Ua rau neeg rov qab sib raug zoo nrog Vajtswv
Raws li siv hauv vaj lug kub, kev theej txhoj yog kev raug txim rau ib txoj kev txhaum, thiaj li tshem tau lub txim los ntawm kev txhaum ntawm tus uas hloov siab lees txim mus thiab cia nws rov qab sib raug zoo nrog Vajtswv. Yexus Khetos yog tib tug uas muaj peev xwm ua kev theej txhoj zoo tag nrho rau txhua tus tib neeg. Nws muaj peev xwm ua li ntawd vim tau xaiv Nws thiab tsa Nws ua ntej nyob hauv Kev Sib Sab Laj Loj ua ntej tau tsim lub ntiaj teb (Ethaws 3:14; Mauxes 4:1–2; Anpl. 3:27), Nws yog Vajtswv leej tub, thiab Nws ua neej tsis txhaum hlo li. Nws txoj Kev Theej Txhoj yog txoj kev raug txom nyem rau noob neej tej kev txhaum, qhov ua rau Nws ntshav nrog, thiab Nws txoj kev tuag thiab kev sawv hauv qhov ntxa rov qab los tom qab ntawd (Yay. 53:3–12; Lukas 22:44; Mxy. 3:5–11; Amas 7:10–13; Q&K 19:16–19). Vim muaj Kev Theej Txhoj, txhua tus neeg yuav sawv hauv qhov tuag rov qab los nrog lub cev uas tsis txawj tuag (1 Klt. 15:22). Kev Theej Txhoj kuj qhib kev kom Vajtswv zam txim rau peb tej kev txhaum thiab kom peb tau ua neej nrog Vajtswv nyob mus ib txhis. Tiam sis ib tug neeg uas muaj hnub nyoog paub tab thiab tau txais txoj kev cai lawm yuav tsum muaj kev ntseeg Yexus Khetos, hloov siab lees txim rau nws tej kev txhaum, txais cov kab ke cawm seej, thiab ua raws li Vajtswv tej lus txib xwb nws thiaj yuav tau txais cov koob hmoov no. Cov uas tsis tau muaj hnub nyoog lav ris thiab cov uas tsis tau txais txoj kev cai lawv tau kev txhiv dim los ntawm Kev Theej Txhoj (Mxy. 15:24–25; Mln. 8:22). Cov vaj lug kub qhia meej tias yog Khetos tsis tau theej peb lub txhoj, yeej tsis muaj ib txoj kev cai, kab ke los yog kev txi uas them tau rau txoj kev txim lij tej kev txiav txim, thiab tsis muaj hnub uas tib neeg yuav tau rov qab mus nyob hauv Vajtswv lub xub ntiag. (2 Nf. 2; 9).