1 Cia li cuab pob ntseg mloog kuv, nej cov uas nrhiav kev ncaj ncees. Cia li xav ntsoov txog lub pob zeb uas nej tawg ntshua los, thiab cia li xav ntsoov txog lub qhov khawb uas khawb nej tawm los.

2 Cia li xav ntsoov txog Anplaham, uas yog nej txiv, thiab Xalas, tus uas yug nej los; vim kuv tsuas hu nws tib leeg xwb, thiab foom koob hmoov rau nws xwb.

3 Vim tus Tswv yuav nplij Xi-oos lub siab, nws yuav nplij tag nrho Xi-oos tej chaw puas tsuaj; thiab nws yuav ua kom Xi-oos tej hav zoov zoo li Edees, thiab Xi-oos tej tiaj suab puam zoo li tus Tswv lub vaj. Kev xyiv fab thiab kev nyob kaj siab lug yuav muaj nyob hauv Xi-oos, thiab muaj suab nkauj thiab muaj kev ua Vajtswv tsaug xwb.

4 Kuv cov neeg es, nej cia li mloog kuv hais; thiab cia li cuab pob ntseg mloog kuv, auj kuv haiv neeg es; vim kuv yuav rhawv ib txoj kev cai, thiab kuv yuav ua kom kuv txoj kev txiav txim los nyob ua ib lub teeb rau cov neeg no.

5 Kuv txoj kev ncaj ncees nyob ze; kuv txoj kev cawm seej twb tawm mus lawm, thiab kuv txhais npab yuav txiav txim rau cov neeg. Tej koog pov txwv yuav tos ntsoov kuv, thiab lawv yuav cia siab rau kuv txhais npab.

6 Tsa nej qhov muag ntsia mus saum ntuj, thiab ntsia mus rau hauv ntiaj teb; vim lub ntuj yuav ploj mus yam li tej pa hluav taws, thiab lub ntiaj teb yuav qub mus yam li tej tsoos tsho; thiab lawv cov uas nyob rau hauv yuav tuag tib yam li ntawd. Tiam sis kuv txoj kev cawm seej yuav muaj nyob mus ib txhis li, thiab kuv txoj kev ncaj ncees yuav tsis muaj poob mus li.

7 Cia li mloog kuv hais, nej cov uas paub kev ncaj ncees, cov neeg uas kuv tau sau kuv tej kev cai rau hauv nej lub siab, nej tsis txhob txhawj txog tej uas tib neeg saib tsis taus nej, los sis nej tsis txhob ntshai tej uas lawv cem nej.

8 Vim tej npauj yuav noj lawv yam li ib lub tsoos tsho, thiab tej cua nab yuav noj lawv yam li tej rwb pag. Tiam sis kuv txoj kev ncaj ncees yuav nyob mus ib txhis li, thiab kuv txoj kev cawm seej yuav nyob ntawm ib tiam neeg mus rau ib tiam.

9 Cia li tsim, cia li tsim dheev! Cia li muab lub zog los coj, auj tus Tswv txhais npab es; cia li tsim ib yam li txheej thaum ub. Koj tsis yog tus uas tau hlais Lahaj, thiab tau ua rau tus zaj raug mob los?

10 Koj tsis yog tus uas tau ua dej hiav txwv qhuav, tej dej tob heev; tus uas tau rhawv ib txoj kev puag hauv qab thu dej hiav txwv pub rau cov neeg uas koj cawm hla dhau mus los?

11 Yog li ntawd, cov neeg uas tus Tswv tau txhiv lawm yuav rov qab los, thiab los hu nkauj cuag tsi rau Xi-oos; thiab kev xyiv fab thiab kev dawb huv uas kav ib txhis yuav los rau saum lawv lub taub hau; thiab lawv yuav tau txais kev zoo siab thiab kev xyiv fab; kev tu siab thiab kev quaj ntsuag yuav khiav tawm mus.

12 Kuv yog nws; muaj tseeb tiag, kuv yog tus uas nplij nej lub siab. Saib seb, nej yog leej twg, es nej ho ntshai neeg, cov uas txawj tuag, thiab ntshai noob neej, cov uas tus Tswv ua tau zoo li tej nyom?

13 Thiab hnov qab tus Tswv uas yog tus tsim nej, tus uas tau muab lub ntuj nrhab nyob chaw, thiab tau teeb lub hauv paus ntawm lub ntiaj teb, thiab tau ntshai tsis tu ncua txhua txhua hnub, vim yog tus neeg quab yuam txoj kev chim siab, zoo li nws twb npaj tau yuav ua kev puas tsuaj? Thiab tus neeg quab yuam txoj kev chim siab nyob qhov twg?

14 Tus neeg raug txhom uas luag coj lawm yuav khiav ceev ceev, kom nws dim, thiab kom nws tsis txhob tuag nyob hauv lub qhov taub, thiab kom nws tej zaub mov noj tsis txawj tas.

15 Tiam sis kuv yog tus Tswv nej tus Vajtswv, tus uas ua rau tej nplaim dej hiav txwv nrov; Ib Tsoom Tub Rog tus Tswv yog kuv lub npe.

16 Thiab kuv tau muab kuv tej lus tso rau hauv nej lub qhov ncauj, thiab tau muab nej npog rau hauv kuv txhais tes tus duab ntxoov ntxoo, kom kuv cog tau lub ntuj thiab teeb tau lub hauv paus ntawm lub ntiaj teb, thiab hais rau Xi-oos tias: Saib seb, nej yog kuv cov neeg.

17 Cia li tsim, cia li tsim dheev, cia li sawv ntsug, auj Yeluxalees, cov uas tau haus lub khob ntawm tus Tswv txoj kev npau taws los ntawm nws txhais tes—nej tau haus tej uas tog rau hauv qab khob ntawm lub khob mob khob ntsaj—

18 Thiab tag nrho Yeluxalees cov tub uas nws yug los twb tsis muaj ib tug los coj nws kev thiab tsis muaj ib tug los tuav nws tes, ntawm tag nrho cov tub uas nws yug hlob.

19 Ob tug tub no tau los rau koj, leej twg yuav tu siab rau koj—koj txoj kev puas tsuaj puas ntsoog, thiab kev tshaib nqhis thiab rab ntaj—thiab los ntawm leej twg es kuv thiaj yuav nplij koj lub siab?

20 Koj cov tub tau tsaus muag, tsuas yog tshuav ob tug no xwb; nkawd pw rau hauv plawv ntawm txhua txoj kev; zoo li ib tug heev nyuj qus uas nyob hauv nkuaj, nkawd muaj tus Tswv txoj kev npau taws puv npo, uas yog koj tus Vajtswv txoj kev cem ntuas.

21 Yog li ntawd nim no cia li cuab pob ntseg mloog qhov no, nej cov uas raug kev kub ntxhov, thiab cov uas haus qaug, thiab tsis yog qaug cawv txiv hmab:

22 Koj tus Tswv hais li no, tus Tswv thiab koj tus Vajtswv twb thov rau nws cov neeg; saib seb, kuv tau muab lub khob mob khob ntsaj, cov txo uas tog rau hauv lub qab khob ntawm kuv txoj kev npau taws, tshem tawm ntawm koj txhais tes mus; koj yuav tsis tau haus ntxiv lawm.

23 Tiam sis kuv yuav muab lub khob ntawd rau hauv cov uas tsim kev kub ntxhov rau koj txhais tes; cov uas tau hais rau koj hais tias: Cia li pe, kom peb hla tau mus—thiab koj tau pw ntog zoo li tej av thiab zoo li txoj kev cia lawv hla mus.

24 Cia li tsim, cia li tsim dheev, cia li muab nej lub zog los coj, auj Xi-oos es; cia li muab koj tej tsoos tsho uas zoo nkauj coj los hnav, auj Yeluxalees, lub nroog uas dawb huv es; vim txij li no mus yuav tsis muaj leej twg los tau rau hauv koj ntxiv lawm yog tias lawv tsis huv thiab tsis tau ua kev cai txiav.

25 Cia li nchos koj tus kheej ntawm tej hmoov av; cia li sawv, thiab zaum, auj Yeluxalees; daws tej hlua khi ntawm koj caj dab, auj Xi-oos tus ntxhais uas raug txhom es.