Tshooj 24
Kev tshwm sim uas tus Yaj Saub Joseph Smith thiab Oliver Cowdery tau txais, nyob hauv Harmony, Pennsylvania, lub Xya Hli Ntuj xyoo 1830. Txawm nyuam qhuav tau plaub lub hlis xwb txij thaum tsa lub Koom Txoos los, tau muaj kev tsim txom ntau, thiab cov thawj coj tau mus nrhiav chaw nkaum nyob rau tej qho chaw nraim zog. Peb zaj kev tshwm sim tom qab no yog muab los mus txhawb, yaum, thiab qhia lawv rau lub sij hawm no.
1–9, Tus Tswv hu Joseph Smith los txhais, tshaj tawm, thiab piav txog cov vaj lug kub; 10–12, Tus Tswv hu Oliver Cowdery los mus tshaj tawm txoj moo zoo; 13–19, Tus Tswv qhia txog txoj kev cai hais txog tej txuj ci tseem ceeb, tej kev foom tsis zoo, kev nchos tej hmoov av ntawm ib tug txhais ko taw, thiab kom txhob nqa hnab nyiaj los yog hnab thoob puab.
1 Saib seb, tus Tswv twb hu thiab xaiv koj los mus sau Phau Ntawv Maumoos, thiab los mus ua kuv txoj hauj lwm qhuab qhia; thiab kuv tau tshem koj tawm hauv koj tej kev txom nyem, thiab tau ntuas koj, ua rau koj dim ntawm tag nrho koj cov yeeb ncuab, thiab koj twb dim ntawm Dab Ntxwg Nyoog tej hwj chim thiab kev tsaus ntuj!
2 Txawm li ntawd los, twb tsis tau daws koj tej kev ua txhaum; txawm li ntawd los, cia li mus koj thiab tsis txhob ua txhaum ntxiv.
3 Rau siab ua koj lub luag hauj lwm; thiab tom qab koj cog qoob loo rau koj tej teb tag thiab ceev zoo lawm, cia li mus nrawm nroos lawm tim pawg ntseeg uas nyob hauv Colesville, Fayette, thiab Manchester, thiab lawv yuav txhawb koj; thiab kuv yuav foom koob hmoov rau lawv ntawm sab ntsuj plig thiab sab cev nqaij daim tawv tib si;
4 Tiam sis yog hais tias lawv tsis txais koj, kuv yuav xa ib txoj kev foom tsis zoo es tsis yog ib txoj koob hmoov los rau lawv.
5 Thiab koj yuav tsum tuav kuv lub npe hu Vajtswv mus ntxiv, thiab sau tej yam uas tus Nplij Siab yuav qhia rau koj, thiab piav tag nrho cov vaj lug kub rau cov ntseeg mus ntxiv.
6 Thiab nyob kiag rau lub sij hawm ntawd yuav muab rau koj qhov koj yuav tsum hais thiab sau, thiab lawv yuav hnov qhov ntawd, yog tsis li ntawd kuv yuav xa ib txoj kev foom tsis zoo los rau lawv es tsis yog ib qho koob hmoov.
7 Vim koj yuav tsum muab tag nrho koj tej hauj lwm pab Xi-oos; thiab thaum ua li no koj yuav muaj zog.
8 Ua siab ntev rau tej kev txom nyem, vim koj yuav muaj ntau; tiam sis cia li nyiaj tej ntawd mus, vim, xyuas seb, kuv nrog koj nyob, kom txog kiag hnub kawg ntawm koj lub neej.
9 Thiab koj yuav tsis muaj zog thaum ua tej hauj lwm ntawm sab cev nqaij daim tawv, vim qhov no tsis yog qhov uas Vajtswv hu koj ua. Cia li ua qhov uas Vajtswv hu koj ua ces koj yuav muaj tej uas pab koj rau siab ua koj lub luag hauj lwm, thiab mus piav tag nrho cov vaj lug kub, thiab tso tes rau saum taub hau thiab txhawb tej pawg ntseeg mus ntxiv.
10 Thiab koj tus kwv tij Oliver yuav ris kuv lub npe mus rau neeg ntiaj teb ntxiv mus, thiab mus rau cov ntseeg thiab. Thiab nws yuav tsum tsis txhob xav hais tias nws hais txaus txog kuv zaj lawm; thiab xyuas seb, kuv yeej nrog nws nyob mus kom txog thaum kawg.
11 Nws yuav tau yeeb koob los ntawm kuv, thiab tsis yog los ntawm nws tus kheej, txawm yog nws qaug zog los sis nws muaj zog, txawm yog nws ua qhev los sis nws nyob ywj pheej;
12 Thiab thaum txhua lub sij hawm, thiab hauv txhua qhov chaw, nws yuav tsum qhib nws lub qhov ncauj thiab tshaj tawm kuv txoj moo zoo yam li nrog lub suab raj hlau nrov, txhua hnub thiab txhua hmo tib si. Thiab kuv yuav muab lub zog rau nws yam li tsis tau pom neeg muaj dua li.
13 Tsis txhob thov kom muaj tej txuj ci tseem ceeb, tsuas yog thaum kuv yuav txib neb xwb, tsuas yog ntiab cov dab phem tawm, kho cov neeg mob, thiab tawm tsam cov nab muaj taug, thiab tej tshuaj lom tau neeg tuag;
14 Thiab tej yam no neb yuav tsum tsis txhob ua, tsuas yog thaum cov uas xav tau kom neb yuav tsum ua xwb, xwv kom thiaj muaj raws li cov vaj lug kub; vim neb yuav ua raws li qhov uas tau muab sau cia lawm.
15 Thiab nyob rau txhua qhov chaw uas neb yuav mus, thiab lawv tsis txais neb los ntawm kuv lub npe, neb yuav tau tseg ib txoj kev foom tsis zoo es tsis yog ib txoj koob hmoov, los ntawm kev nchos tej hmoov av ntawm neb ko taw mus ua tim khawv nkaug lawv, thiab muab neb ko taw so kom huv ntawm tej ntug kev.
16 Thiab yuav muaj tias tus uas yuav xuas lawv txhais tes ntsiab nthos ua tsiv ua nruj rau neb, neb yuav tsum tuav kuv lub npe txib kom tus ntawd raug nplawm; thiab, saib seb, kuv yuav nplawm lawv raws li neb tej lus, thaum txog lub sij hawm kuv pom zoo.
17 Thiab tus uas yuav foob neb rau nom rau tswv ces yuav foom tsis zoo rau tus ntawd raws li txoj kev cai.
18 Thiab neb tsis txhob nqa hnab nyiaj los yog hnab thoob puab, los yog tej pas nrig, los yog ob lub tsho loj, vim cov ntseeg yuav muab rau neb teev sij hawm kiag uas neb xav tau kom muaj tej khoom noj thiab tej khaub ncaws hnav, thiab tej khau rau thiab tej nyiaj siv, thiab tej hnab thoob puab.
19 Vim tus Tswv hu neb mus yim kuv lub vaj txiv hmab nrog ib txoj kev yim loj kawg nkaus, muaj tseeb tiag, twb yog rau zaum kawg; muaj tseeb tiag, thiab tag nrho cov neb tau tsa, thiab lawv yuav tsum ua kom raws kiag li tus txheej txheem no. Amees.