1 Saib seb, kuv hais rau koj tias, vim kuv tus tub qhe Martin Harris xav tau kev ua pov thawj ntawm kuv txhais tes, hais tias koj, uas yog kuv tus tub qhe Joseph Smith, tus Hluas, yeej tau cov phiaj uas koj tau ua tim khawv txog thiab hais tias koj tau txais los ntawm kuv;

2 Thiab nim no, saib seb, koj yuav hais li no rau nws—tus uas hais lus rau koj, hais rau koj tias: Kuv, tus uas yog tus Tswv, yog Vajtswv, thiab tau muab tej yam no los rau koj, uas yog kuv tus tub qhe Joseph Smith, tus Hluas, thiab tau txib koj hais tias kom koj yuav tsum ua ib tug tim khawv rau tej yam no;

3 Thiab kuv tau ua kom koj yuav tsum khi lus nrog kuv, hais tias koj yuav tsis txhob muab cov phiaj rau neeg pom, tsuas yog rau cov neeg uas kuv tau txib kom koj muab xwb; thiab koj twb tsis muaj hwj chim kov yeej lawv tsuas yog kuv muab hwj chim rau koj xwb.

4 Thiab koj muaj ib lub txiaj ntsim los txhais cov phiaj; thiab qhov no yog thawj lub txiaj ntsim uas kuv tau foom pub rau koj; thiab kuv tau txib kom koj tsis txhob hais tias koj muaj lwm lub txiaj ntsim kom txog thaum tau muaj raws li kuv lub hom phiaj rau qhov no tso; vim kuv yuav tsis muab lwm lub txiaj ntsim rau koj kom txog thaum ua qhov no tiav lawm tso.

5 Kuv hais tseeb rau koj tias, kev txom nyem yuav los rau neeg ntiaj teb yog lawv tsis mloog kuv tej lus;

6 Vim tom qab no mus yuav muab koj tsa thiab koj yuav mus lawm yav tom ntej thiab coj kuv tej lus mus rau noob neej.

7 Saib seb, yog hais tias lawv tsis ntseeg kuv cov lus, ces lawv yeej tsis ntseeg koj, kuv tus tub qhe Joseph, txawm hais tias koj ua tau rau lawv pom tag nrho tej uas kuv tau tso siab rau koj.

8 Auj, tiam neeg no uas tsis ntseeg thiab tawv ncauj—kuv txoj kev chim siab twb npau rau lawv.

9 Saib seb, kuv hais tseeb rau koj, kuv tus tub qhe Joseph, kuv twb tau tshwj tej khoom uas kuv tau tso siab muab rau koj tseg cia, rau kuv ib lub hom phiaj tseem ceeb, thiab yuav ua rau tej tiam neeg yav tom ntej paub qhov no;

10 Tiam sis tiam neeg no yuav muaj kuv txoj lus dhau los ntawm koj;

11 Thiab ntxiv rau koj zaj lus tim khawv, yog zaj lus tim khawv ntawm kuv peb tug tub qhe, cov uas kuv yuav hu thiab tsa, cov neeg uas kuv yuav muab tej yam no rau lawv pom, thiab lawv yuav mus lawm yav tom ntej nrog kuv cov lus uas tau muab dhau los ntawm koj.

12 Muaj tseeb tiag, lawv yuav paub meej meej hais tias tej yam no muaj tseeb, vim kuv yuav tshaj tej yam no los saum ntuj ceeb tsheej los rau lawv.

13 Kuv yuav muab hwj chim rau lawv kom lawv yuav saib thiab ntsia tej yam no raws li muaj;

14 Thiab tsis muaj dua lwm tus uas kuv yuav muab lub hwj chim no, kom los txais tau tib zaj lus tim khawv no nyob rau tiam neeg no, nyob rau ntawm txoj kev uas kuv lub koom txoos pib sawv thiab tawm hauv hav zoov los mus no—kaj li lub hlis, thiab ci li lub hnub, thiab txaus ntshai npaum li ib pab tub rog kwv chij.

15 Thiab kuv yuav xa cov lus tim khawv txog kuv txoj lus tawm mus los ntawm peb tug tim khawv.

16 Thiab saib seb, cov uas ntseeg kuv tej lus, kuv yuav los xyuas lawv nrog txoj kev tshwm sim los ntawm kuv tus Ntsuj Plig thiab lawv yuav yug los ntawm kuv, uas twb yog los ntawm dej thiab ntawm tus Ntsuj Plig—

17 Thiab nej tseem yuav tau tos ib nyuag ntus ntxiv, vim tseem tsis tau tsa nej—

18 Thiab lawv cov lus tim khawv kuj yuav tawm mus ua rau tiam neeg no raug txim yog hais tias lawv ua lawv lub siab tawv qhawv tawm tsam tej ntawd;

19 Vim txoj kev nplawm kom puas ntsoog yuav tawm mus rau tej neeg hauv lub ntiaj teb, thiab tej lub sij hawm yuav raug muab nchuav los ntxiv, yog hais tias lawv tsis hloov siab lees txim, kom txog thaum lub ntiaj teb yuav tsis muaj neeg, thiab tej neeg yuav raug kub hnyiab tag thiab raug puas tsuaj du lug los ntawm qhov ci ntsa iab ntawm kuv txoj kev los.

20 Saib seb, kuv qhia tej yam no rau koj, ib yam li kuv twb tau qhia rau cov neeg txog txoj kev puas tsuaj ntawm Yeluxalees; thiab yuav paub tias kuv txoj lus muaj tseeb nyob rau lub sij hawm no ib yam li tau paub tias kuv txoj lus muaj tseeb ua ntej no lawm.

21 Thiab nim no kuv txib koj, kuv tus tub qhe Joseph, kom hloov siab lees txim thiab mus kom tau ncaj dua rau ntawm kuv qhov muag, thiab tsis txhob ywj rau neeg tej kev ntxias ntxiv lawm;

22 Thiab kom koj ua khov kho ua raws nraim li tej lus txib uas kuv tau txib koj; thiab yog hais tias koj ua li no, saib seb kuv pub txoj sia nyob mus ib txhis rau koj, txawm yog tias koj raug tua tuag.

23 Thiab nim no, kuv hais lus rau koj ntxiv, kuv tus tub qhe Joseph, ntsig txog tus txiv neej uas xav tau kev ua pov thawj no—

24 Saib seb, kuv hais rau nws tias, nws tsa nws tus kheej thiab tsis txo nws lub hwj chim kom txaus rau kuv; tiam sis yog hais tias nws yuav txhos caug pe kuv, thiab txo nws lub hwj chim los ntawm kev sib zog thov Vajtswv thiab muaj kev ntseeg, uas yog nws rau siab ntso ua tiag tiag, thaum ntawd kuv mam pub rau nws pom tej yam uas nws xav pom.

25 Thiab tom qab ntawd nws yuav hais rau cov neeg ntawm tiam no tias: Saib seb, kuv tau pom tej yam uas tus Tswv tau muab rau Joseph Smith, tus Hluas, pom, thiab kuv paub tseeb hais tias tej yam no muaj tseeb tiag, vim kuv twb tau pom, vim kuv pom tej yam no los ntawm Vajtswv lub hwj chim thiab tsis yog los ntawm neeg.

26 Thiab kuv uas yog tus Tswv txib nws, uas yog kuv tus tub qhe Martin Harris, kom nws yuav tsum tsis txhob hais dab tsi ntxiv txog tej yam no rau lawv, tsuas yog nws yuav hais tias: Kuv tau pom, thiab kuv pom tej yam no los ntawm Vajtswv lub hwj chim; thiab cov no yog cov lus uas nws yuav tsum hais.

27 Tiam sis yog hais tias nws xyeej qhov no ces nws yuav rhuav txoj kev khi lus uas yav tas los nws khi nrog kuv, thiab saib seb, nws raug txim.

28 Thiab nim no, tsuas yog nws txo nws lub hwj chim thiab lees rau kuv txog tej yam uas nws tau ua uas tsis yog, thiab khi lus nrog kuv hais tias nws yuav ua raws li kuv tej lus txib, thiab muab siab rau ntseeg kuv, saib seb, kuv hais rau nws tias, nws yuav pom tsis tau, vim kuv yuav tsis pub nws pom tej yam uas kuv tau hais txog.

29 Thiab yog ho muaj li no, kuv txib koj, kuv tus tub qhe Joseph, hais tias koj yuav tau hais rau nws tias, kom nws tsis txhob ua ntxiv lawm, thiab tsis txhob txob kuv ntxiv lawm txog qhov no.

30 Thiab yog ho muaj li no, saib seb, kuv hais rau koj Joseph, thaum koj txhais tau ob peb phab ntawv ntxiv koj yuav tau tsum ib ntus, kom txog thaum kuv rov qab txib koj dua tso; tom qab ntawd koj mam rov qab txhais dua.

31 Thiab tsuas yog koj ua li no, tsis li ces, saib seb, koj yuav tsis muaj txiaj ntsim ntxiv lawm, thiab kuv yuav muab tej yam uas kuv tau tso siab muab rau koj tshem mus.

32 Thiab nim no, vim kuv twb xub pom cov uas nkaum tos yuav ua kom koj puas tsuaj, muaj tseeb tiag, kuv twb xub pom tias yog kuv tus tub qhe Martin Harris tsis txo nws lub hwj chim thiab tsis txais yuav kev ua pov thawj los ntawm kuv txhais tes, ces nws yuav poob mus rau kev ua txhaum;

33 Thiab muaj coob tus uas nkaum tos yuav ua kom koj puas tsuaj tawm hauv lub ntiaj teb no mus; thiab vim qhov no, xwv kom koj hnub nyoog yuav nyob ntev, kuv thiaj li tau muab cov lus txib no rau koj.

34 Muaj tseeb tiag, vim qhov no kuv tau hais tias: Tsum, thiab nyob twj ywm kom txog thaum kuv txib koj tso, thiab kuv mam npaj kev xwv kom koj yuav ua tau qhov uas kuv tau txib koj.

35 Thiab yog hais tias koj rau siab ua raws li kuv tej lus txib, ces yuav muab koj tsa sawv thaum txog hnub kawg. Amees.