Tshooj 125
Kev tshwm sim uas tus Yaj Saub Joseph Smith tau txais, nyob hauv Nauvoo, Illinois, lub Peb Hlis Ntuj xyoo 1841, ntsig txog Haiv Neeg Ntseeg nyob hauv ciaj ciam av ntawm Iowa.
1–4, Haiv Neeg Ntseeg yuav tsum txhim tsa tej nroog thiab sib sau mus rau hauv tej ceg txheem ntseeg ntawm Xi-oos.
1 Tus Tswv lub siab nyiam rau haiv neeg ntseeg hauv Ciaj Ciam Av ntawm Iowa yog dab tsi?
2 Muaj tseeb tiag, tus Tswv hais li no, kuv hais rau nej tias, yog cov uas lawv hu lawv tus kheej los ntawm kuv lub npe thiab sim ua kuv haiv neeg ntseeg, yog hais tias lawv yuav ua raws li kuv lub siab nyiam thiab ua raws li kuv tej lus txib ntsig txog lawv, cia lawv sau lawv tus kheej los ua ke mus rau tej chaw uas kuv yuav muab rau lawv los ntawm kuv tus tub qhe Joseph, thiab txhim tsa tej nroog rau kuv lub npe, kom lawv yuav npaj txhij rau tej uas tau tseg cia rau ib lub sij hawm yuav los.
3 Cia lawv txhim tsa ib lub nroog los rau kuv lub npe rau hauv thaj av nyob ntawm lub nroog Nauvoo sab tid, thiab yuav tsum tis npe Xalahelas rau lub nroog ntawd.
4 Thiab cia tag nrho cov los tim sab hnub tuaj, thiab sab hnub poob, thiab sab qaum teb, thiab sab qab teb los, uas xav los nyob rau hauv, los aws lawv tej qub txeeg qub teg nyob rau hauv, thiab tib yam li nyob rau hauv lub nroog Nashville, los sis nyob rau hauv lub nroog Nauvoo, thiab hauv tag nrho tej ceg txheem ntseeg uas kuv tau tsa, tus Tswv hais li.