1 Thiab nim no tau muaj tias tom qab ob peb xyoos dhau mus, tau muaj ib tug txiv neej tuaj nyob hauv cov Neeg Nifais, nws lub npe hu ua Seles.

2 Thiab tau muaj tias nws pib qhuab qhia nyob hauv cov neeg, thiab tshaj tawm rau lawv tias yuav tsis muaj Khetos. Thiab nws tshaj tawm ntau yam uas qhuas ntxias cov neeg; thiab nws ua li no xwv kom nws yuav ntxeev tau Khetos txoj lus qhuab qhia.

3 Thiab nws rau siab ua hauj lwm xwv kom nws yuav ntxias coj tau cov neeg lub siab mus, nws thiaj li ntxias coj tau ntau tus lub siab mus; thiab vim nws paub ntsoov tias kuv, Yakhauj, ntseeg tus Khetos uas yuav los, nws nrhiav sij hawm ntau zaus kom nws tuaj ntsib kuv.

4 Thiab nws yeej muaj kev kawm, ua rau nws paub tag nrho cov neeg yam lus; yog li ntawd, nws muaj peev xwm siv ntau yam uas qhuas ntxias, thiab muaj hwj chim ntau txawj hais lus, raws li tus dab phem lub hwj chim.

5 Thiab nws cia siab tias nws yuav rhuav tau kuv txoj kev ntseeg, txawm hais tias kuv twb tau pom ntau yam kev tshwm sim thiab ntau yam ntawm tej xwm txheej no; vim kuv yeej tau pom cov tim tswv lawm tiag, thiab lawv tau los txhawb pab kuv. Thiab kuv kuj tau hnov kiag tus Tswv lub suab hais lus rau kuv, tej lub sij hawm; yog li ntawd, thiaj tsis muaj peev xwm ntxias tau kuv.

6 Thiab tau muaj tias nws tuaj ntsib kuv, thiab nws hais lus rau kuv zoo li no, hais tias: Tij laug Yakhauj, kuv tau nrhiav ntau kom muaj sij hawm kom kuv tau hais lus rau koj; vim kuv tau hnov thiab kuj paub tias koj tawm mus ncig ntau heev, mus qhuab qhia tej uas koj hu ua txoj moo zoo, los sis Khetos txoj lus qhuab qhia.

7 Thiab koj tau coj cov neeg no coob leej mus kom lawv hloov txoj kev yog ntawm Vajtswv, thiab tsis ua raws li Mauxes txoj kev cai uas yog txoj kev yog; thiab muab Mauxes txoj kev cai ntxeev mus teev tiam ib tug neeg uas koj hais tias yuav los ntau pua xyoo yav tom ntej no. Thiab nim no saib seb, kuv, Seles, hais rau koj paub tias qhov no yog saib tsis taus Vajtswv kiag li; vim yeej tsis muaj ib tug neeg twg yuav paub txog tej yam zoo li ntawd; vim nws tsis muaj peev xwm qhia tau tej uas yuav muaj los. Thiab Seles tau cam tawm tsam kuv zoo li no.

8 Tiam sis saib seb, tus Tswv uas yog Vajtswv pub nws tus Ntsuj Plig nplua mias los rau hauv kuv lub siab, kuv thiaj ua rau nws poob ntsej muag thaum nws hais lus.

9 Thiab kuv hais rau nws tias: Puas yog koj xyeej Khetos tus uas yuav los? Thiab nws hais tias: Yog hais tias muaj ib tug Khetos, kuv yuav tsis xyeej nws; tiam sis kuv paub tias yeej tsis muaj Khetos, yeej tsis tau muaj dua, thiab yeej yuav tsis muaj.

10 Thiab kuv hais rau nws tias: Koj puas ntseeg cov vaj lug kub? Thiab nws teb tias, kuv ntseeg.

11 Thiab kuv hais rau nws tias: Yog li ntawd koj tsis to taub cov vaj lug kub; vim cov vaj lug kub yeej ua tim khawv txog Khetos tiag. Saib seb, kuv hais rau koj tias yeej tsis muaj ib tug yaj saub twg uas tau sau, los sis tau qhia tej yuav muaj los yav tom ntej, tsuas yog tias lawv tau hais txog tus Khetos no xwb.

12 Thiab tsis tas li no xwb—nws tau ua tshwm sim rau kuv, vim kuv hnov thiab pom; thiab nws kuj tau ua tshwm sim rau kuv los ntawm tus Vaj Ntsuj Plig Dawb Huv lub hwj chim; yog li ntawd, kuv paub tias yog tsis muaj txoj kev theej txhoj ces tib neeg sawv daws yeej yuav ploj mus.

13 Thiab tau muaj tias nws hais rau kuv tias: Ua ib lub cim rau kuv saib los ntawm tus Vaj Ntsuj Plig Dawb Huv lub hwj chim no, uas koj paub ntau txog.

14 Thiab kuv hais rau nws tias: Kuv yog leej twg es kuv ho yuav sim Vajtswv siab kom nws ua ib lub cim rau koj saib txog tej uas koj twb paub tias muaj tseeb no? Tiam sis koj tseem xyeej tias tsis muaj Khetos, vim koj yog tus dab phem li. Txawm li ntawd los, tsis yog ua li kuv lub siab nyiam; tiam sis yog Vajtswv rau txim rau koj, cia qhov ntawd ua ib lub cim rau koj tias nws yeej muaj hwj chim, nyob saum ntuj thiab nyob hauv ntiaj teb; thiab ua ib lub cim rau koj tias Khetos yeej yuav los. Thiab, auj tus Tswv es, ua li koj lub siab nyiam, thiab tsis yog ua li kuv lub siab nyiam.

15 Thiab tau muaj tias thaum kuv, Yakhauj, tau hais tej lus no tas lawm, tus Tswv lub hwj chim los rau nws, ua rau nws thiaj vau rau hauv pem teb. Thiab tau muaj tias luag pub mov tu nws tau ntau hnub.

16 Thiab tau muaj tias nws hais rau cov neeg tias: Tag kis nej cia li sib sau tuaj ua ke, vim kuv yuav tuag; yog li ntawd, kuv xav hais lus rau cov neeg ua ntej kuv yuav tuag.

17 Thiab tau muaj tias tag kis cov neeg coob coob tuaj sib sau ua ke; thiab nws hais lus meej rau lawv thiab thim tej uas nws tau qhia lawv, thiab lees tias nws ntseeg Khetos, thiab tus Vaj Ntsuj Plig Dawb Huv lub hwj chim, thiab tej tim tswv txoj kev los txhawb pab.

18 Thiab nws hais lus meej rau lawv, hais tias nws tau raug ntxias los ntawm tus dab phem lub hwj chim. Thiab nws hais txog ntuj txiag teb tsaus, thiab hais txog lub neej nyob mus ib txhis, thiab hais txog kev rau txim nyob mus ib txhis.

19 Thiab nws hais tias: Kuv ntshai tsam kuv tau ua txoj kev txhaum uas zam tsis tau txim rau, vim kuv tau dag rau Vajtswv; vim kuv tsis lees tias kuv ntseeg Khetos, thiab hais tias kuv ntseeg cov vaj lug kub; thiab cov vaj lug kub yeej ua tim khawv txog nws tiag. Thiab vim yog kuv dag rau Vajtswv li ntawd kuv ntshai heev tias tsam kuv yuav raug phem heev kawg li; tiam sis kuv thov lees txim rau Vajtswv.

20 Thiab tau muaj tias thaum nws hais tej lus no tas nws tsis muaj peev xwm hais tau ntxiv lawm, thiab nws txawm tuag lawm.

21 Thiab thaum cov neeg coob coob tau pom tias nws hais tej yam no thaum nws tab tom yuav tuag, lawv ceeb loj kawg nkaus li; ua rau Vajtswv lub hwj chim thiaj nqis los rau lawv, thiab ua rau lawv tsis muaj zog li lawv thiaj vau rau hauv pem teb.

22 Nim no, tej no ua rau kuv, Yakhauj, zoo siab, vim kuv tau thov tej no ntawm kuv Txiv tus uas nyob saum ntuj ceeb tsheej; vim nws tau hnov kuv lub suab taij thiab tau teb kuv tej lus thov.

23 Thiab tau muaj tias Vajtswv tau muab nws txoj kev thaj yeeb thiab txoj kev hlub rov qab txum tim dua los nyob hauv cov neeg; thiab lawv tshawb xyuas cov vaj lug kub, thiab tsis mloog tus txiv neej phem no tej lus ntxiv lawm.

24 Thiab tau muaj tias cov neeg Nifais tau ntaus tswv yim ntau yam los coj thiab rov qab txum tim cov Neeg Lamas kom los paub qhov tseeb; tiam sis txhua yam twb tsis muaj qab hau, vim lawv nyiam tej kev ua rog thiab kev nqaij ntuag ntshav nrog, thiab lawv ntxub peb, uas yog lawv cov kwv tij, yam li tsis paub kawg. Thiab los ntawm lub hwj chim ntawm lawv tej cuab yeej ua rog lawv tau nrhiav kev tsis tu ncua ua kom peb puas tsuaj.

25 Yog li ntawd, Nifais cov neeg thiaj tau siv lawv tej riam phom los tiv thaiv tawm tsam lawv, siv tag nrho lawv lub dag zog, thiab cia siab ntsoov rau tus Vajtswv thiab lub pob zeb ntawm lawv txoj kev cawm seej; yog li ntawd, lawv thiaj tseem kov yeej lawv tej yeeb ncuab.

26 Thiab tau muaj tias kuv, Yakhauj, tau pib laus; thiab vim phau ceev xwm txheej ntawm cov neeg no muab ceev rau saum Nifais lwm cov phiaj, yog li ntawd, kuv xaus phau ceev xwm txheej no, qhia hais tias kuv tau sau kom zoo li zoo tau raws li tej uas kuv paub, hais tias lub sij hawm dhau mus nrog peb, thiab peb lub neej txoj sia dhau mus yam li ib zaj npau suav, peb yog ib co neeg twj cuab thiab ib co neeg ua dab tsi ua tiag tiag, cov neeg loj leeb, raug ntiab tawm ntawm Yeluxalees, yug nyob hauv kev txom nyem, nyob hauv hav zoov, thiab peb cov kwv tij ntxub peb, uas ua rau muaj kev ua rog thiab kev sib cav sib ceg; yog li ntawd, peb muaj kev tu siab tas peb lub neej.

27 Thiab kuv, Yakhauj, tau pom tias tsis ntev no kuv yeej yuav tau nqis mus rau hauv kuv lub qhov ntxa; yog li ntawd, kuv tau hais rau kuv tus tub Enos tias: Coj cov phiaj no mus. Thiab kuv qhia rau nws tej yam uas kuv tus tij laug Nifais tau txib kuv, thiab nws cog lus tias nws yuav ua raws li tej lus txib ntawd. Thiab kuv xaus tej lus uas kuv sau rau saum cov phiaj no, tej lus sau uas tsis muaj ntau; thiab rau cov uas nyeem cov lus no kuv thov ncaim nej mus, cia siab tias kuv cov kwv tij coob tus yuav nyeem kuv tej lus. Cov kwv tij, thov Vajtswv nrog nej nyob.