Pov Thawj Hwj Mekhixedes

Lub Pov Thawj Hwj Mekhixedes yog lub pov thawj hwj hlob los yog loj zog; lub Pov Thawj Hwj Aloos yog lub pov thawj hwj yau zog. Lub Pov Thawj Hwj Mekhixedes muaj tej yawm sij qhib cov koob hmoov ntawm sab ntsuj plig hauv lub Koom Txoos. Los ntawm cov kab ke ntawm lub pov thawj hwj hlob zog thiaj ua rau lub hwj chim ua neeg zoo li Vajtswv tshwm sim los rau tib neeg pom (Q&K 84:18–25; 107:18–21).

Vajtswv xub tshwm sim lub pov thawj hwj hlob zog no rau Adas. Cov yawg suab thiab cov yaj saub nyob hauv txhua lub caij nyoog tso txoj cai no (Q&K 84:6–17). Thaum xub thawj tau hu lub pov thawj hwj no ua lub Pov Thawj Hwj Dawb Huv, raws li tus Txheej Txheem ntawm Vajtswv Leej Tub. Tom qab ntawd yog hu ua lub Pov Thawj Hwj Mekhixedes (Q&K 107:2–4).

Thaum cov neeg Ixayees tsis ua raws li tej kev khi lus thiab tej koob hmoov ntawm lub Pov Thawj Hwj Mekhixedes, tus Tswv tshem txoj kev cai loj zog tawm mus thiab muab ib lub pov thawj hwj yau zog thiab ib txoj kev cai yau zog rau lawv (Q&K 84:23–26). Tej ntawd hu ua lub Pov Thawj Hwj Aloos thiab Mauxes txoj kev cai. Thaum Yexus los rau lub ntiaj teb, Nws muab lub Pov Thawj Hwj Mekhixedes rau cov neeg Yudais thiab pib txhim tsa lub Koom Txoos rau lawv. Tiam sis, lub pov thawj hwj thiab lub Koom Txoos twb rov qab ploj mus dua los ntawm kev tso qhov tseeb tseg. Yav tom qab ntawd, tau muab ob qho no txum tim rov qab los los ntawm Joseph Smith tus Hluas (Q&K 27:12–13; 128:20; JS—K 1:73).

Nyob hauv lub Pov Thawj Hwj Mekhixedes muaj tej txoj hauj lwm ntawm tus txwj laug, pov thawj hlob, yawg suab, Xya Caum, thiab Thwj Tim (Q&K 107). Lub Pov Thawj Hwj Mekhixedes yeej yuav muaj feem nrog Vajtswv lub nceeg vaj nyob hauv lub ntiaj teb.

Tus Thawj Tswj Hwm ntawm Yexus Khetos lub Koom Txoos ntawm Tsoom Haiv Neeg Ntseeg hauv Hnub Nyoog Kawg yog tus thawj tswj hwm ntawm lub pov thawj hwj hlob zog los yog lub Pov Thawj Hwj Mekhixedes, thiab nws tuav tag nrho cov yawm sij uas muaj feem nrog Vajtswv lub nceeg vaj nyob hauv lub ntiaj teb. Yeej hu tau ib tug txiv neej xwb ua tus Thawj Tswj Hwm, thiab nws yog tib tug neeg nyob hauv lub ntiaj teb uas muaj txoj cai siv tag nrho cov yawm sij ntawm lub pov thawj hwj. (Q&K 107:64–67; 132:7).