Tus mej zeej thib peb ntawm Pawg Vajtswv (1Â Yhs. 5:7; Q&K 20:28). Nws yog ib tug Ntsuj Plig xwb, tsis muaj ib lub cev uas muaj nqaij thiab pob txha (Q&K 130:22). Ntau zaus tus Vaj Ntsuj Plig Dawb Huv hu ua tus Ntsuj Plig, los sis Vajtswv tus Ntsuj Plig.
Tus Vaj Ntsuj Plig Dawb Huv muaj ntau txoj hauj lwm tseem ceeb heev nyob hauv txoj hau kev cawm seej. (1) Nws ua tim khawv txog Leej Txiv thiab Leej Tub (1 Klt. 12:3; 3 Nf. 28:11; Ethaws 12:41). (2) Nws qhia qhov tseeb txog tag nrho txhua yam (Yhs. 14:26; 16:13; Mln. 10:5; Q&K 39:6). (3) Nws ua rau cov uas tau hloov siab lees txim thiab ua kev cai raus dej hloov ua neeg dawb huv (Yhs. 3:5; 3 Nf. 27:20; Mauxes 6:64–68). (4) Nws yog tus Ntsuj Plig Dawb Huv ntawm Kev Cog Lus (Q&K 76:50–53; 132:7, 18–19, 26).
Tus Vaj Ntsuj Plig Dawb Huv lub hwj chim los tau rau ib tug tib neeg ua ntej nws ua kev cai raus dej thiab ua tim khawv tias txoj moo zoo muaj tseeb. Tiam sis txoj cai muaj tus Vaj Ntsuj Plig Dawb Huv ua ib tug khub tas mus li, thaum ib tug neeg tsim nyog muaj, yog ib lub txiaj ntsim uas nws tsuas txais tau los ntawm kev tso tes rau saum taub hau los ntawm ib tug uas tuav lub Pov Thawj Hwj Mekhixedes tom qab nws ua kev cai raus dej raws li txoj cai rau hauv Yexus Khetos lub Koom Txoos tseeb.