Kev Cai Raus Dej

Lo lus uas siv nyob hauv cov ntawv Kilis txhais hais tias “tso hauv dej” los yog “raus” rau hauv dej. Kev cai raus rau hauv dej los ntawm ib tug uas muaj txoj cai yog thawj txoj kab ke ntawm txoj moo zoo thiab yuav tsum ua txoj kab ke no thiaj los ua tau ib tug mej zeej hauv Yexus Khetos lub Koom Txoos ntawm Tsoom Haiv Neeg Ntseeg hauv Hnub Nyoog Kawg. Ua ntej no yuav tsum muaj kev ntseeg Yexus Khetos thiab hloov siab lees txim. Tom qab ntawd yuav txais lub txiaj ntsim Vaj Ntsuj Plig Dawb Huv thiaj li tiav (2 Nf. 31:13–14). Yuav tsum ua kev cai raus dej los ntawm dej thiab los ntawm tus Ntsuj Plig ua ntej ib tug neeg yuav nkag tau rau hauv lub nceeg vaj xilethi-aus. Adas yog thawj tug uas ua kev cai raus dej (Mauxes 6:64–65). Yexus kuj ua kev cai raus dej kom muaj raws li tag nrho kev ncaj ncees thiab qhia kev rau tag nrho noob neej (Mat. 3:13–17; 2 Nf. 31:5–12).

Vim txhua tus nyob hauv lub ntiaj teb tsis muaj cib fim txais yuav txoj moo zoo hauv lub neej uas txawj tuag no, tus Tswv tau tso cai rau neeg sawv cov neeg tuag cev ua kev cai raus dej. Yog li ntawd, cov uas txais txoj moo zoo hauv lub ntuj ntsuj plig thiaj tsim nyog nkag mus hauv Vajtswv lub nceeg vaj.