Tshooj 122
Tus Tswv txoj lus rau tus Yaj Saub Joseph Smith, thaum nws raug tso rau hauv lub tsev kaw hauv Liberty, Missouri. Tshooj no yog ib feem ntawm ib tsab ntawv uas tau sau los rau lub Koom Txoos thaum lub Peb Hlis Ntuj hnub tim 20, xyoo 1839 (saib cov lus piav lub ntsiab ntawm tshooj 121).
1–4, Neeg nyob thoob plaws lub ntiaj teb yuav nug txog lub npe Joseph Smith; 5–7, Tag nrho nws tej kev plhom sij thiab tej kev txom nyem yuav muab kev kawm rau nws thiab yuav zoo rau nws; 8–9, Neeg Leej Tub tau nqis mus qis tshaj tag nrho tej ntawd.
1 Neeg nyob thoob plaws lub ntiaj teb yuav nug txog koj lub npe, thiab cov neeg ruam yuav thuam koj, thiab ntuj txiag teb tsaus yuav sib zog tawm tsam koj;
2 Tiam sis cov muaj siab dawb, thiab cov muaj tswv yim, thiab cov tsim nuj, thiab cov tsim txiaj, yuav nrhiav tej lus ntuas, thiab hwj chim, thiab tej koob hmoov tas mus li los ntawm koj txhais tes.
3 Thiab koj cov neeg yuav tsis tig los tawm tsam koj los ntawm tej neeg ntxeev siab tej lus tim khawv.
4 Thiab txawm yog lawv lub hwj huam yuav ua rau koj raug tso rau hauv teeb meem, thiab rau hauv tej hlau thiab tej phab ntsa, los koj yeej yuav tau lub sam xeeb; thiab tsuas yog rau ib nyuag pliag xwb ces koj lub suab yuav txaus ntshai dua li tus tsov ntxhuav qus nyob hauv koj cov yeeb ncuab, vim yog koj txoj kev ncaj ncees; thiab koj tus Vajtswv yuav sawv ntawm koj ib sab mus ib txhiab thiab ib txhis.
5 Yog hais tias tus Tswv hu koj kom mus hla tej kev txom nyem; yog hais tias koj muaj tej kev plhom sij nyob nrog tej kwv tij cuav; yog hais tias koj muaj tej kev plhom sij nyob nrog tej tub sab; yog hais tias koj muaj kev plhom sij nyob saum nruab nqhuab los sis hauv dej hiav txwv;
6 Yog hais tias koj raug liam nrog txhua yam kev liam cuav; yog hais tias koj cov yeeb ncuab tawm tsam ntaus koj; yog hais tias lawv muab koj rub rhe tawm ntawm koj txiv thiab koj niam thiab koj cov kwv tij thiab koj cov muam xub ntiag mus; thiab yog hais tias koj cov yeeb ncuab rho ntaj thiab muab koj rub rhe tawm ntawm koj tus poj niam, thiab ntawm koj roj koj ntshav xub ntiag mus, thiab yog hais tias koj tus tub hlob, txawm yog tsuas muaj rau xyoo xwb, yuav dai rawv koj ris tsho, thiab yuav hais tias, Kuv txiv, kuv txiv, vim li cas koj nyob tsis tau nrog peb? Auj, kuv txiv, cov neeg no yuav ua li cas rau koj? thiab yog thaum ntawd luag muab rab ntaj thawb hlo nws tawm ntawm koj mus, thiab muab koj cab mus rau hauv lub tsev kaw, thiab koj cov yeeb ncuab yuav nyas ntxhias puag ncig koj zoo li tej hma xav haus ntshav me nyuam yaj;
7 Thiab yog hais tias luag muab koj pov rau hauv lub qhov taub, los yog mus rau cov neeg tua neeg txhais tes, thiab raug luag txiav txim tuag rau koj; yog koj raug muab pov rau hauv dej tob; yog tej nthwv dej hiav txwv tuav hauv tawm tsam koj; yog tej cua daj cua dub hloov los ua koj tus yeeb ncuab; yog saum ntuj cia li tsaus tsaus, thiab yog txhua yam ntuj tsim koom siab los thaiv txoj kev; thiab tshaj txhua yam, yog hais tias ntuj txiag teb tsaus lub qhov ncauj kiag yuav qhib loj loj raws koj, koj yuav tsum paub, kuv tus tub, hais tias tag nrho tej yam no yuav muab kev kawm rau koj, thiab yuav zoo rau koj.
8 Neeg Leej Tub tau nqis mus qis tshaj tag nrho tej ntawd. Koj puas tseem ceeb dua nws?
9 Yog li ntawd, nyob raws nraim koj txoj kev, thiab lub pov thawj hwj yuav nyob nrog koj; vim twb teem ciaj ciam rau tej ntawd, tej ntawd yeej hla tsis tau. Twb paub koj yuav muaj pes tsawg hnub, thiab koj yuav muaj pes tsawg xyoo los yeej yuav tsis muaj tsawg dua; yog li ntawd, tsis txhob ntshai tej yam neeg ua tau, vim Vajtswv yuav nrog koj nyob mus ib txhiab thiab ib txhis li.