1 Thiab nim no kuv, Nifais, tsis muaj cuab kav sau txhua yam uas peb tau qhia nyob hauv kuv cov neeg; thiab kuv tsis txawj sau ntawv zoo li uas hais lus; vim thaum ib tug neeg hais lus los ntawm tus Vaj Ntsuj Plig Dawb Huv lub hwj chim, lub hwj chim ntawm tus Vaj Ntsuj Plig Dawb Huv yuav coj cov lus ntawd mus rau noob neej lub siab.

2 Tiam sis saib seb, muaj coob leej uas tau ua lawv lub siab tawv qhawv tawm tsam tus Ntsuj Plig Dawb Huv, uas ua rau tus Ntsuj Plig tsis muaj chaw nyob hauv lawv; yog li ntawd, lawv muab ntau yam uas tau muab sau cia pov tseg thiab suav tias tej ntawd tsis muaj nuj nqis.

3 Tiam sis kuv, Nifais, tau sau tej uas kuv tau sau, thiab kuv suav tias tej ntawd muaj nuj nqis heev, thiab qhov tseem ceeb yog rau kuv cov neeg. Vim kuv thov Vajtswv tsis tu ncua rau lawv thaum nruab hnub, thiab kuv tej kua muag ntxaum kuv lub tog hauv ncoo thaum hmo ntuj, vim yog lawv; thiab kuv thov kuv tus Vajtswv nrog txoj kev ntseeg, thiab kuv paub tias nws yuav hnov kuv tej lus thov.

4 Thiab kuv paub tias tus Tswv uas yog Vajtswv yuav muab kuv tej kev thov fij tseg kom pab kuv cov neeg. Thiab tus Tswv yuav muab tej lus uas kuv tau sau los ntawm kev qaug zog ua kom muaj zog rau lawv; vim tej lus ntawd yuav yaum kom lawv ua zoo; tej lus ntawd qhia lawv txog lawv cov yawg koob; thiab tej lus ntawd qhia txog Yexus, thiab yaum lawv los ntseeg nws, thiab nyiaj mus kom txog thaum kawg, uas yog txoj sia nyob mus ib txhis.

5 Thiab tej lus ntawd hais hnyav tawm tsam kev txhaum, raws li txoj kev qhia meej txog qhov tseeb; yog li ntawd, yuav tsis muaj neeg npau taws rau tej lus uas kuv tau sau tsuas yog tus uas muaj tus dab phem tus ntsuj plig xwb.

6 Kuv zoo siab rau kev qhia meej; kuv zoo siab rau qhov tseeb; kuv zoo siab rau kuv tus Yexus, vim nws tau txhiv kuv tus ntsuj plig dim ntawm ntuj txiag teb tsaus.

7 Kuv muaj kev siab hlub rau kuv cov neeg, thiab muaj kev ntseeg Khetos uas ruaj hais tias nyaj kuv yuav ntsib ntau tus ntsuj plig uas tsis muaj qhov phem nyob ntawm nws lub rooj txiav txim.

8 Kuv muaj kev siab hlub rau cov Neeg Yudais—kuv hais tias cov Neeg Yudais, rau qhov kuv hais txog cov neeg uas kuv tawm ntawm lawv tuaj.

9 Kuv kuj muaj kev siab hlub rau Lwm Haiv Neeg. Tiam sis saib seb, txhua yam no tsis muaj ib yam uas kuv cia siab rau tsuas yog tias lawv yuav rov sib raug zoo nrog Khetos xwb, thiab nkag mus rau hauv lub rooj vag nqaim, thiab taug txoj kev ti uas coj mus rau txoj sia, thiab rau siab ntso taug txoj kev mus kom txog thaum kawg ntawm hnub sim siab.

10 Thiab nim no, kuv cov kwv tij uas kuv hlub es, thiab cov Neeg Yudais, thiab tag nrho nej sawv daws uas nyob thoob plaws lub ntiaj teb, cia li mloog tej lus no thiab ntseeg Khetos; thiab yog nej tsis ntseeg tej lus no los cia li ntseeg Khetos. Thiab yog nej ntseeg Khetos ces nej yuav ntseeg tej lus no, vim tej lus no yog Khetos tej lus, thiab nws tau muab tej lus no rau kuv; thiab tej lus no qhia neeg txhua tus kom lawv yuav tsum ua zoo.

11 Thiab yog tias tej lus no tsis yog Khetos tej lus, nej cia li txiav txim—vim Khetos yuav qhia rau nej, nrog lub hwj chim thiab lub yeeb koob loj, hais tias tej lus no yog nws tej lus, thaum txog hnub kawg; thiab nej thiab kuv yuav sawv tim ntsej tim muag ntawm nws lub rooj txiav txim; thiab nej yuav paub tias nws tau txib kom kuv sau tej no, txawm tias kuv sau tsis tau ntawv zoo.

12 Thiab kuv thov Leej Txiv los ntawm Khetos lub npe kom peb coob leej, yog tias tsis tag nrho, yuav txais kev cawm dim nyob hauv nws lub nceeg vaj nyob rau hnub tseem ceeb thiab hnub kawg ntawd.

13 Thiab nim no, kuv cov kwv tij uas kuv hlub es, tag nrho cov uas yog tsev neeg Ixayees, thiab tag nrho nej sawv daws uas nyob thoob plaws lub ntiaj teb, kuv hais rau nej ib yam li lub suab ntawm ib tug uas qw nrov nrov tawm hauv av tuaj: Mus zoo nej kom txog thaum hnub tseem ceeb ntawd yuav los.

14 Thiab nej cov uas yuav tsis kam txais Vajtswv txoj kev zoo, thiab saib cov Neeg Yudais tej lus rau nqi, thiab kuv tej lus, thiab cov lus uas yuav tawm ntawm Vajtswv tus Me Nyuam Yaj lub qhov ncauj los, saib seb, kuv hais lus sib ncaim uas kav ib txhis rau nej, vim tej lus no yuav rau txim rau nej thaum txog hnub kawg.

15 Vim yam uas kuv muab khi nyob hauv ntiaj teb, yam ntawd yuav tawm tsam nej nyob rau ntawm lub rooj txiav txim; vim tus Tswv tau txib kuv li no, thiab kuv yuav tsum mloog lus. Amees.