1 Thiab nim no, saib seb, kuv cov kwv tij, kuv tau hais rau nej, raws li tus Ntsuj Plig tau txhib kom kuv hais; yog li ntawd, kuv paub tias tej no yeej yuav muaj los xwb xwb li.

2 Thiab tej uas yuav muab sau tawm hauv phau ntawv los yuav muaj nuj nqis heev rau noob neej, thiab qhov tseem ceeb yog rau peb cov tub ki, uas yog ib co seem tshuav ntawm tsev neeg Ixayees.

3 Vim yuav muaj tias nyob rau hnub ntawd cov koom txoos uas tib neeg tsa, thiab tsis yog tsa rau tus Tswv, thaum ib tug yuav hais rau lwm tus hais tias: Saib seb, kuv, kuv yog tus Tswv li; thiab lwm tus ho yuav teb tias: Kuv, kuv yog tus Tswv li; thiab txhua tus uas tau tsa tej koom txoos yuav hais li no, thiab tsis yog tsa rau tus Tswv—

4 Thiab lawv ib leeg yuav cav nrog ib leeg; thiab lawv cov pov thawj ib leeg yuav cav nrog ib leeg, thiab lawv yuav qhia los ntawm lawv tej kev kawm, thiab xyeej tus Vaj Ntsuj Plig Dawb Huv, uas ua rau neeg txawj hais.

5 Thiab lawv xyeej Vajtswv lub hwj chim, uas yog Ixayees tus Dawb Huv; thiab lawv hais rau cov neeg tias: Cuab pob ntseg mloog peb, thiab nej cia li mloog peb tej lus ntsiab cai; vim saib seb niaj hnub nim no yeej tsis muaj Vajtswv, vim tus Tswv thiab tus Txhiv Dim tau ua nws txoj hauj lwm tiav, thiab nws tau muab nws lub hwj chim rau tib neeg lawm;

6 Saib seb, nej cia li mloog kuv txoj lus ntsiab cai; yog leej twg hais tias muaj ib qho txuj ci tseem ceeb uas tau ua los ntawm tus Tswv txhais tes, tsis txhob ntseeg; vim niaj hnub nim no nws tsis yog ib tug Vajtswv ua txuj ci tseem ceeb; nws twb ua tiav nws txoj hauj lwm lawm.

7 Muaj tseeb tiag, thiab yuav muaj coob leej uas hais tias: Yeej meem noj, yeej meem haus, thiab cia li zoo siab, vim tag kis peb yuav tuag; thiab yuav zoo rau peb.

8 Thiab kuj yuav muaj coob leej uas hais tias: Yeej meem noj, yeej meem haus, thiab cia li zoo siab; txawm li ntawd los, hwm Vajtswv—nws yuav zam txim rau tej kev txhaum me ntsis; muaj tseeb tiag, dag me ntsis, siv lwm tus neeg cov lus rov qab tawm tsam nws, khawb ib lub qhov rau koj tus neeg zej zog; tej no ua yeej tsis ua li cas; thiab cia li ua txhua yam no, vim tag kis peb yuav tuag; thiab txawm tias peb muaj txim los, Vajtswv yuav ntaus peb ob peb nplawg xwb, thiab thaum kawg yuav cawm peb dim nyob hauv Vajtswv lub nceeg vaj.

9 Muaj tseeb tiag, thiab yuav muaj ntau tus uas yuav qhia zoo li no, tej lus cuav thiab tej lus tsis muaj qab hau thiab tej lus qhia vwm ntsuav, thiab yuav khav txiv ntxhias hauv lawv lub siab, thiab yuav nrhiav chaw tob muab lawv tej kev tom txwv zais deb ntawm tus Tswv; thiab tej yam lawv ua yuav nyob hauv kev tsaus ntuj.

10 Thiab cov ntseeg cov ntshav yuav qw tawm hauv av los tawm tsam lawv.

11 Muaj tseeb tiag, lawv txhua tus tau ncaim tawm ntawm txoj kev mus; lawv tau los ua neeg lim hiam.

12 Vim kev muab hlob, thiab vim tej xib hwb cuav, thiab tej lus qhuab qhia cuav, lawv tej koom txoos tau hloov los ua tsis huv, thiab lawv tej koom txoos yog tej uas muaj muaj plhus; vim kev muab hlob lawv thiaj khav txiv ntxhias.

13 Lawv nyiag ntawm cov neeg pluag vim yog lawv tej chaw teev tiam uas zoo heev; lawv nyiag ntawm cov neeg pluag vim yog lawv tej tsuj tej npuag; thiab lawv tsim txom cov neeg siab mos siab muag thiab cov neeg pluag hauv nruab siab, vim lawv txoj kev muab hlob lawv thiaj khav txiv ntxhias.

14 Lawv ua caj dab txhav thiab tsa taub hau siab; muaj tseeb tiag, thiab vim kev muab hlob, thiab kev phem, thiab kev qias, thiab kev sib daj sib deev, lawv txhua tus tau mus yuam kev tsuas yog tshuav ob peb tug, yog cov uas txo hwj chim coj raws li Khetos; txawm li ntawd los, muaj cov xib hwb cuav coj lawv, uas ntau zaus ua rau lawv yuam kev vim lawv kawm los ntawm neeg tej ntsiab cai.

15 Auj cov neeg txawj ntse, thiab cov neeg kawm txawj kawm ntse, thiab cov neeg nplua nuj, uas khav txiv hauv lawv lub siab muab hlob, thiab tag nrho cov uas tshaj tawm tej lus qhuab qhia cuav, thiab tag nrho cov uas sib daj sib deev, thiab muab tus Tswv txoj kev yog pauv, tus Tswv Vajtswv uas Muaj Hwj Chim Tag Nrho hais tias, kev txom nyem, kev txom nyem, kev txom nyem yuav raug lawv, vim lawv yuav raug muab pov mus rau hauv ntuj txiag teb tsaus!

16 Kev txom nyem yuav raug cov uas saib cov neeg ncaj ncees tsis rau nqi thiab hais lus cem tawm tsam tej uas zoo, thiab hais tias tej ntawd tsis muaj nuj nqis dab tsi! Vim hnub ntawd yuav los uas tus Tswv uas yog Vajtswv yuav los xyuas cov neeg hauv lub ntiaj teb sai sai; thiab nyob rau hnub ntawd thaum lawv txoj kev ua phem siav tas lawm lawv yuav piam sij.

17 Tiam sis saib seb, yog hais tias cov neeg nyob hauv lub ntiaj teb hloov siab lees txim rau lawv tej kev phem thiab kev qias lawv yuav tsis raug puas tsuaj, Ib Tsoom Tub Rog tus Tswv hais li ntawd.

18 Tiam sis saib seb, lub koom txoos uas muaj zog thiab txaus ntxub ntawd, uas yog tag nrho ntiaj teb tus niam ntiav, yeej yuav vau rau hauv av, thiab qhov vau ntawd yuav phem kawg nkaus.

19 Vim tus dab phem lub nceeg vaj yeej yuav tshee hnyo, thiab tus Tswv yuav txhaub kom cov uas nyob rau hauv tus dab phem lub nceeg vaj tig los hloov siab lees txim, tsis li ces tus dab phem yuav xuas nws tej saw hlau uas kav ib txhis li los txhom lawv khi, thiab txhaub kom lawv npau taws, thiab piam sij;

20 Vim saib seb, nyob rau hnub ntawd, nws yuav tshum noob neej lub siab, thiab txhaub kom lawv npau taws tawm tsam tej uas zoo.

21 Thiab nws yuav nplij lwm tus neeg lub siab, thiab ntxias lawv mus kom txaus siab rau sab cev nqaij daim tawv, kom lawv hais tias; Txhua yam yeej zoo nyob hauv Xi-oos; muaj tseeb tiag, Xi-oos yeej vam meej, txhua yam yeej zoo—thiab tus dab phem dag ntxias lawv tej ntsuj plig li no, thiab maj mam coj lawv mus rau hauv ntuj txiag teb tsaus.

22 Thiab saib seb, nws ntxias tau lwm cov, thiab qhia rau lawv hais tias yeej tsis muaj ntuj txiag teb tsaus; thiab nws hais rau lawv tias: Kuv tsis yog dab phem, vim tsis muaj dab phem—thiab nws yuav ntxhi rau lawv tej pob ntseg li no, kom txog thaum nws xuas nws tej saw hlau uas txaus ntshai khi tau lawv, qhov uas tsis muaj hnub yuav dim.

23 Muaj tseeb tiag, lawv raug khi los ntawm kev tuag, thiab ntuj txiag teb tsaus; thiab kev tuag, thiab ntuj txiag teb tsaus, thiab tus dab phem, thiab txhua tus uas raug khi li ntawd yeej yuav los sawv ntawm Vajtswv lub rooj theej kiab, thiab raug txiav txim raws li tej yam lawv tau ua, tom qab ntawd lawv yeej yuav mus rau hauv qhov chaw uas tau npaj rau lawv, twb yog ib lub pas hluav taws thiab leej faj, uas muaj kev tsim txom tsis txawj kawg li.

24 Yog li ntawd, kev txom nyem yuav raug tus uas txaus siab lawm nyob hauv Xi-oos!

25 Kev txom nyem yuav raug tus uas tshaj tawm hais tias: Txhua yam yeej zoo!

26 Muaj tseeb tiag, kev txom nyem yuav raug tus uas cuab pob ntseg mloog neeg tej ntsiab cai, thiab tsis lees paub Vajtswv lub hwj chim, thiab lub txiaj ntsim Vaj Ntsuj Plig Dawb Huv!

27 Muaj tseeb tiag, kev txom nyem yuav raug tus uas hais tias. Peb tau txais lawm, thiab peb tsis yuav ntxiv lawm!

28 Thiab lub ntsiab yog li no, kev txom nyem yuav raug txhua tus cov uas tshee hnyo, thiab npau taws vim Vajtswv txoj kev tseeb! Vim saib seb, tus uas tsa rau saum lub pob zeb zoo siab hlo txais Vajtswv txoj kev tseeb; thiab tus uas tsa rau saum tej xuab zeb tshee hnyo ntshai tsam nws yuav vau.

29 Kev txom nyem yuav raug tus uas hais tias: Peb tau txais Vajtswv txoj lus lawm, thiab peb tsis xav tau Vajtswv txoj lus ntxiv lawm, vim peb muaj txaus lawm!

30 Vim saib seb, tus Tswv uas yog Vajtswv hais li no: Kuv yuav muab rau noob neej ib nqe lus ntxiv rau ib nqe lus, ib ntsiab cai ntxiv rau ib ntsiab cai, muab me ntsis nim no thiab muab me ntsis lwm hnub; thiab lawv cov uas mloog kuv tej lus ntsiab cai, thiab cuab pob ntseg rau kuv tej lus ntuas, yuav tau koob hmoov, vim lawv yuav kawm laj lim tswv yim; rau tus uas txais kuv yuav muab ntau ntxiv; thiab cov uas hais tias, Peb muaj txaus lawm, kuv yuav muab tej uas lawv muaj tshem ntawm lawv mus.

31 Tus uas tso siab rau tib neeg, los sis cia cev nqaij daim tawv ua nws txhais npab, los sis mloog neeg tej ntsiab cai yuav raug foom tsis zoo, tsuas yog tias lawv tej ntsiab cai yog muab los ntawm tus Vaj Ntsuj Plig Dawb Huv lub hwj chim.

32 Kev txom nyem yuav raug Lwm Haiv Neeg, tus Tswv uas yog Ib Tsoom Tub Rog tus Vajtswv hais li! Txawm hais tias kuv yuav xyab kuv txhais npab rau lawv ib hnub dhau ib hnub los, lawv yuav xyeej kuv; txawm li ntawd los, kuv yuav hlub tshua lawv, tus Tswv uas yog Vajtswv hais li, yog hais tias lawv hloov siab lees txim thiab los cuag kuv; vim kuv txhais npab yeej xyab rawv tas hnub li, tus Tswv uas yog Ib Tsoom Tub Rog tus Vajtswv hais li.