1 Thiab nim no, kuv cov kwv tij uas kuv hlub, kuv tau nyeem tej no xwv kom nej yuav paub txog tus Tswv tej kev khi lus uas nws tau khi nrog tag nrho tsev neeg Ixayees—

2 Hais tias nws tau hais rau cov Neeg Yudais, los ntawm nws cov yaj saub dawb huv lub qhov ncauj, txij li puag thaum chiv keeb los, ntawm ib tiam neeg mus rau ib tiam, kom mus txog thaum lub sij hawm uas yuav muab lawv txum tim rau lub koom txoos uas tseeb thiab Vajtswv pab yaj; thaum uas tus Tswv yuav muab lawv sau los nyob ua ke rau hauv tej thaj av uas yog lawv qub txeeg qub teg, thiab yuav los ua noj ua haus thoob plaws rau hauv lawv tej thaj av uas cog lus cia.

3 Saib seb, kuv cov kwv tij uas kuv hlub, kuv hais tej no rau nej xwv kom nej yuav zoo siab, thiab tsa nej lub taub hau mus ib txhis li, vim yog tej koob hmoov uas tus Tswv uas yog Vajtswv yuav muab rau nej cov me nyuam.

4 Vim kuv paub hais tias nej coob leej, tau nrhiav los lawm ntau, kom paub tej xwm uas yuav muaj los yav tom ntej; yog li ntawd kuv paub tias nej yeej paub tias peb cev nqaij daim tawv yeej yuav laus thiab tuag mus; txawm li ntawd los, nyob hauv peb cev nqaij daim tawv peb yuav pom Vajtswv.

5 Muaj tseeb tiag, kuv paub tias nej yeej paub hais tias ntawm cev nqaij daim tawv nws yuav ua nws tus kheej rau cov uas nyob hauv Yeluxalees pom, tim qhov chaw uas peb tau khiav tuaj; vim tsim nyog tias nws yuav tsum tshwm sim nyob hauv lawv; vim rau qhov tus Tsim uas muaj hwj chim yuav tsum cia nws tus kheej ywj rau tib neeg ntawm sab nqaij daim tawv, thiab tuag rau txhua tus neeg, xwv kom tib neeg txhua tus yuav los ywj rau nws.

6 Vim txoj kev tuag tau los rau neeg txhua tus, xwv kom muaj raws li tus Tsim uas muaj hwj chim txoj hau kev uas muaj kev hlub tshua, yuav tsum muaj lub hwj chim ntawm kev sawv rov los, thiab txoj kev sawv rov los yuav tsum los rau noob neej vim yog txoj kev poob; thiab txoj kev poob tau los vim yog txoj kev ua txhaum; thiab vim yog noob neej tau poob, lawv thiaj raug txiav tawm ntawm tus Tswv xub ntiag.

7 Yog li ntawd, yeej yuav tsum muaj ib txoj kev theej txhoj uas tsis muaj qhov kawg—yog tsis muaj ib txoj kev theej txhoj uas tsis muaj qhov kawg ces peb lub cev uas txawj lwj yuav pauv tsis tau mus ua lub cev uas tsis txawj lwj. Yog li ntawd, txoj kev txiav txim thawj zaug uas tau txiav rau noob neej yeej yuav tsum muaj nyob mus tsis txawj kawg li. Thiab yog muaj li no, ces yeej yuav muab cev nqaij daim tawv no tso pw kom lwj thiab ntsoog mus ua av, tsis muaj hnub yuav sawv rov los.

8 Auj Vajtswv lub tswv yim, nws txoj kev hlub tshua thiab txoj kev tshav ntuj! Vim saib seb, yog tias cev nqaij daim tawv sawv tsis tau rov los ces peb tej ntsuj plig yeej yuav los ywj rau tus tim tswv uas tau poob ntawm Vajtswv tus uas Nyob Mus Ib Txhis xub ntiag los, thiab nws hloov los ua tus dab phem, tsis muaj hnub yuav sawv rov los.

9 Thiab peb tej ntsuj plig yeej yuav hloov zoo li nws, thiab peb hloov los ua tej dab phem, ua cov tim tswv rau tus dab phem, uas raug kaw nyob deb ntawm peb tus Vajtswv xub ntiag, thiab nyob nrog leej txiv ntawm kev dag ntxias, nrog kev nyuaj siab, xws li nws tus kheej; muaj tseeb tiag, rau tus uas tau ntxias peb thawj nkawm niam txiv, tus uas tau hloov nws tus kheej tshwm los zoo li ib tug tim tswv ntawm txoj kev kaj, thiab txhaub kom noob neej tuav hauv ntsiag to tua neeg thiab ua txhua yam ntsiag twb to hauv kev tsaus ntuj.

10 Auj peb tus Vajtswv txoj kev siab zoo yeej zoo heev, nws tau npaj ib txoj kev rau peb khiav kom dim ntawm tus tsiaj dab qias neeg no txhais tes; muaj tseeb tiag, tus tsiaj dab, txoj kev tuag thiab ntuj txiag teb tsaus, uas kuv hu ua txoj kev tuag ntawm cev nqaij daim tawv, thiab txoj kev tuag ntawm sab ntsuj plig.

11 Thiab vim peb tus Vajtswv, cov neeg Ixayees tus Dawb Huv, txoj kev cawm peb dim, txoj kev tuag no, uas kuv tau hais txog, uas yog ntawm sab cev nqaij daim tawv, yuav tso nws cov tuag dim; txoj kev tuag ntawd yog lub qhov ntxa.

12 Thiab txoj kev tuag uas kuv tau hais no, uas yog txoj kev tuag ntawm sab ntsuj plig, yuav tso nws cov tuag dim; txoj kev tuag ntawm sab ntsuj plig yog ntuj txiag teb tsaus; yog li ntawd, txoj kev tuag thiab ntuj txiag teb tsaus yeej yuav tso nkawd cov tuag dim, thiab ntuj txiag teb tsaus yeej yuav tso nws tej ntsuj plig uas raug kaw dim, thiab lub qhov ntxa yeej yuav tso nws tej cev uas raug kaw dim, thiab tib neeg tej cev thiab tej ntsuj plig yuav raug txum tim rov los ua ke dua; thiab muaj li no los ntawm Ixayees tus Dawb Huv lub hwj chim muab neeg sawv rov los.

13 Auj peb tus Vajtswv txoj hau kev tseem ceeb kawg! Vim yog tsis muaj li no, Vajtswv lub yeeb tsheej yeej yuav tso cov neeg ncaj ncees tej ntsuj plig dim, thiab lub qhov ntxa yeej yuav tso cov neeg ncaj ncees lub cev dim; thiab tus ntsuj plig thiab lub cev txum tim rov los nyob ua ke dua, thiab neeg txhua tus hloov los kom tsis txawj liam sij, thiab tsis txawj tuag, thiab lawv yog cov neeg uas muaj txoj sia, paub zoo tag nrho ib yam li thaum peb tseem muaj cev nqaij daim tawv, tsuas yog tias peb yuav paub txhij tag nrho.

14 Yog li ntawd, peb yuav paub zoo tag nrho txog tag nrho peb lub txim, thiab peb tej kev tsis dawb huv, thiab peb tej kev liab qab; thiab cov neeg ncaj ncees yuav paub zoo tag nrho txog lawv tej kev zoo siab, thiab lawv tej kev ncaj ncees, yuav tau hnav qhov dawb huv, muaj tseeb tiag, yuav tau hnav lub tsho tshaj sab ntawm kev ncaj ncees.

15 Thiab yuav muaj tias thaum tib neeg txhua tus tau hla dhau txoj kev tuag thawj zaug no mus rau txoj sia, vim yog lawv tau hloov los ua neeg tsis txawj tuag, lawv yeej yuav los rau ntawm Ixayees tus Dawb Huv lub rooj txiav txim; thiab thaum ntawd txoj kev txiav txim yuav los, thiab thaum ntawd lawv yeej yuav raug txiav txim raws li Vajtswv txoj kev txiav txim dawb huv.

16 Thiab tseeb tiag, ib yam li tus Tswv muaj txoj sia nyob, vim tus Tswv uas yog Vajtswv tau hais li, thiab yog nws txoj lus uas nyob mus ib txhis, uas tsis txawj ploj mus li, hais tias lawv cov uas ncaj ncees yuav ncaj ncees li qub; thiab lawv cov uas vuab tsuab yuav vuab tsuab li qub; yog li ntawd, lawv cov uas vuab tsuab yog tus dab phem thiab nws cov tim tswv; thiab lawv yuav raug ntiab mus rau hauv hluav taws uas tsis txawj tuag, uas tau npaj rau lawv; thiab lawv txoj kev tsim txom yuav zoo li ib lub pas hluav taws thiab leej faj cig nroo ntws mus ib txhiab thiab ib txhis thiab tsis muaj qhov kawg li.

17 Auj peb tus Vajtswv txoj kev zoo kawg nkaus thiab txoj kev txim lij! Vim nws ua raws nraim li nws tej lus tag nrho, thiab nws tej lus tau tawm hauv nws lub qhov ncauj mus, thiab yeej yuav muaj raws li nws txoj kev cai.

18 Tiam sis, saib seb, cov neeg ncaj ncees, Ixayees tus Dawb Huv haiv neeg ntseeg, lawv cov uas tau ntseeg Ixayees tus Dawb Huv, lawv cov uas tau nyiaj neeg ntiaj teb tej ntoo khaub lig, thiab tsis quav ntsej txog txoj kev txaj muag, lawv yuav tau txais Vajtswv lub nceeg vaj los ua lawv tug, qhov uas tau npaj cia rau lawv txij thaum ntuj tsim teb raug los, thiab lawv txoj kev xyiv fab yuav muaj puv npo mus ib txhis li.

19 Auj peb tus Vajtswv, Ixayees tus Dawb Huv txoj kev hlub tshua uas zoo kawg nkaus! Vim nws cawm nws haiv neeg ntseeg dim ntawm tus tsiaj dab qias neeg uas yog tus dab phem, thiab txoj kev tuag, thiab ntuj txiag teb tsaus, thiab lub pas hluav taws thiab leej faj, uas yog txoj kev tsim txom tsis txawj kawg li.

20 Auj peb tus Vajtswv txoj kev dawb huv tsis txawj kawg! Vim nws paub txhua yam, thiab tsis muaj ib yam dab tsi uas nws tsis paub.

21 Thiab nws los rau hauv lub ntiaj teb xwv kom nws yuav cawm tau noob neej txhua tus yog tias lawv mloog nws lub suab; vim saib seb, nws nyiaj txhua tus neeg tej kev mob, muaj tseeb tiag, txhua tus uas muaj sia tej kev mob, tsis hais poj niam, txiv neej, los sis me nyuam yaus, uas yog Adas tsev neeg.

22 Thiab nws nyiaj tej no xwv kom neeg txhua tus yuav sawv rov los, xwv kom lawv txhua tus thiaj yuav sawv ntsug ntawm nws xub ntiag nyob rau hnub tseem ceeb thiab hnub txiav txim.

23 Thiab nws txib neeg txhua tus hais tias lawv yuav tsum hloov siab lees txim, thiab ua kev cai raus dej los ntawm nws lub npe, thiab muaj kev ntseeg Ixayees tus Dawb Huv tag nrho, yog tsis li ntawd ces yuav cawm tsis tau lawv dim nyob hauv Vajtswv lub nceeg vaj.

24 Thiab yog hais tias lawv tsis kam hloov siab lees txim thiab ntseeg nws lub npe, thiab ua kev cai raus dej los ntawm nws lub npe, thiab nyiaj mus kom txog thaum kawg, ces lawv yuav tsum raug txim; vim tus Tswv uas yog Vajtswv, Ixayees tus Dawb Huv, tau hais li ntawd.

25 Yog li ntawd, tus Tswv uas yog Vajtswv tau muab ib txoj kev cai; thiab cov uas tus Tswv tsis tau muab txoj kev cai rau, cov ntawd yuav tsis raug txim; thiab cov uas tsis raug txim cov ntawd yuav tsis muaj kev rau txim; thiab cov uas tsis muaj kev rau txim Ixayees tus Dawb Huv txoj kev hlub tshua muaj cai zam txim rau lawv, los ntawm txoj kev theej txhoj; vim nws lub hwj chim tso lawv dim.

26 Vim txoj kev theej txhoj twb them tau tej nqi ntawm Ixayees tus Dawb Huv txoj kev txim lij rau txhua tus uas tus Tswv tsis tau muab txoj kev cai rau, lawv thiaj dim tus tsiaj dab qias neeg ntawd, txoj kev tuag thiab ntuj txiag teb tsaus, thiab dim tus dab phem, thiab lub pas hluav taws thiab leej faj, uas muaj kev tsim txom tsis txawj kawg; thiab tus Tswv muab lawv txum tim rov los rau tus Vajtswv uas muab pa rau lawv, uas yog Ixayees tus Dawb Huv.

27 Tiam sis kev txom nyem raug tus uas tus Tswv twb muab txoj kev cai rau, muaj tseeb tiag, tus uas twb tau tag nrho Vajtswv tej lus txib, zoo ib yam li peb, thiab ua txhaum tej lus txib ntawd, thiab nkim nws lub neej sim siab, tus ntawd yuav raug txim phem heev!

28 Auj tus niag phem lub tom txwv ntse ntawd! Auj tib neeg txoj kev muaj plhus, txoj kev qaug zog, thiab txoj kev ruam! Thaum lawv muaj kev txawj ntse lawv xav tias lawv muaj tswv yim, thiab lawv tsis mloog Vajtswv tej lus ntuas, lawv tsis quav ntsej txog, xav tias lawv paub los ntawm lawv tus kheej, yog li ntawd, lawv lub tswv yim yog kev ruam thiab tej ntawd yuav pab tsis tau lawv. Thiab lawv yuav piam sij mus.

29 Tiam sis muaj kev txawj ntse yog ib qho zoo yog lawv mloog Vajtswv tej lus ntuas.

30 Tiam sis kev txom nyem yuav raug cov neeg nplua nuj, cov uas nplua nuj rau tej khoom ntiaj teb. Vim yog lawv nplua nuj lawv saib tsis taus cov pluag, thiab lawv tsim txom cov muaj siab mos siab muag, thiab lawv lub siab xav ntsoov txog lawv tej nyiaj txiag; yog li ntawd, lawv tej nyiaj txiag yog lawv tus vaj tswv. Thiab saib seb, lawv tej nyiaj txiag kuj yuav nrog lawv piam sij mus tib yam nkaus.

31 Thiab kev txom nyem yuav raug tej neeg lag ntseg uas tsis kam mloog; vim lawv yuav piam sij mus.

32 Kev txom nyem yuav raug tej neeg dig muag uas tsis kam saib; vim lawv kuj yuav piam sij tib yam nkaus.

33 Kev txom nyem yuav raug cov uas tsis tau ua kev cai txiav haus lawv lub siab, vim qhov uas lawv paub txog lawv tej kev ua phem yuav nplawm lawv thaum txog hnub kawg.

34 Kev txom nyem yuav raug tus neeg dag, vim nws yuav raug ntiab tawm mus rau hauv ntuj txiag teb tsaus.

35 Kev txom nyem yuav raug tus uas txhob txwm tua neeg, vim nws yuav tuag.

36 Kev txom nyem yuav raug cov uas sib daj sib deev, vim lawv yuav raug ntiab tawm mus rau hauv ntuj txiag teb tsaus.

37 Muaj tseeb tiag, kev txom nyem yuav raug cov uas teev dab teev mlom, vim tus dab phem ntawm tag nrho cov dab zoo siab rau lawv.

38 Thiab, lub ntsiab yog li no, kev txom nyem yuav raug txhua tus uas tuag thaum lawv muaj kev txhaum; vim lawv yuav rov qab mus cuag Vajtswv, thiab yuav pom nws lub ntsej muag, thiab tseem muaj lawv tej kev txhaum.

39 Auj, kuv cov kwv tij uas kuv hlub es, nco ntsoov tias qhov uas yus ua txhaum tawm tsam tus Vajtswv Dawb Huv ntawd yog kev phem heev, thiab qhov uas yus ywj rau tej lus ntxias ntawm tus uas txawj ntxias ntawd yog kev phem heev. Nco ntsoov tias, kev muaj lub siab nyiam sab cev nqaij daim tawv yog txoj kev tuag, thiab kev muaj lub siab nyiam sab ntsuj plig yog txoj sia nyob mus ib txhis.

40 Auj, kuv cov kwv tij uas kuv hlub es, cia li cuab pob ntseg mloog kuv tej lus. Nco ntsoov Ixayees tus Dawb Huv tej kev tshav ntuj. Tsis txhob hais tias kuv tau hais tej yam uas nyuaj tawm tsam nej; yog nej hais li ntawd, ces nej hais lus cem tawm tsam qhov tseeb; vim kuv tau hais tej lus los ntawm tus uas Tsim nej. Kuv paub tias tej lus tseeb yeej nyuaj rau txhua yam uas tsis dawb huv; tiam sis cov ncaj ncees tsis ntshai tej lus tseeb, vim lawv ntshaw qhov tseeb thiab yeej tsis tshee.

41 Auj yog li ntawd, kuv cov kwv tij uas kuv hlub es, cia li los cuag tus Tswv, uas yog tus Dawb Huv. Nco ntsoov tias nws tej kev yog tej uas ncaj ncees. Saib seb, txoj kev rau neeg taug yeej nqaim, tiam sis txoj kev ntawd twb nyob ncaj nraim rau ntawm neeg xub ntiag, thiab tus uas zov lub rooj vag yog Ixayees tus Dawb Huv; thiab nws tsis ntiav ib tug tub qhe zov li; thiab tsis muaj lwm txoj kev tsuas yog mus ntawm lub rooj vag xwb; vim yuav dag ntxias tsis tau nws, vim tus Tswv uas yog Vajtswv yog nws lub npe.

42 Thiab tus uas khob, nws yuav qhib rau tus ntawd; cov uas txawj ntse, thiab cov uas muaj kev kawm, thiab lawv cov uas nplua nuj, uas khav txiv vim lawv tej kev txawj ntse, thiab lawv tej tswv yim, thiab lawv tej kev nplua nuj—muaj tseeb tiag, lawv yog cov uas nws tsis quav ntsej txog; thiab yog hais tias lawv tsis muab tej no tso pov tseg, thiab tsis xav hais tias Vajtswv pom tias lawv yog neeg ruam, thiab txo lawv lub hwj chim kom kawg siab kawg ntsws los, ces nws yuav tsis qhib rau lawv.

43 Tiam sis Vajtswv yuav muab tej uas cov neeg muaj tswv yim thiab cov neeg xyuam xim tau txais coj mus zais kom lawv tsis pom tas mus li—muaj tseeb tiag, txoj kev zoo siab ntawd uas tau npaj rau cov ntseeg.

44 Auj, kuv cov kwv tij uas kuv hlub es; nco ntsoov kuv tej lus. Saib seb, kuv hle kuv tej tsoos tsho, thiab kuv muab nchos rau nej pom; kuv thov tus Vajtswv ntawm kuv txoj kev cawm seej kom nws muab nws lub qhov muag uas pom tas txhua yam saib kuv; yog li ntawd, thaum txog hnub kawg nej yeej yuav paub, thaum neeg txhua tus yuav raug txiav txim rau tej yam lawv ua, hais tias Ixayees tus Vajtswv tau ua tim khawv tias kuv tau nchos nej tej kev ua phem tawm ntawm kuv mus, thiab hais tias kuv sawv ntsug ci ntsa iab ntawm nws xub ntiag, thiab kuv tsis raug nej cov ntshav.

45 Auj, kuv cov kwv tij uas kuv hlub es, tso nej tej kev txhaum tseg; daws pov tseg tej saw hlau ntawm tus uas xav khi nej; cia li los cuag tus Vajtswv uas yog lub pob zeb ntawm nej txoj kev cawm seej.

46 Npaj nej tej ntsuj plig rau hnub zoo kawg uas thaum cov neeg ncaj ncees yuav tau txais txoj kev txim lij, uas yog hnub txiav txim, xwv kom nej txhob nkaum nrog txoj kev ntshai; xwv kom nej txhob nco qab txog tag nrho nej lub txim, thiab raug txhib kom qw nrov nrov hais tias: Auj tus Tswv Vajtswv uas Muaj Hwj Chim Tag Nrho, koj txoj kev txiav txim yeej dawb huv, dawb huv kawg—tiam sis kuv paub kuv lub txim; kuv tau ua txhaum koj txoj kev cai, thiab kuv tej kev ua txhaum yog kuv li; thiab tus dab phem tau kuv lawm, ua rau kuv raug nws txoj kev nyuaj siab uas phem heev.

47 Tiam sis saib seb, kuv cov kwv tij, puas tsim nyog kuv tsa kom nej tsim los paub qhov tseeb ntawm tej yam no? Kuv puas yuav ua rau nej ntxhov siab yog hais tias nej lub siab yeej huv huv lawm? Kuv puas yuav qhia meej rau nej raws li txoj kev meej ntawm qhov tseeb yog nej yeej tsis muaj kev txhaum?

48 Saib seb, yog nej dawb huv ces kuv yuav hais rau nej txog tej kev dawb huv; tiam sis vim nej tsis dawb huv, thiab nej saib kuv zoo li ib tug xib hwb, yog li ntawd yeej tsim nyog kom kuv qhia nej txog tej xwm txheej los ntawm kev txhaum.

49 Saib seb, kuv tus ntsuj plig ntxub tej kev txhaum, thiab kuv lub siab nyiam txoj kev ncaj ncees; thiab kuv yuav qhuas kuv tus Vajtswv lub npe uas dawb huv.

50 Cia li los, kuv cov kwv tij, txhua tus uas nqhis, nej cia li los rau ntawm cov dej; thiab tus uas tsis muaj nyiaj, cia li los muas thiab los noj; muaj tseeb tiag, cia li los muas cawv txiv hmab thiab kua mis tsis yuav nyiaj thiab tsis yuav nqi li.

51 Yog li ntawd, tsis txhob siv nyiaj rau tej uas tsis muaj nuj nqis, thiab tsis txhob siv zog rau tej uas tsis txaus nej siab. Cia li rau siab ntso mloog kuv, thiab nco ntsoov tej lus uas kuv tau hais; thiab cia li los cuag Ixayees tus Dawb Huv, thiab cia siab rau tej uas tsis txawj piam sij, thiab tsis txawj lwj, thiab cia nej tus ntsuj plig zoo siab rau tej uas nplua mias.

52 Saib seb, cov kwv tij uas kuv hlub es, nco ntsoov nej tus Vajtswv tej lus; thaum nruab hnub cia li thov nws kom tsis tu ncua, thiab thaum hmo ntuj cia li ua tsaug rau nws lub npe uas dawb huv. Cia nej lub siab zoo siab.

53 Thiab saib seb tus Tswv tej kev khi lus tseem ceeb npaum li cas, thiab qhov uas nws nqis los nrog noob neej nyob yeej zoo mus ib txhis li; thiab vim yog nws lub hwj chim loj, thiab nws txoj kev tshav ntuj, thiab txoj kev hlub tshua, nws tau cog lus tseg rau peb tias peb cov tub ki yuav tsis raug puas tsuaj mus huv tib si, raws li sab cev nqaij daim tawv, tiam sis nws yuav tsom kwm lawv; thiab ntau tiam neeg yav tom ntej lawv yuav hloov los ua ib ceg neeg ncaj ncees rau tsev neeg Ixayees.

54 Thiab nim no, kuv cov kwv tij, kuv yuav qhia rau nej ntxiv; tiam sis cia tag kis tso kuv mam li hais cov lus uas kuv tshuav rau nej. Amees.