1 Tiam sis saib seb, kuv, Yakhauj, yuav hais rau nej cov uas muaj lub siab dawb. Ntsia ntsoov Vajtswv nrog nej lub siab ruaj khov kho, thiab thov nws nrog txoj kev ntseeg heev, thiab nws yuav nplij nej thaum nej raug kev txom nyem, thiab nws yuav hais daws nej zaj, thiab xa kev txim lij los rau cov uas nrhiav ua kom nej puas tsuaj.

2 Auj tag nrho nej cov uas muaj lub siab dawb, cia li tsa nej lub taub hau thiab txais yuav Vajtswv txoj lus uas zoo, thiab nco ntsoov khaws nws txoj kev hlub; vim nej yuav ua tau li ntawd, yog nej lub siab nyob ruaj khov kho, mus ib txhis.

3 Tiam sis, kev txom nyem, kev txom nyem yuav raug nej cov uas tsis muaj lub siab dawb, cov uas vuab tsuab rau Vajtswv pom lub sij hawm no; tsuas yog tias nej hloov siab lees txim tsis li ces thaj av yuav raug foom tsis zoo rau nej; thiab cov Neeg Lamas, uas tsis vuab tsuab li nej, txawm li ntawd los lawv tseem raug foom tsis zoo nrog ib txoj kev foom tsis zoo uas mob heev, yuav nplawm nej mus rau kev puas tsuaj.

4 Thiab lub sij hawm yuav los sai sai, tsuas yog tias nej hloov siab lees txim tsis li ces lawv yuav tau thaj av uas yog nej qub txeeg qub teg, thiab tus Tswv uas yog Vajtswv yuav coj cov neeg ncaj ncees hauv nej tawm khiav mus.

5 Saib seb, cov Neeg Lamas uas yog nej cov kwv tij, cov uas nej ntxub vim yog lawv tej kev vuab tsuab thiab kev foom tsis zoo uas tau los rau lawv tej tawv nqaij, tseem ncaj ncees tshaj nej; vim lawv tsis tau hnov qab Vajtswv txoj lus txib, uas tau muab rau peb txiv—hais tias lawv yuav tsum muaj ib tug poj niam xwb, thiab lawv yuav tsum tsis txhob muaj niam yau hlo li, thiab yuav tsum tsis txhob muaj kev sib daj sib deev nyob hauv lawv.

6 Thiab nim no, lawv mob siab ua raws txoj lus txib no; yog li ntawd, vim yog lawv mob siab ua raws li txoj lus txib no, tus Tswv uas yog Vajtswv yuav tsis ua kom lawv puas tsuaj, tiam sis yuav hlub tshua lawv; thiab muaj ib hnub lawv yuav los ua ib co neeg uas tau koob hmoov.

7 Saib seb, lawv tej txiv hlub lawv tej poj niam, thiab lawv tej poj niam hlub lawv tej txiv; thiab lawv tej txiv thiab lawv tej poj niam hlub lawv tej me nyuam; thiab lawv tej kev tsis ntseeg thiab lawv tej kev ntxub ntxaug nej twb yog vim lawv cov poj koob yawm txwv tej kev ua phem xwb; yog li ntawd nej ho zoo dua lawv npaum li cas, raws li nej tus Tsim uas muaj hwj chim pom?

8 Auj kuv cov kwv tij es, kuv ntshai tias tsuas yog nej yuav hloov siab lees txim rau nej tej kev txhaum xwb, tsis li ces lawv tej tawv nqaij yuav dawb dua nej tej, thaum nej raug coj nrog lawv los mus rau ntawm Vajtswv lub rooj theej kiab.

9 Yog li ntawd, kuv muab ib lo lus txib rau nej, uas yog Vajtswv txoj lus, hais tias nej tsis txhob cem lawv ntxiv lawm vim yog lawv tej tawv nqaij dub; thiab nej tsis txhob thuam lawv vim yog lawv tej kev vuab tsuab; tiam sis nej yuav tsum nco ntsoov nej tus kheej tej kev vuab tsuab, thiab nco ntsoov tias lawv tej kev vuab tsuab tau muaj los, yog vim lawv cov poj koob yawm txwv xwb.

10 Yog li ntawd, nej yuav tsum nco txog nej cov me nyuam, uas nej tau ua rau lawv nyuaj siab vim yog tus yam ntxwv uas nej tau ua rau lawv; thiab nco ntsoov tias, vim yog nej tej kev vuab tsuab, nej yuav coj tau nej cov me nyuam mus rau kev puas tsuaj, thiab lawv tej kev txhaum yuav tso rau saum nej taub hau thaum txog hnub kawg.

11 Auj kuv cov kwv tij es, cia li mloog kuv tej lus; cia li siv nej tus ntsuj plig tej kev txawj hnov txawj pom; nchos nej tus kheej xwv kom nej yuav tsim ntawm kev dab ntub ntawm txoj kev tuag; thiab daws nej tus kheej kom dim ntawm ntuj txiag teb tsaus tej kev mob nkeeg xwv kom nej yuav tsis hloov los ua cov tim tswv rau tus dab phem, es raug muab pov mus rau hauv lub pas hluav taws thiab leej faj uas yog txoj kev tuag zaum ob.

12 Thiab nim no kuv, Yakhauj, tau hais ntau yam ntxiv rau Nifais cov neeg, tau ceeb toom lawv txog kev deev nkauj nraug thiab kev xav tau daj tau deev, thiab txhua yam kev txhaum, qhia rau lawv txog tej xwm txheej phem los ntawm tej kev txhaum no.

13 Thiab kuv sau tsis tau ib feem pua ntawm tej uas tau tshwm sim rau cov neeg no, cov uas nim no tau pib muaj coob tuaj, saum cov phiaj no; tiam sis tau muab ntau yam uas tau tshwm sim rau lawv sau rau saum cov phiaj loj zog, thiab lawv tej kev ua rog, thiab lawv tej kev sib cav sib ceg, thiab lawv tej vaj ntxwv tej kev kav teb chaws.

14 Cov phiaj no hu ua Yakhauj cov phiaj, thiab cov phiaj no yog Nifais txhais tes ua. Thiab kuv hais tej lus no tiav lawm.