tau los cuag kuv sai sai nyob hauv kuv lub nceeg vaj.
5 Kuv hais rau koj, Petus, qhov no yog kev xav tau uas zoo; tiam sis tus kuv hlub xav kom nws ua tau ntau dua, los yog ua ib txoj hauj lwm rau neeg uas tseem ceeb dua tej nws tau ua los lawm.
6 Muaj tseeb tiag, nws tau lees ris ib txoj hauj lwm uas tseem ceeb dua; yog li ntawd kuv yuav muab nws ua zoo li nplaim hluav taws thiab ib tug tim tswv los txhawb pab; nws yuav txhawb pab cov uas yuav muaj tug txais txoj kev cawm seej uas nyob hauv lub ntiaj teb.
7 Thiab kuv yuav kom koj mus txhawb pab nws thiab koj tus kwv Yakaunpaus; thiab kuv yuav muab lub hwj chim thiab cov yawm sij ntawm txoj hauj lwm qhuab qhia no rau nej peb leeg, kom txog thaum kuv los.
8 Kuv hais tseeb rau koj tias, neb ob leeg yuav tau raws li qhov neb xav tau, vim neb ob leeg yeej xyiv fab rau yam uas neb xav tau ntawd.