Phau Ntawv Yakhauj
Nifais tus Kwv

1 Vim saib seb, tau muaj tias tsib caug tsib xyoos tau dhau mus txij thaum lub sij hawm Lihais ncaim Yeluxalees; yog li ntawd, Nifais muab ib lo lus txib rau kuv, Yakhauj, ntsig txog cov phiaj me uas muab tej yam no sau rau saud.

2 Thiab nws muab ib lo lus txib rau kuv, Yakhauj, hais tias kuv yuav tsum muab ob peb yam ntawm tej xwm uas kuv pom tias muaj nuj nqis tshaj sau rau saum cov phiaj no; hais tias kuv yuav tsum tsis txhob sau, tsuas yog me ntsis xwb, ntsig txog tej keeb kwm ntawm cov neeg no uas hu ua cov Neeg Nifais.

3 Vim nws hais tias nws cov neeg tej keeb kwm yuav tsum muab sau rau saum nws lwm cov phiaj, thiab hais tias kuv yuav tsum tsom kwm thiab muab cov phiaj no cev mus rau kuv cov tub ki, ntawm ib tiam neeg mus rau ib tiam.

4 Thiab yog tias muaj kev qhuab qhia uas dawb ceev, los sis kev tshwm sim uas tseem ceeb, los sis kev qhia tej yuav muaj los yav tom ntej, kuv yuav tsum muab tej uas tseem ceeb tshaj ntawm tej ntawd sau rau saum cov phiaj no, thiab sau txog tej ntawd kom ntau npaum li yuav sau tau, kom ua rau Khetos, thiab pab peb cov neeg.

5 Rau qhov vim yog kev ntseeg thiab kev txhawj heev, thiaj tau muab ua tshwm sim los rau wb ntsig txog wb cov neeg, tej xwm uas yuav tshwm sim rau lawv.

6 Thiab wb kuj tau muaj kev tshwm sim ntau, thiab qhov txiaj ntsim qhia tau tej yuav muaj los yav tom ntej ntau heev; yog li ntawd, wb paub txog Khetos thiab nws lub nceeg vaj, uas yuav los.

7 Yog li ntawd wb thiaj rau siab ntso ua hauj lwm nyob hauv wb cov neeg, xwv kom wb yuav yaum tau lawv los cuag Khetos, thiab txais yuav Vajtswv txoj kev zoo, xwv kom lawv yuav nkag tau mus rau hauv nws qhov chaw so, tsam ho muaj tej yam dab tsi ua rau nws npau taws cog lus tias lawv nkag tsis tau mus rau hauv, ib yam li lub caij sim siab thaum cov neeg Ixayees tseem nyob tom roob moj sab qhua es lawv npau taws tawm tsam tus Tswv.

8 Yog li ntawd, wb cia siab rau Vajtswv tias wb yuav muaj peev xwm yaum neeg txhua tus kom tsis txhob ntxeev siab tawm tsam Vajtswv, thab kom nws npau taws, tiam sis kom neeg txhua tus ntseeg Khetos, thiab ua zoo xav txog nws txoj kev tuag, thiab kwv nws tus ntoo khaub lig thiab nyiaj kev thuam ntawm neeg ntiaj teb; yog li ntawd, kuv, Yakhauj, txais rau kuv tus kheej kom ua raws li kuv tus tij laug Nifais txoj lus txib tiav.

9 Nim no Nifais pib laus lawm, thiab nws tau pom tias tsis ntev nws yeej yuav tuag; yog li ntawd, nws pleev roj tsa ib tug txiv neej los ua ib tug vaj ntxwv thiab los ua ib tug kav nws cov neeg nim no, raws li tej vaj ntxwv kev kav teb chaws.

10 Cov neeg hmov tshua Nifais heev kawg li, vim nws yog ib tug neeg tsom kwm zoo heev rau lawv, vim nws siv Lanpas rab ntaj tiv thaiv lawv, thiab vim nws ua hauj lwm tag nrho nws lub neej pab rau lawv txoj kev noj qab nyob zoo—

11 Yog li ntawd, cov neeg xav nco ntsoov nws lub npe. Thiab leej twg uas los kav tom qab nws, cov neeg muab tus ntawd hu ua, Nifais thib ob, Nifais thib peb, thiab ntxiv mus, raws li tej vaj ntxwv kev kav teb chaws; thiab cov neeg muab cov vaj ntxwv hu li no, txawm tias lawv lub npe hu li cas los xij.

12 Thiab tau muaj tias Nifais tuag.

13 Nim no cov neeg uas tsis yog cov Neeg Lamas ces yog cov Neeg Nifais; txawm li ntawd los, lawv hu ua cov Neeg Nifais, cov Neeg Yakhauj, cov Neeg Yauxej, cov Neeg Xaulas, cov Neeg Lamas, cov Neeg Lemu-ees, thiab cov Neeg Ixama-ees.

14 Tiam sis kuv, Yakhauj, txij no mus yuav tsis saib lawv ib leeg txawv ib leeg los ntawm tej lub npe no, tiam sis kuv yuav muab cov uas nrhiav kev ua kom Nifais cov neeg puas tsuaj hu ua cov Neeg Lamas, thiab cov uas ua zoo rau Nifais kuv yuav hu ua cov Neeg Nifais, los sis Nifais cov neeg, raws li tej vaj ntxwv kev kav teb chaws.

15 Thiab nim no tau muaj tias Nifais cov neeg, nyob hauv kev kav ntawm tus vaj ntxwv thib ob, pib muaj tej kev tawv hauv lawv lub siab, thiab koom tes yaum ua kev phem, zoo ib yam li Daviv thaum ub uas xav muaj coob tus poj niam thiab ntau tus niam yau, thiab kuj zoo ib yam li nws tus tub Xalumoos.

16 Muaj tseeb tiag, thiab lawv kuj pib nrhiav nyiaj nrhiav kub ntau, thiab pib ua neeg muab hlob tsawv.

17 Yog li ntawd kuv, Yakhauj, tau muab cov lus no rau lawv thaum kuv qhia lawv nyob hauv lub tuam tsev, tom qab tau txais kuv txoj hauj lwm los ntawm tus Tswv.

18 Vim Nifais txhais tes tau muab kuv, Yakhauj, thiab kuv tus kwv Yauxej tsa los ua pov thawj thiab xib hwb rau cov neeg no.

19 Thiab wb tau rau siab ua wb txoj luag hauj lwm rau tus Tswv, wb tau muab lub nra los ris, muab cov neeg tej kev txhaum tso rau saum wb taub hau yog hais tias wb tsis rau siab ntso muab Vajtswv txoj lus los qhia lawv; yog li ntawd, los ntawm kev ua hauj lwm tag wb lub dag lub zog lawv cov ntshav yuav tsis tsuas wb tej tsoos tsho; tsis li ces lawv cov ntshav yuav tsuas wb tej tsoos tsho, thiab wb yuav muaj qhov phem thaum txog hnub kawg.