1 Vim tus Tswv yuav muaj lub siab hlub tshua rau Yakhauj, thiab tseem yuav xaiv Ixayees, thiab muab lawv tso mus nyob rau hauv lawv thaj av; thiab tus Tswv yuav muab cov neeg txawv los koom nrog lawv, thiab cov neeg txawv yuav npuab nrog tsev neeg Yakhauj.

2 Thiab cov neeg yuav coj tsev neeg Yakhauj los rau lawv tej chaw; muaj tseeb tiag, coj deb puag tim thoob plaws lub ntiaj teb los; thiab lawv yuav rov qab los rau lawv tej thaj av uas cog lus cia. Thiab tsev neeg Ixayees yuav tau tej av ntawd, thiab yuav cia tus Tswv thaj av rau tej tub qhe thiab ntxhais qhev; thiab lawv yuav txhom cov uas tau muab lawv txhom; thiab lawv yuav kav cov uas tsim txom lawv.

3 Thiab yuav muaj tias nyob rau hnub ntawd tus Tswv yuav pub koj so, ntawm koj txoj kev tu siab, thiab ntawm koj txoj kev ntshai, thiab ntawm txoj kev ua qhev hnyav uas koj tau raug yuam ua.

4 Thiab yuav muaj tias nyob rau hnub ntawd, koj yuav muab zaj paj lug no nkaug Npanpiloos tus vaj ntxwv, thiab hais tias: Ua li cas cov neeg tsim txom ho tsum lawm, lub nroog kub ho tsum lawm!

5 Tus Tswv tau muab cov neeg phem tus pas nrig lov, cov neeg kav teb kav chaw tej cwj dam.

6 Tus uas chim siab nplawm cov neeg tsis tu ncua, tus uas npau taws kav tej haiv neeg, twb raug tsim txom, thiab tsis muaj leej twg cheem tau li.

7 Tag nrho lub ntiaj teb nyob tiaj tus, thiab nyob ntsiag to; lawv zoo siab pib hu nkauj.

8 Muaj tseeb tiag, tej ntoo yuj zoo siab rau koj, thiab tej ntoo ntshaub ntawm Lenpanoos thiab, hais tias: Txij thaum koj tau vau tsis muaj tus neeg ntov ntoo tuaj tawm tsam peb.

9 Ntuj txiag teb tsaus uas nyob puag sab hauv npaj siab tos ntsoov yuav ntsib koj thaum koj mus; nws tau txhaub cov tuag kom sawv los rau koj, txhua tus nom tswv hauv lub ntiaj teb; nws tau tsa tag nrho cov vaj ntxwv ntawm cov teb chaws kom sawv ntawm lawv tej rooj theej kiab los.

10 Lawv tag nrho yuav tsa suab thiab hais rau koj hais tias: Puas yog koj hloov kom qaug zog ib yam li peb thiab? Puas yog koj hloov los ua zoo li peb?

11 Koj lub hwj chim twb raug muab txo nqis mus rau hauv qhov ntxa; twb tsis hnov koj tej suab raj nrov; tej kas twb nkag rau koj sab haud, thiab tej kas twb npog koj tas.

12 Ua li cas koj ho poob saum ntuj ceeb tsheej los, auj Luxifaws, tus tub ntawm caij sawv ntxov! Ua li cas koj ho raug txiav poob los rau hauv av, tus uas tau ua rau tej haiv neeg qaug zog!

13 Vim koj tau hais nyob hauv koj lub siab tias: Kuv yuav nce mus lawm saum ntuj ceeb tsheej, kuv yuav muab kuv lub rooj theej kiab tsa nto siab tshaj Vajtswv tej hnub qub; kuv kuj yuav zaum rau saum lub roob ntawm txoj kev sib sau los ua ke, uas nyob rau sab qaum teb;

14 Kuv yuav nce mus kom siab tshaj cov huab; kuv yuav zoo li tus Siab Tshaj Plaws.

15 Tiam sis koj yuav raug txo nqis los mus rau hauv ntuj txiag teb tsaus, mus rau tej sab ntawm lub qhov.

16 Lawv cov uas pom koj yuav ua qhov muag nruj nreem rau koj, thiab yuav ntsia koj, thiab yuav hais tias: Nov puas yog tus txiv neej uas tau ua rau lub ntiaj teb tshee hnyo, uas tau nchos tej teb chaws?

17 Thiab tau ua rau lub ntiaj teb zoo li ib lub hav zoov, thiab tau ua rau tej nroog nyob hauv puas tsuaj, thiab tsis kam qhib qhov rooj rau nws cov neeg uas raug kaw?

18 Tag nrho cov vaj ntxwv ntawm tej haiv neeg, muaj tseeb tiag, lawv txhua tus, pw nyob hauv yeeb koob, lawv txhua tus nyias nyob hauv nyias lub tsev.

19 Tiam sis koj tau raug ntiab tawm ntawm koj lub ntxa zoo li ib ceg ntoo uas txaus ntxub, thiab zoo li cov seem tshuav uas tau raug muab tua, muab ntaj nkaug tshab, cov uas tau mus rau hauv lub qhov pob zeb; zoo li lub cev neeg tuag uas raug tsuj rau hauv qab xib taws.

20 Yuav tsis coj koj mus faus koom nrog lawv ua ke, vim koj tau ua rau koj thaj av puas tsuaj thiab tau tua koj cov neeg; tej tub ki ntawm cov neeg ua phem yuav tsis muaj hnub tau koob tau npe.

21 Npaj tua nws cov me nyuam vim tej kev ua phem ntawm lawv cov yawg koob, xwv kom lawv sawv tsis taus, thiab tsis tau thaj av ua lawv tug, thiab tsis tau mus nyob ua zej ua zog thoob plaws lub ntiaj teb.

22 Vim kuv yuav sawv los tawm tsam lawv, Ib Tsoom Tub Rog tus Tswv hais li, thiab txiav tawm ntawm Npanpiloos lub npe, thiab tej seem tshuav, thiab tej tub, thiab tej tub xeeb ntxwv, tus Tswv hais li.

23 Kuv kuj yuav muab Npanpiloos ua ib qho chaw rau tej os dej nyob thiab ua tej pas dej; thiab kuv yuav muab rab khaub rhuab ntawm txoj kev puas tsuaj los cheb Npanpiloos, Ib Tsoom Tub Rog tus Tswv hais li.

24 Ib Tsoom Tub Rog tus Tswv tau cog lus ruaj, hais tias: Tseeb raws li kuv tau xav, yeej yuav muaj zoo li ntawd; thiab raws li kuv tau npaj, yeej yuav yog zoo li ntawd—

25 Hais tias kuv yuav coj tus neeg Axilias los rau hauv kuv thaj av, thiab nyob saum kuv tej roob yuav muab nws tsuj rau hauv qab xib taws; thaum ntawd nws tus quab yuav ncaim ntawm lawv mus, thiab nws lub nra hnyav yuav ncaim ntawm lawv xub pwg mus.

26 Qhov no yog lub ntsiab uas tau npaj ua rau tag nrho lub ntiaj teb; thiab qhov no yog txhais tes uas tau xyab mus rau txhua haiv neeg.

27 Vim Ib Tsoom Tub Rog tus Tswv tau npaj lawm, thiab leej twg yuav muaj cuab kav rhuav tau? Thiab nws txhais tes twb xyab tawm lawm, thiab leej twg yuav muab nws txhais tes thim rov qab?

28 Nyob rau xyoo uas vaj ntxwv Ahas tuag yog lub nra hnyav no ntag.

29 Koj tsis txhob zoo siab, tag nrho nej cov neeg Filixatees, hais tias nws tus pas uas tau muab nej nplawm twb lov lawm; vim yuav tawm ib tug nab raj kub sai ntawm tus nab tej cag los, thiab nws tej me nyuam yuav yog ib tug nab hluav taws ya.

30 Thiab thawj tus me nyuam yug ntawm cov neeg pluag yuav muaj noj, thiab tej neeg txom nyem yuav pw hauv txoj kev nyab xeeb; thiab kuv yuav muab txoj kev tshaib nqhis los tua nej tus cag, thiab nws yuav tua nej tej seem tshuav.

31 Cia li cuab suab nyiav, auj rooj vag; cia li qw, auj lub nroog; nej, tag nrho cov neeg Filixatees, ntxhov hnyo lawm; vim yuav muaj ib nthw pa hluav taws los pem qaum teb los, thiab yuav tsis muaj leej twg nyob nws ib leeg thaum txog tej caij uas tau teem tseg.

32 Thaum ntawd cov tub xa xov ntawm tej haiv neeg ho yuav teb li cas? Teb tias tus Tswv tau tsa Xi-oos lawm, thiab cov neeg pluag ntawm nws cov neeg yuav cia siab rau Xi-oos.