1 Thiab tau muaj tias nyob rau lub sij hawm Ahas uas nws txiv yog Yauthas, uas nws txiv ho yog Uxiyas, uas yog teb chaws Yudas tus vaj ntxwv, thiab Lexees, uas yog teb chaws Xilias tus vaj ntxwv, thiab Npekhas uas yog Lemaliyas tus tub, uas yog Ixayees tus vaj ntxwv, tau mus rau pem Yeluxalees mus ua rog tawm tsam nws, tiam sis kov tsis yeej nws.

2 Thiab tau qhia tsev neeg Daviv hais tias: Xilias tau koom tes nrog Efala-is. Thiab nws lub siab tau co nto, thiab nws cov neeg lub siab, ib yam li tej ntoo uas co nto thaum cua ntsawj.

3 Ces tus Tswv hais rau Yaxayas hais tias: Koj thiab koj tus tub Xe-ayasus, cia li mus ntsib Ahas ziag no, nyob rau tim tus kwj deg uas ntws mus tshuam rau pem hau pas dej uas nyob hauv txoj kev ntawm tus neeg ntxhua ris tsho thaj teb;

4 Thiab hais rau nws hais tias: Ceev faj, thiab ua siab tus tus; tsis txhob ntshai, thiab tsis txhob poob siab vim yog ob teg tsau uas ncho ncho pa no, vim yog txoj kev npau taws heev ntawm Lexees rau Xilias, thiab ntawm Lemaliyas tus tub.

5 Vim yog Xilias, Efala-is, thiab Lemaliyas tus tub, tau tsim tom txwv phem tawm tsam koj, hais tias:

6 Cia peb mus tawm tsam Yudas thiab mus tsim kev kub ntxhov rau nws, thiab cia peb muab tej nroog hauv los faib rau peb, thiab tsa kom muaj ib tug vaj ntxwv nyob rau hauv, muaj tseeb tiag, yawg Thanpis tus tub.

7 Ces tus Tswv uas yog Vajtswv hais li no: Yuav tsis muaj tej yam li no, thiab yuav tsis muaj tshwm sim.

8 Vim Damaxes yog Xilias lub taub hau, thiab tus thawj coj ntawm Damaxes yog Lexees; tsis dhau rau caum tsib xyoos Efala-is yuav tawg kom tsis muaj ib tug neeg li lawm.

9 Thiab Efala-is lub taub hau yog Xamalis, thiab tus thawj coj ntawm Xamalis yog Lemaliyas tus tub. Yog hais tias koj tsis ntseeg ces koj yeej yuav tu noob.

10 Tsis tas li ntawd xwb, tus Tswv tseem tau hais rau Ahas ntxiv, hais tias:

11 Thov tus Tswv koj tus Vajtswv kom nws muab ib lub cim rau koj; thov kom nws ua tej yam dab tsi rau hauv ntiaj teb no, los sis ua tej yam dab tsi rau saum nruab ntug.

12 Tiam sis Ahas hais tias: Kuv yuav tsis thov, thiab kuv yuav tsis sim tus Tswv.

13 Thiab nws hais tias: Nim no nej cia li mloog, auj tsev neeg Daviv es; puas yog ib yam me me nej ua kom neeg dhuav, es nej tseem yuav ua kom kuv tus Vajtswv dhuav thiab los?

14 Yog li ntawd, tus Tswv kiag yuav muab ib lub cim rau nej—Saib seb, ib tug nkauj xwb yuav xeeb tub, thiab yuav yug ib tug me tub, thiab yuav hu nws lub npe hu ua Emanu-es.

15 Nws yuav noj roj txiv hmab txiv ntoo nyoj thiab zib ntab, xwv kom nws yuav paub xyeej qhov phem thiab paub xaiv qhov zoo.

16 Ua ntej thaum tus me nyuam yuav paub xyeej qhov phem thiab paub xaiv qhov zoo, lub teb chaws uas nej ntxub yuav raug lawv ob tug vaj ntxwv muab tso pov tseg.

17 Tus Tswv yuav coj los rau koj, thiab rau koj cov neeg, thiab rau koj txiv tsev neeg, tej caij tej nyoog uas los tsis tau txog txij thaum Efala-is tau ncaim Yudas, Axilias tus vaj ntxwv.

18 Thiab yuav muaj tias nyob rau hnub ntawd tus Tswv yuav hu nrov nrov rau tej yoov uas nyob txhua qhov chaw hauv teb chaws Iyiv, thiab rau tej ntab uas nyob hauv teb chaws Axilias.

19 Thiab lawv yuav tuaj, thiab lawv txhua tus yuav tuaj so rau hauv tej dawm uas tsis muaj neeg nyob, thiab tuaj nyob hauv tej qhov tsua, thiab tuaj nyob rau saum tej pos tag nrho, thiab nyob rau saum tej nroj tag nrho.

20 Nyob rau tib lub caij ntawd tus Tswv yuav cia cov neeg ntiav, xws li lawv cov uas nyob dhau ntawm tus dej, xws li Axilias tus vaj ntxwv, xuas ib tug chais hwj txwv tuaj chais lub taub hau, thiab tej plaub ko taw; thiab kuj yuav chais tej plaub hwj txwv thiab.

21 Thiab yuav muaj tias thaum ntawd, ib tug txiv neej yuav yug ib tug thav nyuj thiab ob tug yaj;

22 Thiab yuav muaj tias, vim tus thav nyuj thiab ob tug yaj muaj kua mis ntau nws yuav tau kua mis roj noj; vim txhua tus uas seem nyob hauv lub teb chaws yuav tau kua mis roj thiab zib ntab noj.

23 Thiab yuav muaj tias thaum ntawd, txhua thaj uas txeev muaj txiv hmab ib txhiab tsob uas tau nqe ib txhiab sekhee nyiaj, yuav ntxeev ua ntoo pos thiab pos kaus ntsaj.

24 Tej neeg yuav nqa hneev thiab nqa xub tuaj ntawm qhov chaw ntawd, vim yog txhua thaj av yuav hloov los ua ntoo pos thiab pos kaus ntsaj.

25 Thiab yuav tsis muaj neeg tuaj rau tej pov roob uas tau muab hlau ncaws vim ntshai tej ntoo pos thiab tej pos kaus ntsaj; tiam sis yuav cia ua chaw yug nyuj, thiab cia rau tej tsiaj tsuj.