Tshooj 57
Kev tshwm sim uas tus Yaj Saub Joseph Smith tau txais, nyob hauv Xi-oos, Ciaj Ciam Av Jackson, Missouri, lub Xya Hli Ntuj hnub tim 20, xyoo 1831. Kom ua raws li tus Tswv lo lus txib kom mus rau Missouri, qhov chaw uas Nws yuav qhia lawv txog “thaj av ntawm nej qub txeeg qub teg” (tshooj 52), cov txwj laug tau mus ntawm Ohio rau tim Missouri ciaj ciam av ntawm sab hnub poob. Joseph Smith xav txog cov Neeg Lamas txoj kev noj kev nyob thiab xav tias: “Thaum twg lub hav zoov mam tawg paj zoo li lub paj ntshua nplaim? Thaum twg mam txhim tsa Xi-oos kom muaj yeeb koob, thiab Koj lub tuam tsev yuav nyob qhov twg, qhov chaw uas txhua haiv neeg yuav tuaj rau hauv thaum hnub nyoog kawg?” Tom qab ntawd nws tau txais txoj kev tshwm sim no.
1–3, Independence, Missouri, yog qhov chaw rau lub Nroog Xi-oos thiab lub tuam tsev; 4–7, Haiv Neeg Ntseeg yuav tsum muas av thiab txais yuav qub txeeg qub teg rau cheeb tsam ntawd; 8–16, Sidney Gilbert yuav tsum tsim ib lub tsev muag khoom, kom William W. Phelps ua ib tug luam ntawv, thiab kom Oliver Cowdery kho tej ntaub ntawv uas yuav muab luam.
1 Cia li mloog, auj nej cov uas yog txwj laug ntawm kuv lub koom txoos, tus Tswv nej tus Vajtswv hais, cov tau sib txoos nej tus kheej los ua ke, raws li kuv tej lus txib, nyob hauv thaj av no, uas yog thaj av Missouri, uas yog thaj av uas kuv tau xaiv thiab tau muab fij tseg rau haiv neeg ntseeg los sib sau.
2 Yog li ntawd, nov yog thaj av uas cog lus cia, thiab yog qhov chaw rau lub nroog Xi-oos.
3 Thiab tus Tswv nej tus Vajtswv hais li no, yog nej xav tau laj lim tswv yim ces qhov no yog tswv yim. Saib seb, qhov chaw uas nim no hu ua Independence ces yog qhov chaw hauv plawv; thiab ib qho chaw rau lub tuam tsev yog nyob ntawm sab hnub poob ntawd, rau ntawm ib thaj av uas tsis deb ntawm lub tsev hais plaub.
4 Yog li ntawd, yog kev muaj tswv yim kom haiv neeg ntseeg yuav tsum muas thaj av, thiab txhua thaj av nyob rau sab hnub poob, kom txog kab ciaj ciam mus kiag hauv nruab nrab ntawm cov Neeg Yudais thiab Lwm Haiv Neeg;
5 Thiab txhua thaj av npuab tej nras tiaj, npaum li uas kuv cov thwj tim muaj peev xwm muas thaj av. Saib seb, qhov no yog tswv yim, xwv kom lawv yuav tau thaj av los ua ib qho qub txeeg qub teg kav ib txhis.
6 Thiab cia kuv tus tub qhe Sidney Gilbert ua lub luag hauj lwm uas kuv tau muab rau nws lawm, los txais tej nyiaj txiag, los ua ib tug sawv cev rau lub koom txoos, mus muas thaj av ntawm tag nrho tej thaj tsam ib puag ncig, npaum li uas muaj peev xwm ua tau raws li kev ncaj ncees, thiab raws li laj lim tswv yim yuav coj kev.
7 Thiab cia kuv tus tub qhe Edward Partridge ua lub luag hauj lwm uas kuv tau muab rau nws, thiab muab haiv neeg ntseeg tej qub txeeg qub teg faib rau lawv, kom raws li kuv tau txib; thiab cov uas nws tau tsa los pab nws thiab.
8 Thiab ntxiv, kuv hais tseeb rau nej tias, cia kuv tus tub qhe Sidney Gilbert txhim tsa nws tus kheej rau hauv qhov chaw no, thiab ua ib lub tsev muag khoom, kom nws yuav tau muag tej khoom tsis muaj kev dag ntxias, kom nws yuav tau nyiaj los mus muas av los pab rau haiv neeg ntseeg, thiab xwv kom nws yuav muab tau txhua yam uas cov thwj tim yuav tsum muaj los txhim tsa lawv rau hauv lawv tej qub txeeg qub teg.
9 Thiab cia kuv tus tub qhe Sidney Gilbert mus muab ib daim ntawv tso cai thiab—saib seb qhov no yog laj lim tswv yim, thiab tus uas nyeem los cia tus ntawd to taub—kom nws thiaj li xa tau tej khoom mus rau cov neeg, los ntawm cov uas nws pom zoo tsa los ua hauj lwm khaws ntaub ntawv;
10 Thiab nrhiav noj nrhiav haus rau kuv haiv neeg ntseeg li no, kom yuav muab kuv txoj moo zoo tshaj tawm rau cov uas zaum hauv qhov tsaus ntuj thiab nyob hauv thaj tsam thiab hauv tus duab ntxoo ntawm txoj kev tuag.
11 Thiab ntxiv, kuv hais tseeb rau nej tias, cia kuv tus tub qhe William W. Phelps txhim tsa nws tus kheej rau hauv qhov chaw no, thiab muab nws tsa ua ib tug luam ntawv rau lub koom txoos.
12 Thiab xyuas seb, yog neeg ntiaj teb txais tej uas nws sau—saib seb qhov no yog laj lim tswv yim—cia nws muab txhua yam uas nws muab tau raws li kev ncaj ncees, kom pab tau haiv neeg ntseeg.
13 Thiab cia kuv tus tub qhe Oliver Cowdery pab nws, ib yam li kuv tau txib lawm, nyob rau txhua qhov chaw uas kuv yuav txib nws mus, mus luam ntawv, thiab mus kho, thiab mus xaiv, kom kuv pom tias txhua yam yeej zoo, ib yam li tus Ntsuj Plig yuav ua pov thawj txog qhov tseeb los ntawm nws.
14 Thiab yog li ntawd cia cov kuv tau hais txhim tsa lawv tus kheej rau hauv thaj av Xi-oos, sai li sai tau, nrog lawv tsev neeg, mus ua tej uas kuv twb tau hais lawm.
15 Thiab nim no hais txog txoj kev sib sau—Cia tus npisov thiab tus sawv cev npaj chaw, kom sai li sai tau, rau tej tsev neeg uas tus Tswv tau txib kom los rau hauv thaj av no, thiab muab tej tsev neeg no txhim tsa rau hauv lawv qhov qub txeeg qub teg.
16 Thiab rau cov tseem tshuav ntawm cov txwj laug thiab cov mej zeej mam muab kev qhia ntxiv tom qab no mus. Twb yog li ntawd. Amees.