Npaivnpaum

Ib co ntawv uas Neeg Henplais thiab Neeg Ntseeg Khetos sau txog tej kev tshwm sim uas los saum ntuj los. Lo lus npaivnpaum txhais tias “tej phau ntawv.” Phau Npaivnpaum yog cov ntawv uas ntau tus yaj saub thiab cov kws sau ntawv sau thaum tus Ntsuj Plig Dawb Huv tshoov lawv lub siab (2 Pet. 1:21).

Cov Neeg Ntseeg Khetos phau Npaivnpaum muaj ob phau, neeg feem ntau hu ob phau no ua Phau Qub thiab Phau Tshiab. Phau Qub muaj tej phau vaj lug kub uas cov neeg Yudais ntawm Filitees siv thaum tus Tswv ua hauj lwm qhuab qhia hauv lub ntiaj teb. Phau Tshiab muaj tej lus uas neeg sau nyob hauv cov Thwj Tim lub caij nyoog thiab neeg xav hais tias cov no dawb huv thiab muaj txoj cai ib yam li cov neeg Yudais cov vaj lug kub muaj. Cov ntawv ntawm Phau Qub los tau muab sib sau ua ke los ntawm cov ntawv uas ib haiv neeg siv tau ntau pua xyoo thiab yuav luag tag nrho yog siv lus Henplais sau cia, tiam sis cov ntawv ntawm Phau Tshiab yog ib tiam neeg uas tau muab sau cia xwb thiab feem ntau yog siv lus Kilis sau cia.

Nyob hauv Phau Qub lo lus tim khawv yog los ntawm ib los lus Henplais uas txhais hais tias “kev khi lus.” Kev Khi Lus Qub yog txoj kev cai uas tau muab rau Mauxes thaum Ixayees xyeej qhov txhij txhua ntawm txoj moo zoo uas Vajtswv cov neeg txij thaum chiv keeb ntawm lub ntiaj teb uas txawj tuag no muaj. Kev Khi Lus Tshiab yog txoj moo zoo raws li Yexus Khetos qhia.

Nyob hauv phau Npaivnpaum uas yog lus Henplais sau (Phau Qub) tau muab tej phau faib ua peb pawg uas hu ua: txoj Kev Cai, cov Yaj Saub, thiab cov Ntawv. Phau Npaivnpaum uas cov Neeg Ntseeg Khetos siv muab cov ntawv faib raws li lub ntsiab ntawm cov ntawv ntawd, xws li keeb kwm, paj lug, thiab kev qhia tej ua yuav muaj los yav tom ntej.

Tej phau ntawv hauv Phau Tshiab los tau tso ua ke raws li no: plaub phau Txoj Moo Zoo thiab Tes Hauj Lwm; Povlauj tej tsab ntawv; tej tsab ntawv ntawm Yakaunpaus, Petus, Yauhas, thiab Yudas; thiab Yauhas txoj Kev Tshwm Sim.

Yexus Khetos lub Koom Txoos ntawm Tsoom Haiv Neeg Ntseeg hauv Hnub Nyoog Kawg hwm thiab saib phau Npaivnpaum rau nqi thiab qhia hais tias tus Tswv tseem muab kev tshwm sim ntxiv los ntawm Nws cov yaj saub hauv hnub nyoog kawg uas txhawb nqa thiab qhia hais tias tej uas Vajtswv ua rau noob neej nyob hauv phau Npaivnpaum yeej muaj tseeb.