Yudas
Nyob hauv Phau Qub, Yakhauj thiab Le-as tus tub thib plaub (Chk. 29:35; 37:26–27; 43:3, 8; 44:16; 49:8). Yakhauj foom koob hmoov rau Yudas hais tias nws yuav ua ib tug thawj coj rau Yakhauj cov tub thiab hais tias Silaus (Yexus Khetos) yuav yog nws tus xeeb ntxwv (Chk. 49:10).
Xeem Yudas
Xeem Yudas yog cov thawj coj tom qab lawv los nyob hauv Kana-as. Lawv cov yeeb ncuab yog xeem Efala-is. Mauxes foom koob hmoov rau xeem Yudas (2Â Kev. 33:7). Tom qab Xalumoos txoj kev kav, xeem Yudas hloov los ua Yudas lub nceeg vaj.
Lub nceeg vaj Yudas
Thaum Lehaunpau-as ua vaj ntxwv, tau muab Xalumoos tej qhov chaw uas nws kav faib ua ob lub nceeg vaj, qhov tseem ceeb yog vim xeem Efala-is thiab xeem Yudas sib khib. Lub nceeg vaj sab qab teb, los yog lub nceeg vaj Yudas, yog xeem Yudas thiab feem coob ntawm xeem Npeyamis. Yeluxalees yog lub nceeg vaj no lub tuam nroog. Feem ntau lawv rau siab teev tiam Yehauvas ntau dua li cov neeg hauv lub nceeg vaj sab qaum teb. Lub nceeg vaj Yudas tsis qhib lug rau kev tawm tsam los ntawm sab qaum teb thiab sab hnub tuaj, thiab txoj kev ua nom ua tswv siab tshaj plaws nyob ntawm xeem neeg Daviv txhais tes mus txog thaum Neeg Npanpiloos yuam lawv poob cev qhev. Lub nceeg vaj Yudas los muaj nyob mus txog 135 xyoos tom qab lub nceeg vaj Ixayees uas muaj neeg coob dua thiab muaj hwj chim loj dua poob mus.
Yudas tus pas
Qhov no hais txog phau Npaivnpaum hais tias yog Yudas tsev neeg ib phau ceev xwm txheej (Exk. 37:15–19). Nyob hauv hnub nyoog kawg, thaum tej caj ceg ntawm tsev neeg Ixayees raug sib sau los ua ke, lawv tej ceev xwm txheej dawb ceev los kuj yuav raug sib sau los ua ke thiab. Tej ceev xwm txheej vaj lug kub no ib phau txhawb ib phau thiab koom ua ke ua tim khawv hais tias Yexus yog tus Khetos, uas yog Ixayees tus Vajtswv thiab ntiaj teb tag nrho tus Vajtswv (JST, Chk. 50:24–36 [Cov Ntawv Ntxiv Tom Kawg]; 2 Nf. 3; 29).