Tshooj 47
Kev tshwm sim uas tus Yaj Saub Joseph Smith tau txais, hauv Kirtland, Ohio, lub Peb Hlis Ntuj hnub tim 8, xyoo 1831. John Whitmer, tus uas twb ua ib tug neeg khaws ntaub ntawv rau tus Yaj Saub lawm, thaum xub thawj nws yig thaum Joseph Smith thov nws ua tus kws sau keeb kwm thiab tus teev ntawv ntawm lub Koom Txoos, los pauv Oliver Cowdery chaw. Nws sau hais tias, “Kuv tsis xav ua tiam sis kuv to taub tias kuv yuav tsum ua raws li tus Tswv lub siab nyiam, thiab yog nws xav kom kuv ua, kuv xav kom nws qhia kuv dhau los ntawm Joseph tus Pom Tau.” Tom qab Joseph Smith txais txoj kev tshwm sim no, John Whitmer kam txais thiab ua lub luag hauj lwm uas tau tsa nws los ua.
1–4, Tus Tswv tsa John Whitmer los sau lub Koom Txoos tej keeb kwm thiab los sau ntawv rau tus Yaj Saub.
1 Saib seb, kuv xav tias tsim nyog uas kuv tus tub qhe John yuav sau thiab ceev ib zaj keeb kwm mus zuj zus, thiab pab koj, kuv tus tub qhe Joseph, ntawm kev sau txhua yam uas yuav muab rau koj, kom txog thaum hu nws mus ua lwm yam dej num tso.
2 Ntxiv, kuv hais tseeb rau koj tias nws kuj tsa tau nws lub suab nyob hauv tej kev sib ntsib thiab, thaum twg uas tsim nyog.
3 Thiab ntxiv, kuv hais rau koj tias yuav muab nws tsa los sau lub koom txoos tej ceev xwm txheej thiab keeb kwm kom tsis tu ncua; vim kuv tau tsa Oliver Cowdery mus ua lwm lub luag hauj lwm lawm.
4 Yog li ntawd, npaum li uas nws rau siab ntseeg, tus Nplij Siab yuav muab hauj lwm kom sau tej yam no rau nws. Twb yog li ntawd. Amees.