1 Tej lus uas Yakhauj, Nifais tus kwv, tau hais rau Nifais cov neeg tom qab Nifais tuag:

2 Nim no, kuv cov kwv tij uas kuv hlub es, kuv, Yakhauj, raws li txoj hauj lwm rau Vajtswv uas kuv ris, los rau siab ua kuv lub luag hauj lwm ruaj ntseg, thiab xwv kom kuv yuav ntxuav tau nej tej kev txhaum tawm ntawm kuv tej tsoos tsho, kuv thiaj tau tuaj rau hauv lub tuam tsev hnub no xwv kom kuv yuav tau tshaj Vajtswv txoj lus rau nej.

3 Thiab nej tus kheej yeej paub tias kuv ib txwm rau siab ua lub luag hauj lwm uas Vajtswv hu kuv ua; tiam sis hnub no kuv nyuaj siab heev nrog kev xav thiab kev txhawj txog kev noj qab nyob zoo ntawm nej tej ntsuj plig ntau tshaj li kuv ib txwm muaj.

4 Vim saib seb, los txog tav li no, nej tau mloog tus Tswv txoj lus, uas kuv tau muab rau nej.

5 Tiam sis saib seb, nej cia li mloog kuv, thiab paub tias los ntawm tus Tsim Ntuj Tsim Teb uas muaj hwj chim tag nrho txoj kev pab kuv muaj cuab kav qhia nej ntsig txog nej tej kev xav, ua li cas nej ho pib ua kev txhaum, txoj kev txhaum uas pom txaus ntxub heev rau kuv, muaj tseeb tiag, thiab txaus ntxub rau Vajtswv.

6 Muaj tseeb tiag, qhov ntawd ua rau kuv tus ntsuj plig nyuaj siab thiab ua rau kuv nkaum nrog kev txaj muag nyob ntawm tus Tsim kuv xub ntiag, kuv thiaj yuav tsum ua tim khawv rau nej ntsig txog txoj kev phem ntawm nej lub siab.

7 Thiab qhov ntawd kuj ua rau kuv nyuaj siab uas kuv yuav tsum siv tej lus tawv qhawv ntsig txog nej, tab meeg nej tej poj niam thiab me nyuam, coob leej uas muaj tej kev xav mos muag thiab dawb huv heev rau Vajtswv, uas ua rau Vajtswv zoo siab;

8 Thiab kuv xav tias lawv tau los pem no los mloog Vajtswv txoj lus zoo, muaj tseeb tiag, txoj lus uas kho tau tej ntsuj plig uas raug mob kom zoo.

9 Yog li ntawd, ua rau kuv tus ntsuj plig ris nra hnyav uas kuv yuav tsum raug txhib, vim txoj lus txib nruj uas kuv tau txais los ntawm Vajtswv, los ntuas nej raws li nej tej kev txhaum, los ua kom cov uas twb muaj mob lawm haj yam mob loj tuaj, tsis yog los nplij thiab kho lawv qhov mob; thiab cov uas tsis tau raug mob, tsis yog yuav tau mloog Vajtswv txoj lus zoo tiam sis yuav muaj tej ntaj chob lawv tus ntsuj plig thiab hlais lawv lub siab mos.

10 Tiam sis, txawm tias txoj hauj lwm hnyav heev, kuv yuav tsum ua raws li Vajtswv txoj lus txib nruj, thiab qhia rau nej ntsig txog nej tej kev phem thiab kev qias, rau ntawm cov uas muaj siab dawb, thiab ntawm cov uas muaj lub siab mob xub ntiag, thiab ntawm tus Vajtswv uas Muaj Hwj Chim Tag Nrho lub qhov muag uas ntsia ntsoov.

11 Yog li ntawd, kuv yuav tsum qhia qhov tseeb rau nej raws li kev qhia meej txog Vajtswv txoj lus. Vim saib seb, thaum kuv thov tus Tswv, txoj lus tau los rau kuv li no, hais tias: Yakhauj, tag kis koj cia li mus rau hauv lub tuam tsev, thiab tshaj txoj lus uas kuv yuav muab rau koj rau cov neeg no.

12 Thiab nim no saib seb, kuv cov kwv tij, qhov no yog txoj lus uas kuv tshaj rau nej, hais tias nej muaj coob leej tau pib nrhiav kub, thiab nrhiav nyiaj, thiab nrhiav txhua txhia yam quav tooj quav hlau uas muaj nqis, uas muaj nyob ntau heev nyob hauv thaj av no, uas yog thaj av uas cog lus cia rau nej thiab rau nej cov tub ki.

13 Thiab Vajtswv tau foom koob hmoov ntau nplua mias rau nej, nej thiaj tau txais nyiaj txiag ntau heev; thiab vim yog nej ib txhia tau txais ntau dua nej tej kwv tij nej thiaj khav theeb vim nej lub siab muab hlob, thiab ua caj dab tawv qhawv thiab tsa taub hau siab vim nej tej ris tsho uas kim kim, thiab nej tsim txom nej cov kwv tij vim nej xav hais tias nej zoo dua lawv.

14 Thiab nim no, kuv cov kwv tij, nej puas xav hais tias Vajtswv pom zoo nej ua tej no? Saib seb, kuv hais rau nej tias, nws tsis pom zoo. Tiam sis nws yuav rau txim rau nej, thiab yog hais tias nej tseem pheej ua tej no ntxiv nws tej kev txiav txim yeej yuav los rau nej sai kawg nkaus li.

15 Auj kheev lam nws yuav qhia rau nej paub tias nws muaj peev xwm chob tau nej, thiab los ntawm nws lub qhov muag ib ntsia nej nws muaj peev xwm nplawm nej vau mus rau hauv av!

16 Auj kheev lam nws ua kom nej dim ntawm txoj kev ua phem thiab txoj kev qias no. Thiab, auj kheev lam nej yuav mloog nws tej lus txib, thiab tsis txhob cia nej lub siab muab hlob no ua rau nej tej ntsuj plig puas tsuaj!

17 Xav txog nej tej kwv tij ib yam li nej xav txog nej tus kheej, thiab zeem kom paub txhua tus thiab cia nej tej khoom pub dawb, xwv kom lawv yuav muaj ib yam li nej.

18 Tiam sis ua ntej nej nrhiav kev nplua nuj, nej yuav tsum nrhiav Vajtswv lub nceeg vaj tso.

19 Thiab tom qab nej tau ib txoj kev cia siab rau Khetos nej mam tau kev nplua nuj, yog hais tias nej nrhiav tej ntawd; thiab nej yuav nrhiav tej ntawd los ua qhov zoo—los muab ris tsho rau cov neeg liab qab hnav, thiab los pub rau cov neeg tshaib plab noj, thiab los tso cov neeg raug txhom kom dim, thiab los pab cov neeg muaj mob thiab cov neeg txom nyem.

20 Thiab nim no, kuv cov kwv tij, kuv tau hais rau nej ntsig txog kev muab hlob; thiab nej cov uas tau ua rau nej tej neeg zej zog raug kev txom nyem, thiab tsim txom nws vim nej khav txiv nyob hauv nej lub siab, txog tej khoom uas Vajtswv tau muab rau nej, nej yuav hais li cas txog qhov no?

21 Nej tsis xav hais tias tej yam ntawd ntxim ntxub rau tus uas tau tsim txhua tus tib neeg no los? Thiab ib tug neeg twg yeej muaj nuj nqis ib yam li lwm tus nyob ntawm nws lub qhov muag. Thiab txhua tus tib neeg puav leej los ntawm av los; nws tau tsim lawv los rau tib txoj hau kev, xwv kom lawv yuav ua raws li nws tej lus txib thiab ua kom nws tau yeeb koob mus ib txhis.

22 Thiab nim no kuv xaus zaj lus hais rau nej txog txoj kev muab hlob no. Thiab yog tias kuv tsis tas hais rau nej ntsig txog ib txoj kev txhaum uas phem tshaj, ces kuv lub siab yuav zoo siab heev vim yog nej.

23 Tiam sis Vajtswv txoj lus hnyav rau kuv vim yog nej tej kev txhaum uas phem tshaj. Vim saib seb, tus Tswv hais li no: Cov neeg no pib ua phem ntau zuj zus; lawv tsis to taub cov vaj lug kub, vim lawv nrhiav kev zam txim rau lawv tus kheej thaum sib daj sib deev, vim yog tej xwm uas tau muab sau tseg ntsig txog Daviv, thiab nws tus tub Xalumoos.

24 Saib seb, Daviv thiab Xalumoos yeej tau muaj ntau tus poj niam thiab ntau tus niam yau tiag, uas yog yam txaus ntxub rau kuv, tus Tswv hais li.

25 Yog li ntawd, tus Tswv hais li no, kuv tau coj cov neeg no tawm ntawm thaj av Yeluxalees, los ntawm kuv txhais npab lub hwj chim, xwv kom kuv yuav tsa tau ib ceg neeg ncaj ncees rau kuv los ntawm Yauxej cov tub ki.

26 Yog li ntawd, kuv, tus Tswv uas yog Vajtswv yuav tsis cia cov neeg no ua li cov thaum ub.

27 Yog li ntawd, kuv cov kwv tij, cia li hnov kuv tej lus, thiab cia li mloog tus Tswv txoj lus: Yuav tsum tsis txhob cia ib tug txiv neej twg hauv nej muaj coob tshaj ib tug poj niam; thiab nws yuav tsum tsis txhob muaj niam yau hlo li;

28 Vim kuv, tus Tswv uas yog Vajtswv, zoo siab rau cov poj niam txoj kev coj dawb huv. Thiab kuv xav tias tej kev sib daj sib deev yog kev qias; Ib Tsoom Tub Rog tus Tswv hais li ntawd.

29 Yog li ntawd, cov neeg no yuav tsum ua raws li kuv tej lus txib, Ib Tsoom Tub Rog tus Tswv hais li, tsis li ntawd ces kuv yuav foom tsis zoo rau thaj av rau lawv.

30 Ib Tsoom Tub Rog tus Tswv hais tias, yog kuv xav tsa cov tub ki rau kuv, kuv mam li txib kuv cov neeg; yog tsis li ntawd lawv yuav tsum mloog tej yam no.

31 Vim saib seb, kuv, tus uas yog tus Tswv, tau pom txoj kev tu siab, thiab tau hnov txoj kev quaj ntsuag ntawm kuv cov neeg tej ntxhais nyob hauv thaj av Yeluxalees, muaj tseeb tiag, thiab nyob hauv txhua thaj av ntawm kuv cov neeg, vim yog tej kev phem thiab kev qias ntawm lawv cov txiv.

32 Thiab Ib Tsoom Tub Rog tus Tswv hais tias, Kuv yuav tsis cia cov neeg no tej ntxhais uas zoo, uas kuv tau coj tawm ntawm thaj av Yeluxalees tuaj, lub suab quaj tuaj rau kuv tawm tsam cov txiv neej ntawm kuv cov neeg, Ib Tsoom Tub Rog tus Tswv hais li.

33 Vim lawv yuav tsis txhom coj kuv cov neeg tej ntxhais mus vim yog lawv txoj kev mos muag, tsuas yog kuv yuav los xyuas lawv nrog ib txoj kev foom tsis zoo uas mob heev, twb kom lawv puas tsuaj; vim lawv yuav tsis sib daj sib deev, zoo li cov thaum ub, Ib Tsoom Tub Rog tus Tswv hais li.

34 Thiab nim no saib seb, kuv cov kwv tij, nej yeej paub tias tau muab tej lus txib no rau peb txiv, Lihais; yog li ntawd, nej yeej paub tej no ua ntej lawm; thiab nej tau raug kev rau txim loj; vim nej tau ua tej yam no uas tsis tsim nyog rau nej ua.

35 Saib seb, nej tau ua phem tshaj cov Neeg Lamas, peb cov kwv tij. Nej tau ua rau nej cov poj niam uas mos muag lub siab tawg tas, thiab ua rau nej cov me nyuam tej kev cia siab ploj tag, vim yog nej tus yam ntxwv phem uas nej ua rau lawv; thiab tej suab quaj hauv lawv lub siab nrov nce mus rau Vajtswv tawm tsam nej. Thiab vim yog Vajtswv txoj lus nruj, uas los tawm tsam nej, ntau lub siab tau tuag, raug chob ua mob tob heev.