1 Thiab ntxiv, kuv hais tseeb rau nej, kuv cov phooj ywg, kuv muab ib lo lus txib rau nej hais tias, nej yuav tsum pib ib txoj hauj lwm teeb thiab npaj kev pib ua thiab lub hauv paus ntawm lub nroog ntawm ceg txheem ntseeg ntawm Xi-oos, nyob hauv thaj av Kirtland no, pib ntawm kuv lub tsev mus.

2 Thiab saib seb, yuav tsum ua li ntawd raws li tus qauv uas kuv tau muab rau nej.

3 Thiab cia li muab thawj kem av nyob rau sab qab teb fij tseg rau kuv los ua ib lub tsev rau pawg thawj tswj hwm, rau pawg thawj tswj hwm tej hauj lwm, rau kev txais tej kev tshwm sim; thiab rau txoj kev ua hauj lwm qhuab qhia ntawm pawg thawj tswj hwm, ua txhua yam raws li lub koom txoos thiab nceeg vaj.

4 Kuv hais tseeb rau nej tias, yuav tsum ua lub tuam tsev kom tsib caug tsib taws dav thiab rau caum tsib taws ntev, nyob rau txheej sab haud.

5 Thiab yuav ua kom muaj ib txheej qis zog thiab ib txheej siab zog, raws li tus qauv uas yuav muab los rau nej tom qab no mus.

6 Thiab yuav tsum muab lub tsev no fij rau tus Tswv txij lub hauv paus ntawd mus, raws li tus txheej txheem ntawm lub pov thawj hwj, raws li tus qauv uas yuav muab los rau nej tom qab no mus.

7 Thiab yuav tsum muab lub tsev tag nrho fij rau tus Tswv rau pawg thawj tswj hwm txoj hauj lwm.

8 Thiab nej yuav tsum txhob pub ib yam dab tsi tsis huv los mus rau hauv; thiab kuv lub yeeb koob yuav nyob ntawd, thiab kuv lub yeeb haum yuav nyob ntawd.

9 Tiam sis yog hais tias muaj ib yam dab tsi tsis huv los mus rau hauv, ces kuv lub yeeb koob yuav tsis nyob ntawd; thiab kuv lub yeeb haum yuav tsis los mus rau haud.

10 Thiab ntxiv, kuv hais tseeb rau nej tias, yuav tsum muab kem av thib ob nyob rau sab qab teb fij rau kuv los ua ib lub tsev rau kuv, rau txoj hauj lwm luam kuv cov vaj lug kub uas tau muab txhais lawm, thiab txhua yam uas kuv yuav txib nej.

11 Thiab lub tsev no yuav tsum yog tsib caug tsib taws dav thiab rau caum tsib taws ntev, nyob rau txheej sab hauv; thiab yuav muaj ib txheej qis zog thiab ib txheej siab zog.

12 Thiab yuav muab lub tsev no fij tag nrho rau tus Tswv txij lub hauv paus ntawd mus, rau txoj hauj lwm luam ntawv, rau txhua yam uas kuv yuav txib nej, kom dawb huv, kom tsis qias, raws li tus qauv ntawm txhua yam ib yam li yuav muab los rau nej.

13 Thiab nyob rau ntawm kem av thib peb kuv tus tub qhe Hyrum Smith yuav txais nws qub txeeg qub teg.

14 Thiab nyob rau ntawm kem av thiab ib thib thib ob nyob rau sab qaum teb kuv ob tug tub qhe Reynolds Cahoon thiab Jared Carter yuav txais nkawd qub txeeg qub teg—

15 Kom nkawd yuav ua tau txoj hauj lwm uas kuv tau tsa rau nkawd ua, kom ua ib pawg ntaus tswv yim los ua kuv tej tsev, raws li lo lus txib, uas kuv, tus Tswv uas yog Vajtswv, tau muab los rau nej.

16 Tsis txhob rawm ua ob lub tsev no kom txog thaum kuv muab ib lo lus txib los rau nej ntsig txog ob lub tsev ntawd tso.

17 Thiab nim no kuv tsis muab ntxiv rau nej lub sij hawm no. Amees.