Tshooj 60
Kev tshwm sim uas tus Yaj Saub Joseph Smith tau txais, nyob hauv Independence, Ciaj Ciam Av Jackson, Missouri, lub Yim Hli Ntuj hnub tim 8, xyoo 1831. Nyob rau lub caij nyoog no cov txwj laug uas tau mus rau Ciaj Ciam Av Jackson thiab koom tes pab muab thaj av thiab qhov chaw ua lub tuam tsev fij tseg xav paub seb lawv yuav tsum ua dab tsi.
1–9, Cov txwj laug yuav tsum tshaj tawm txoj moo zoo rau hauv tej pawg neeg phem; 10–14, Lawv yuav tsum tsis txhob nkim lawv lub sij hawm, los yog zais lawv tej choj nyiaj; 15–17, Lawv yuav yaug tau lawv txhais ko taw ua tim khawv nkaug cov uas xyeej txoj moo zoo.
1 Saib seb, tus Tswv hais li no rau cov txwj laug ntawm nws lub koom txoos, cov uas yuav tsum rov qab mus nrawm nroos rau tim thaj av uas lawv tau khiav los: Saib seb, nws ua rau kuv zoo siab tias, nej tau los rau ntawm no;
2 Tiam sis kuv tsis txaus siab rau ib co, vim lawv tsis qhib lawv qhov ncauj, tiam sis lawv zais choj nyiaj uas kuv tau muab rau lawv, vim rau qhov txoj kev ntshai neeg. Kev txom nyem raug cov zoo li no, vim kuv txoj kev chim siab twb npau rau lawv.
3 Thiab yuav muaj tias, yog lawv tsis rau siab zog ntseeg kuv, kuv yuav muab choj nyiaj tshem mus, tsis hais qhov uas lawv twb tau lawm.
4 Vim kuv, tus uas yog tus Tswv, kav nyob saum ntuj, thiab kav nyob hauv tej pab tub rog hauv ntiaj teb; thiab nyob rau hnub uas kuv xaiv kuv cov pov haum, txhua tus neeg yuav paub yam uas qhia tau Vajtswv lub hwj chim.
5 Tiam sis, kuv hais lus tseeb rau nej ntsig txog nej txoj kev mus rau tim thaj av nej tau khiav los. Cia li ua ib lub nkoj, los sis mus muas, raws li nej pom zoo, nws tsis ua li cas rau kuv, thiab nej cia li mus nrawm nroos lawm tim qhov chaw uas hu ua St. Louis.
6 Thiab txij ntawd mus ces kom kuv cov tub qhe, Sidney Rigdon, Joseph Smith, tus Hluas, thiab Oliver Cowdery lawv mus lawm tim Cincinnati;
7 Thiab nyob rau qhov chaw ntawd kom lawv tsa lawv lub suab thiab ua suab nrov tshaj tawm kuv txoj lus, tsis txhob npau taws los yog ua xyem xyav, tsa tes dawb huv rau saum lawv. Vim kuv muaj peev xwm ua kom nej dawb huv, thiab tus Tswv zam txim rau nej tej kev txhaum lawm.
8 Thiab cia cov seem tshuav mus ntawm St. Louis mus ob leeg ua ib khub, thiab tshaj tawm txoj lus, nyob hauv tej pawg neeg phem, tsis txhob maj, kom txog thaum lawv rov qab los rau tej pawg ntseeg uas lawv tau tawm tuaj.
9 Thiab tag nrho li no yog kom ua zoo rau tej pawg ntseeg; vim kom muaj raws li lub hom phiaj no kuv thiaj tau xa lawv mus.
10 Thiab cia kuv tus tub qhe Edward Partridge muab qhov nyiaj uas kuv tau muab rau nws faib, ib feem rau kuv cov txwj laug uas tus Tswv txib kom rov qab mus;
11 Thiab tus uas muaj peev xwm, kom nws them rov qab rau tus sawv cev; thiab tus uas tsis muaj peev xwm, tus ntawd tsis tas them.
12 Thiab nim no kuv hais lus txog cov seem tshuav uas yuav los rau thaj av no.
13 Saib seb, tus Tswv xa lawv mus tshaj tawm kuv txoj moo zoo rau tej pawg neeg phem; yog li ntawd, kuv muab ib lo lus txib rau lawv, li no: Nej yuav tsum tsis txhob nkim nej lub sij hawm, thiab nej tsis txhob zais nej choj nyiaj kom tsis muaj neeg paub.
14 Thiab tom qab nej los txog rau thaj av Xi-oos, thiab tshaj tawm kuv txoj lus, nej cia li rov qab los nrawm nroos, tshaj tawm kuv txoj lus nyob hauv tej pawg neeg phem, tsis txhob maj, thiab txhob npau taws los yog sib cav sib ceg.
15 Thiab nchos tej hmoov av ntawm nej ko taw rau cov uas tsis txais yuav nej, txhob ua ntawm lawv xub ntiag, tsam nej thab lawv, tiam sis ua ntsiag to; thiab ntxuav nej txhais ko taw, ua tim khawv nkaug lawv thaum txog hnub txiav txim.
16 Saib seb, qhov no twb txaus rau nej, thiab yog lub siab nyiam ntawm tus uas tau xa nej mus.
17 Thiab los ntawm kuv tus tub qhe Joseph Smith, tus Hluas, lub qhov ncauj, mam qhia kom paub ntsig txog Sidney Rigdon thiab Oliver Cowdery nkawd. Cov seem tshuav tom qab no mus. Twb yog li ntawd. Amees.